4 თებერვალს ხარაგაულის მუნიციპალიტეტის საკრებულოს სხდომა გაიმართა. სხდომაზე დეპუტატებმა დღის წესრიგით გათვალისწინებული  ოთხი საკითხი განიხილეს. პირველი საკითხი  მერიის მიერ 2018 წლის შესყიდვების გეგმის შესაბამისად  განხორციელებული შესყიდვების ანგარიშის შეფასების შესახებ ინფორმაცია გახლდათ. საკითხი სახელმწიფო შესყიდვებისა და მატერიალურ-ტექნიკური უზრუნველყოფის განყოფილების უფროსმა, ზურაბ იჩქიტიძემ წარადგინა. ზურაბ იჩქიტიძის განმარტებით, გასულ 2018 წელს მუნიციპალიტეტის მერიამ შეასრულა 112 ელექტრონული ტენდერის სატენდერო დოკუმენტაციის პროექტი, რომელთაგან  64 შედგა, 2-შეწყდა, ხოლო-12 მათგანი უარყოფითად დასრულდა,  33  ტენდერი კი, ტექნიკური დოკუმენტაციის გამო ვერ შედგა. ერთი ტენდერი კი ამ ეტაპზე მიმდინარეობს. საკითხთან დაკავშირებით დეპუტატებმა ძირითადი შენიშვნები რამდენჯერმე გამოცხადებულ,  არ შემდგარ ტენდერებზე, პროექტების ხშირ გადავადებებზე და უპასუხისმგებლო ინდმეწარმეებზე გამოთქვეს, რომლებმაც პროექტები მიატოვეს და ხელშეკრულება არ შეწყვეტიათ. საკრებულოს მაჟორიტარი დეპუტატი, დავით კიკნაძე აღნიშნავს, რომ საღანძილე-ზარანის დამაკავშირებელ ხიდის საპროექტო-სახარჯთაღრიცხვო პროექტის შესყიდვაზე  მუნიციპალიტეტის მერიამ ტენდერი 6-ჯერ გამოაცხადა: „მაინტერესებს სატენდერო კომისიამ რა შეცვლა, როდესაც პროექტი რამდენჯერმე ჩაიშალა. მოგეხსენებათ ხიდი დაზიანდა წყალდიდობის შედეგად, თანხები დროულად გამოიყო სტიქიის სალიკვიდაციო ფონდიდან და შესაბამისად ეს საკითხი   დაჩქარებული წესით უნდა მოგვარებულიყო“ - განაცხა დავით კიკნაძემ. ზურაბ იჩქიტიძის განმარტებით, აღნიშნული პროექტის შესყიდვაზე ტენდერი თავიდან 5 ათასი ლარზე გამოცხადდა, რომელიც ყოველ ჯერზე იზრდებოდა და  8 ათას ლარამდე ავიდა. მისივე თქმით იყო მცდელობა ასევე პროექტის ერთ პირთან მოლაპარაკების გზით, გამარტივებული წესით შესყიდვასთან დაკავშირებით, თუმცა ინდმეწარმეებმა უარი განაცხადეს, რადგან შესყიდვების სააგენტო აწესებს რეგულაციებს, რომელიც ინდმეწარმეებისთვის არც ისე ხელსაყრელია. საკრებულოს „ფრაქცია ქართულ ოცნება-დემოკრატების“ თავმჯდომარის, პაატა გოგოლაძის აზრით რამდენიმე თვის განმავლობაში მიზანმიმართულად ფერხდებოდა  შესყიდვების მიმდინარეობა „საბოტაჟს ვერ დავარქმევ, მაგრამ ჩემი აზრით, უპასუხისმგებლო დამოკიდებულება იყო პროექტების შესყიდვისას, რადგან ვფიქრობ უფრო მარტივად შეიძლებოდა პროექტების შესყიდვა.“ პაატა გოგოლაძე ასევე დაინტერესდა, მიმდინარე წელსაც, ხომ არ განმეორდება იგივე და ტენდერები ხომ არ ჩაიშლება? საკრებულოს საფინანსო-საბიუჯეტო კომისიის თავმჯდომარის, ვარლამ ჭიპაშვილის განცხადებით, საპროექტო-სახარჯთაღრიცხვო პროექტები სათანადოდ არ არის მომზადებული „პროექტები შესაბამისად არ არის მომზადებული, ისევე როგორც, არ არის სწორად დათვლილი საბაზრო ღირებულება და სწორედ ამ მიზეზით ხდება პროექტების დაწუნება.“ ზურაბ იჩქიტიძის განმარტებით, არშემდგარი ტენდერების მიზეზი ფასები იყო და არა დოკუმენტაციის არასათანადოდ მომზადება. „პროექტები, რომ  მაღალი ხარისხით შესრულებულიყო, საპროექტო-სახარჯთაღრიცხვო დოკუმენტაციაში გეოლოგიური და გეოდეზიური კვლევების აუცილებლობა მოვითხოვეთ. ეს კვლევები დამპროექტებელს ხარჯებს უზრდის, რაც გახლდათ ალბათ ერთ-ერთი მიზეზი არშემდგარი ტენდერების“ - აღნიშნა შესყიდვების განყოფილების უფროსმა. ვარლამ ჭიპაშვილის თქმით,  2018 წელს  რამდენიმე პროექტის გადავადება მოხდა, რომლის  მიზეზად ინდმეწარმეები ძირითადად ნალექს ასახელებდნენ. იგი მიიჩნევს, რომ ნალექი არ უნდა იყოს სამუშაოების შესრულებისათვის შემაფერხებელი. ვარლამ ჭიპაშვილმა ასევე  ისაუბრა არაკეთილსინდისიერ ინდმეწარმეებზე, რომლებმაც პროექტები არ დაასრულეს და მიუხედავად ამისა, არ მომხდარა ხელშეკრულებების შეწყვეტა. სხდომაზე, საბოლოოდ დეპუტატთა ხმათა უმრავლესობით შესყიდვების ანგარიში უარყოფითად შეფასდა. სხდომაზე ასევე განიხილეს სოციალურად დაუცველ და მძიმე ეკონომიკური პირობების მქონე მოქალაქეებზე მატერიალური დახმარების გაცემის წესში შესატანი ცვლილებები. ცვლილებასთან  დაკავშირებით ინფორმაცია ჯანმრთელობისა და სოციალური დაცვის სამსახურის უფროსმა, ნანა კიკნაძემ წარადგინა. ნანა კიკნაძის განმარტებით, შაქრიანი დიაბეტისა და გულსისხლძარღვთა დაავადებულ პაციენტებზე მედიკამენტების შესაძენად მოქმედებს სახელმწიფო პროგრამა და ამ მედიკამენტების შეძენა მუნიციპალიტეტის სოციალური  პროგრამებიდან აღარ გაგრძელდება. მისივე განცხადებით სოციალურ პროგრამებს დაემატა განსაკუთრებით მძიმე შეზღუდვის მქონე შშმ პირების დახმარება, რომლებიც საჭიროებენ მუდმივ მომვლელს ან მეთვალყურეს და არ არიან სოციალური შემწეობის მიმღები, მათ მუნიციპალიტეტის მერია თვეში 30 ლარის ოდენობით დაეხმარება. დეპუტატებმა სხვადასხვა ნაწილში განიხილეს საკრებულოს ფრაქციების „თვითმმართველობა ხალხისთვის“ და „ძალა ერთობაშია“ საერთო განცხადება. განცხადებაში ფრაქციების თავმჯდომარეები, ინგა მაღრაძე და თორნიკე ავალიშვილი დამოუკიდებელი აუდიტის მოწვევას მოითხოვენ, რათა შესწავლილი იქნას მერისა და მერიის სამი წლის საქმიანობა. როგორც, თორნიკე ავალიშვილმა განმარტა, საკრებულოს უმრავლესობას კითხვები და შენიშვნები აქვს მერისა და მერიის სამსახურების მიმართ: „უამრავი კითხვები არსებობს, უარყოფითად აფასებთ სამსახურების საქმიანობას, ჩვენ მოგმართავთ, რომ მოვიწვიოთ დამოუკიდებელი აუდიტი და შეისწავლოს მათი საქმიანობა, რათა ერთხელ და საბოლოოდ  გაეცეს  კითხვებს პასუხები“.  საკრებულოს ფრაქცია „ქართული ოცნება-დემოკრატების“ თავმჯდომარის პაატა გოგოლაძის თქმით დამოუკიდებელი აუდიტის მოწვევასთან დაკავშირებით უმრავლესობის სხდომა გაიმართება და გადაწყვეტილებას უახლოეს მომავალში მიიღებენ.                 

1 თებერვლიდან ხარაგაულის მუნიციპალიტეტის სოფლებში, სოფლის მხარდაჭერის პროგრამის ფარგლებში, საერთო კრებების ჩატარება დაიწყო.  პირველი საერთო კრება ბაზალეთის ადმინისტრაციულ ერთეულში გაიმართა, სადაც  წინასწარ წარმოდგენილ იდეებზე,  ფარული კენჭისყრით,  სოფლის საჭიროებებისთვის, საკუთარი ნება ბაზალეთის, ღარიხევის, ქროლისა და წიფის მოსახლეობამ დააფიქსირა.  საერთო კრებებს ზემოთ აღნიშნულ სოფლებში მერის პირველი მოადგილე, არჩილ მაღრაძე უძღვებოდა. შეხვედრებს ასევე ესწრებოდა ბაზალეთის ადმინისტრაციული ერთეულის წარმომადგენელი, თენგიზ ჭიპაშვილი და მაჟორიტარი დეპუტატი ვარლამ ჭიპაშვილი.   საერთო კრებების დასრულების შემდეგ მოსახლეობამ შემდეგი პროექტები აირჩია:  სოფელ ბაზალეთში საუბნო გზებზე გარე განათების ქსელის მოწყობა - 12 000 ლარი.   ქროლში სოფლის ცენტრალურ გზაზე, ასევე, გარე განათების ქსელის გაკეთება - 10 000 ლარი.  რაც შეეხება სოფლებს ღარიხევსა და წიფს აქაურმა მაცხოვრებლებმა იდეები გააერთიანეს და 20 000 ლარით ორი სოფლის მოსახლეობა სასმელი წყლის ავზს და მილებს შეიძენს, ასევე მოაწყობენ გარე განათების სისტემას და რემონტს ჩაუტარებენ სოფლის კლუბს. შეგახსენებთ, რომ სოფლის მხარდაჭერის პროგრამა 2019 წლიდან განახლდა. პროექტის ფარგლებში ხარაგაულის მუნიციპალიტეტს სოფლის პროექტებისთვის 830 000 ლარი გამოეყო. თანხა სოფლის მოსახლების მიერ შერჩეულ პროექტებზე გადანაწილდება.  საერთო კრებები ხარაგაულის მუნიციპალიტეტის სოფლებში 28 თებერვალს დასრულდება.  იხილეთ ოქმი

ხარაგაულის მუნიციპალიტეტის საკუთრებაში არსებული ქონების იჯარის ფორმით სარგებლობაში გადაცემის მიზნით  ელექტრონული აუქციონი ცხადდება. ლახუნდარის მიწები                                   აუქციონი 2019 წლის 7 თებერვალს,  16:00 საათზე, დაიწყება და 26 თებერვალს, 16:00 საათზე, დასრულდება. აუქციონი ცხადდება ასევე შემდეგი ქონების პრივატიზებისა და იჯარით გაცემის მიზნით. რკინის მილები უბისის სარიტუალო აუქციონი 2019 წლის 11 თებერვალს,  16:00 საათზე, დაიწყება და 21 თებერვალს, 16:00 საათზე, დასრულდება. ინფორმაცია განთავსდება საქართველოს ფინანსთა სამინისტროს მომსახურების სააგენტოს ვებ-გვერდზე:  eauction.ge  ინფორმაცია გამოქვეყნდება, ასევე, ხარაგაულის მუნიციპალიტეტის ა(ა)ი.პ. მოქალაქეთა ჩართულობისა და ინფორმირების მუნიციპალური ცენტრის გაზეთ „ახალ ხარაგაულში.“    

ხარაგაულის მუნიციპალიტეტის მერიის ორგანიზებითა და ფინანსური მხარდაჭერით „პოლიტიკური ბრენდინგისა და პრობლემების მართვის ცენტრის“ წარმომადგენელმა, თამარ ჩიბურდანიძემ ერთდღიანი ტრენინგი ჩაუტარა მერიის სამსახურებისა და განყოფილების უფროსებს, ასევე ა(ა)იპ-ის დირექტორებს. ანგარიშის მომზადება, ეფექტური პრეზენტაცია და პროექტების წერის თანამედროვე ტექნოლოგიები - ეს ის თემებია, რომლის შესახებაც  ტრენერმა შეხვედრაზე ისაუბრა.  ტრენინგის დასასრულს თამარ ჩიბურდანიძემ მსმენელებს სერტიფიკატები გადასცა.       

ხარაგაულის მუნიციპალიტეტში სოფლის მხარდაჭერის პროგრამის ფარგლებში სოფლის კრებების გამართვა დაიწყო. 1 თებერვლიდან 28 თებერვლის ჩათვლით ხარაგაულის ყველა სოფელში გაიმართება კრება, სადაც ადგილობრივი მოსახლეობა განსაზღვრავს თუ რა პროექტი განხორციელდება მათ სოფელში გამოყოფილი თანხით. გამომდინარე აქედან, მნიშვნელოვანია მოსახლეობის აქტიურობა, რათა უმრავლესობის გადაწყვეტილებით მოხდეს პრიორიტეტების შერჩევა. დღეს სოფლის კრება ბაზალეთის ადმინისტრაციულ ერთეულში შემავალ ოთხ სოფელში გაიმართება: ბაზალეთი - 11:00 საათი; ქროლი - 13:00 საათი; ღარიხევი - 15:00 საათი; წიფი - 17:00; შეგახსენებთ, რომ სოფლის მხარდაჭერის პროგრამა 2019 წლიდან განახლდა. სოფლის კრებების განრიგი.

 დღეს ხარაგაულის მუნიციპალიტეტის საკრებულოს ბიუროს სხდომა გაიმართა. სხდომაზე პირველი საკითხი მერიის ადმინისტრაციის სამსახურის უფროსმა კახაბერ გოლუბიანმა წარადგინა. მისი ინფორმაციით  ქუთაისში ა(ა)იპ „იმერეთის ადგილობრივი ტურიზმის მართვის ორგანიზაცია“უნდა დაფუძნდეს, რომელშიც იმერეთის ყველა მუნიციპალიტეტი იქნება გაერთიანებული.  კახაბერ გოლუბიანის განცხადებით ზემოთ აღნიშნულ ა(ა)იპ-ს ხარაგაულის მუნიციპალიტეტიდან ეყოლება ერთი მუდმივი წევრი, რომელიც იმუშავებს მუნიციპალიტეტში ტურისტული პოტენციალის გაზრდის საკითხებზე. ბიუროს წევრები დაინტერესდნენ საწევროზე წელიწადში რა თანხა იქნება გადასახადი და როგორ შეირჩევა ა(ა)იპის მუდმივი წევრი.  კახაბერ გოლუბიანის განმარტებით ამ ეტაპზე ზუსტად არ არის ცნობილი თუ რა თანხა იქნება საწევროზე გადასახადი , თუმცა წინასწარი ვარაუდით თანხა 9 000 ლარიდან 10 000 ლარამდე იქნება. მისივე განცხადებით თუ ვინ დაინიშნება ა(ა)იპ-ის მუდმივი წევრის თანამდებობაზე ჯერ-ჯერობით უცნობია, ვინაიდან  წევრის წარდგენის უფლება აქვს როგორც მერიას, ისე არასამთავრობო ორგანიზაციას ან კერძო სექტორის წარმომადგენლებს. ფრაქცია თვითმმართველობა ხალხისთვის თავმჯდომარემ, ინგა მაღრაძემ აღნიშნა, რომ დიდი მნიშვნელობა აქვს თუ ვინ დაინიშნება ა(ა)იპ-ში, რადგან მუნიციპალიტეტში ტურიზმის განვითარებას დიდი მნიშვნელობა აქვს და საჭიროა ეს თანამდებობა აქტიურმა ადამიანმა დაიკავოს, რათა ტურისტული პოტენციალის გაზრდაზე იზრუნოს. სხდომაზე მერიის ეკონომიკისა და ქონების მართვის სამსახურის უფროსმა, ჯაბა ბერაძემ წარმოადგინა საკითხი სოფელ სარგვეშის საჯარო სკოლის პირველ სართულზე მდებარე 63.84 კვმ ფართის „მზაობის ჯგუფის“ ფუნქციონირებისათვის უსასყიდლო-უზუფრუქტის წესით 3 წლის ვადით გადაცემასთან დაკავშირებით. საკრებულოს თავმჯდომარის, მანანა ბარბაქაძის განცხადებით, აღნიშნული საკითხის წარდგენა გვიანია და ამაზე ადრე უნდა ეზრუნა ეკონომიკისა და ქონების მართვის სამსახურს, ვინაიდან „მზაობის ჯგუფი“ 5 თვეა რაც სარგვეშის საჯარო სკოლაში ფუნქციონირებს. ჯაბა ბერაძის განმარტებით 2018 წლის 28 სექტემბერს აღნიშნული ფართი გადმოეცა მერიას. სხდომაზე ასევე განიხილეს ხარაგაულის მუნიციპალიტეტის საკრებულოს 2018 წლის 5 თებერვლის №5 დადგენილებაში ,,ხარაგაულის მუნიციპალიტეტის ტერიტორიაზე რეგისტრირებულ სოციალურად დაუცველ და მძიმე ეკონომიკური პირობების მქონე მოქალაქეებზე და ამ წესით განსაზღვრულ სხვა პირებზე მატერიალური დახმარების გაცემის წესის დამტკიცების შესახებ’’ცვლილების შეტანის თაობაზე საკითხი. ცვლილებასთან  დაკავშირებით ინფორმაცია ჯანმრთელობისა და სოციალური დაცვის სამსახურის უფროსმა ნანა კიკნაძემ წარადგინა. ნანა კიკნაძის განმარტებით, შაქრიანი დიაბეტისა და გულსისხლძარღვთა დაავადებულ პაციენტებზე მედიკამენტების შესაძენად მოქმედებს სახელმწიფო პროგრამა და ამ მედიკამენტების შეძენა მუნიციპალიტეტის სოციალური  პროგრამებიდან ამოღებულია. მისივე განცხადებით სოციალურ პროგრამებს დაემატა განსაკუთრებით მძიმე შეზღუდვის მქონე შშმ პირების დახმარება, რომლებიც საჭიროებენ მუდმივ მომვლელს ან მეთვალყურეს და არ არიან სოციალური შემწეობის მიმღები, მათ თვეში 30 ლარის ოდენობით დაეხმარება მუნიციპალიტეტის მერია. ბიუროს სხდომაზე განხილულ საკითხებზე მსჯელობა საკრებულოს  კომისიებში გაგრძელდება,  ხოლო  საბოლოო გადაწყვეტილება 4 თებერვლის საკრებულოს სხდომაზე გახდება ცნობილი.      

 ხარაგაულის მუნიციპალიტეტის მერი, ნიკოლოზ თოფურიძე, სოფლის მოსახლეობისთვის ანგარიშის ჩაბარებას განაგრძობს.   28 იანვარს, მერი, ერთ წლიანი ანგარიშით, კიცხის, ვარძიის, წყალაფორეთის და ხიდრის ადმინისტრაციული ერთეულის მოსახლეობას შეხვდა.   „ჩემი ვალია, მოსახლეობას გავაცნო, რა გავაკეთეთ ერთი წლის განმავლობაში, როგორ იმუშავა მერიის სამსახურებმა, რა პრობლემები გვაქვს, რა გამოწვევების წინაშე ვდგავართ და რა გვაქვს დაგეგმილი მომავალში“- აღნიშნა შეხვედრაზე ნიკოლოზ თოფურიძემ და საუბრის დასაწყისში ყურადღება გაამახვილა იმ მთავარ გზავნილებსა და პრიორიტეტულ მიმართულებებზე, რაც ხარაგაულის განვითარებისთვის მკაფიოდ აქვს განსაზღვრული მერიას.  2018 წლის ანგარიშის მოხსენებითი ნაწილის დასრულების შემდეგ, შეხვედრა კითხვა პასუხის რეჟიმში წარიმართა. მოსახლეობა, ძირითადად, სოფლებში ინფრასტრუქტურის მოწესრიგებას და სასმელი წყლის პრობლემების მოგვარებას ითხოვს.  ხარაგაულის მერის ინფორმაციით, გზების მშენებლობა სოფლებში არის მერიის მთავარი პრიორიტეტი და პროექტი „გზა ყველა სოფელს“ წარმატებით ხორციელდება. 2019 წელს ასევე, პრიორიტეტულ მიმართულებად დასახელდა სასმელი წყლის პრობელემების მოგვარება სოფლებში, რისთვისაც ბიუჯეტში თანხები გათვალისწინებულია.

ხარაგაულის მუნიციპალიტეტის მერიაში მაღალმთიან დასახლებაში მცხოვრებთა სტატუსის მართვის საბჭოს რიგითი სხდომა გაიმართა. საბჭომ განიხილა მოქალაქეთა განაცხადებები – მაღალმთაინ დასახლებაში მუდმივად მცხოვრები პირის სტატუსის მინიჭების თაობაზე.  მაღალმთიან დასახლებაში მცხოვრებთა სტატუსის მართვის საბჭო განიხილავს ინდივიდუალურ განცხადებებს და გასცემს რეკომენდაციებს მაღალმთიან დასახლებაში მუდმივად მცხოვრები პირის სტატუსის მინიჭებისა და შეწყვეტის თაობაზე. საბოლოო გადაწყვეტილებას ხარაგაულის მუნიციპალიტეტის მერი იღებს და გამოსცემს შესაბამის ინდივიდუალურ ადმინისტრაციულ სამართლებრივ აქტს. მაღალმთიან დასახლებაში მცხოვრებთა სტატუსის მართვის საბჭოს სხდომის ოქმი იხილეთ ბმულზე        

ხარაგაულის სპორტისა და შიდა ტურიზმის ცენტრის (დირექტორი გრიგოლ ჭიპაშვილი) ინიციატივით ორგანიზაციებს შორის მინი ფეხბურთში  "ზამთრის თასის" ჩემპიონატი გაიმართა. დღეს ჩემპიონატის ფინალური შეხვედრა გაიმართა ხარაგაულის მუნიციპალიტეტის მერიასა და სპორტსკოლის გუნდებს შორის, რომელთა შორის სპორტსკოლის გუნდმა გაიმარჯვა და თასი მოიპოვა. ჩემპიონატში მონაწილეობას ღებულობდნენ „სპორტისა და შიდა ტურიზმის ცენტრის“, ხარაგაულის მერიის, ა(ა)იპ „კულტურისა და ხელოვნების ცენტრის“, ა(ა)იპ „კეთილმოწყობისა და დასუფთავების გაერთიანების“ და სატყეო სამსახურის გუნდები.      

25 იანვარს, იმერეთის სამხარეო ადმინისტრაციაში, გუბერნატორი, მერებს და იმერეთის რეგიონში მომუშავე სამშენებლო კომპანიების წარმომადგენლებს შეხვდა. ხარაგაულის მუნიციპალიტეტის მერი, ნიკოლოზ თოფურიძე აღნიშნული შეხვედრის შესახებ ხარაგაულის მოსახლეობას მიმართავს: „მინდა დეტალურად განვუმარტო მოსახლეობას რა სახის შეხვედრა იყო სამხარეო ადმინისტრაციაში. ინფრასტრუქტურის განვითარებისთვის ასეთი ფორმატის შეხვედრები და აქტიური დიალოგი მშენებელ კომპანიებთან არის სწორი ფორმა, რომელიც აპრობირებულია მაღალგანვითარებად ქვეყნებში და სახელმწიფოსა და კერძო სექტორს შორის ურთიერთ თანამშრომლობის გაღრმავებას ისახავს მიზნად. ეს უკანასკნელი კი, პროექტების ვადების დაცვითა და მაღალი ხარისხით შესრულების საწინდარია.   მხარის რწმუნებულმა, შავლეგო ტაბატაძემ დეტალურად მოისმინა იმერეთის 12-ივე მუნიციპალიტეტში 2019 წელს განსახორციელებელი პროექტების შესახებ ინფორმაცია. რასაც ასევე, დეტალურად გაეცვნენ მშენებლები.  მხარის რწმუნებულის შეფასებით, ამ მხრივ ხარაგაულის მუნიციპალიტეტში კარგი მდგომარეობაა, რაც იმაში გამოიხატება, რომ, ჩვენ, 15 ინფრასტრუქტურულ პროექტზე, რისთვისაც რეგიონული განვითარების ფონდიდან 3 670 000 ლარი გამოიყო, სამშენებლო ტენდერები უკვე გამოცხადებული გვაქვს.  ველოდებით დაფინანსების მეორე ლოტს, რისთვისაც 6 პროექტი უკვე მზადაა და მერიის ინფრასტრუქტურის სამსახური სრული დატვირთვით მუშაობს, რაც შეიძლება მოკლე დროში შეიძინოს დამატებით პროექტები, რათა არ დავკარგოთ დრო და გაზაფხულიდან, საგზაო ინფრასტრუქტურის მშენებლობა ხარაგაულში აქტიურ ფაზაში შევიდეს.“  შეხვედრაზე საუბარი შეეხო ასევე, 2018 წელს დაუსრულებელ ინფრასტრუქტურულ პროექტებს, რის შესახებაც მხარის გუბერნატორმა მშენებელ კომპანიებს პროექტების მოკლე ვადებში დასრულებისკენ მიუთითა, წინააღმდეგ შემთხვევაში მათ ხელშეკრულებები შეუწყდებათ.  პირადად მქონდა  შეხვედრა ხარაგაულში საგზაო ინფრასტრუქტურის მშენებელი კომპანიების წარმომადგენლებთან და მივიღე პირობა, რომ მარტის თვეში, მუნიციპალიტეტში, ამჟამად მიმდინარე პროექტები დასრულებული იქნება.  მინდა აღვნიშნო, რომ ინფრასტრუქტურის მშენებლობაში არსებული პრობლემების გამო მერია თითს არ იშვერს არცერთი უწყებისკენ, როგორც ამის შესახებ აპელირებენ. ჩვენ ღიად ვსაუბრობთ იმ ხელისშემშლელ გარემოებებზე და არსებულ ხარვეზებზე, რაზეც მერიასთან ერთად თავის წილი პასუხისმგებლობა აკისრია, როგორც საკრებულოს ასევე სახელმწიფოს.   მთავარი არის ერთი, 2 წელიწადში ჩვენ მივიღეთ 50-ზე მეტ სოფელში მოწესრიგებული სოფლის ცენტრალური გზა და მინდა სრული პასუხისმგებლობით განვაცხადო რომ პროექტი „გზა ყველა სოფელს“ წარმატებით ხორციელდება და ასე გაგრძელდება მომავალშიც“- ნათქვამია მუნიციპალიტეტის მერის მიმართვაში.