ხარაგაულის მუნიციპალიტეტის მერიაში მაღალმთიან დასახლებაში მცხოვრებთა სტატუსის მართვის საბჭოს რიგითი სხდომა გაიმართა. საბჭომ განიხილა მოქალაქეთა განაცხადებები – მაღალმთაინ დასახლებაში მუდმივად მცხოვრები პირის სტატუსის მინიჭების თაობაზე.  მაღალმთიან დასახლებაში მცხოვრებთა სტატუსის მართვის საბჭო განიხილავს ინდივიდუალურ განცხადებებს და გასცემს რეკომენდაციებს მაღალმთიან დასახლებაში მუდმივად მცხოვრები პირის სტატუსის მინიჭებისა და შეწყვეტის თაობაზე. საბოლოო გადაწყვეტილებას ხარაგაულის მუნიციპალიტეტის მერი იღებს და გამოსცემს შესაბამის ინდივიდუალურ ადმინისტრაციულ სამართლებრივ აქტს. მაღალმთიან დასახლებაში მცხოვრებთა სტატუსის მართვის საბჭოს სხდომის ოქმი იხილეთ.      

ზვარეში არსებული პრობლემების გადასაჭრელად, დღეს, ხარაგაულის ადგილობრივი თვითმმართველობის წარმომადგენლებსა და ადგილობრივ მოსახლეობას შორის შეხვედრა შედგა. შეხვედრაზე საუბარი შეეხო მოლითი-ზვარეს ამორტიზებულ გზას, რომელიც სარკინიგზო მაგისტრალის მშენებლობის პროცესში ჩინურმა კომპანიამ დააზიანა. მოსახლეობამ, ასევე, ისაუბრა ზვარე-ქვიშხეთის სარკინიგზო გვირაბით სარგებლობაზე, რაც იქაური მაცხოვრებლებისთვის მნიშვნელოვანი შეღავათი იქნება. მერის პირველი მოადგილის, არჩილ მაღრაძის ინფორმაციით, ადგილობრივი თვითმმართველობის წარმომადგენლები ესაუბრნენ ჩინურ მხარეს და მიაღწიეს შეთანხმებას, რომ გზას რეაბილიტაციას თავად ჩაუტარებენ. რაც შეეხება სოფლის ცენტრალურ და საუბნო გზებს, ვიდრე ბეტონის საფარის მოწყობა დაფინანსდება, მოსახლეობამ გარკვეული მონაკვეთების დროებით შეკეთება მოითხოვა, რაზეც ვიცე მერმა განაცხადა, რომ შესაძლებლობის ფარგლებში, უმოკლეს დროში მოგვარდება მათი პრობლემა. არჩილ მაღღაძემ სოფლის ცენტრალური გზის მობეტონებაზეც ისაუბრა და აღნიშნა, რომ ზვარე მაღალმთიანი დასახლების სტატუსის მქონე სოფელია და სასოფლო გზის კაპიტალური რეაბილიტაციისთვის თანხა მთის განვითარების ფონდიდან უნდა გამოიყოს. შეხვედრაზე ისაუბრეს, ასევე, ზვარე-ქვიშხეთის სარკინიგზო გვირაბით სარგებლობის საჭიროებაზეც. მერის მოადგილემ, თემურ ჩხეიძემ აღნიშნა, რომ ის პირადად ესაუბრა ჩინურ მხარეს, რომელთანაც შედგა შეთანხმება შემდეგზე: სოფელში იქნება ერთი საშვი, რომელიც ექნება მერის წარმომადგენელს და განსაკუთრებულ შემთხვევებში ისარგებლებენ აღნიშნული გვირაბით.

3 აპრილს ხარაგაულის მუნიციპალიტეტის მერმა, ნიკოლოზ თოფურიძემ სოფელ ღუდუმექეთში საგზაო ინფრასტრუქტურის მშენებლობის მიზნით შპს „გურია-2015“-თან გაფორმებულ ხელშეკრულებას მოაწერა ხელი. სოფელ ღუდუმექეთში ცენტრალურ გზის 1კმ-მდე ამორტიზებულ მონაკვეთს  ჩაუტარდება კაპიტალური რეაბილიტაცია. პროექტს რეგიონული განვითარების ფონდი 78 394 ლარით დააფინანსებს.      

2 აპრილი აუტიზმის ცნობადობის ამაღლების საერთაშორისო დღეა. ხარაგაულში აუტისტური სპექტრის მატარებელი სოსო კვირიკაშვილი სოფელ ღარიხევში ცხოვრობს. სოსო 9 წლისაა, კვირაში 3 დღე სკოლაში, ხოლო ორი დღე დღის ცენტრ „ორიონში“ დადის.  სოსოს ხარაგაულის მუნიციპალიტეტის მერის მოადგილე, არჩილ მაღრაძე და მერიის ჯანდაცვისა და სოციალური დაცვის სამსახურის უფროსი, ნანა კიკნაძე ესტუმრენ და საჩუქრად ილუსტრირებული წიგნი გადასცეს. აუტიზმის მსოფლიო დღის აღნიშვნის მიზანია, გაზარდოს საზოგადოების ცნობიერების დონე აუტიზმთან დაკავშირებით. ასევე, ხელი შეუწყოს აუტიზმის მქონე ადამიანების ფუნდამენტური უფლებების დაცვასა და რეალიზაციას. საქართველოში ზუსტი სტატისტიკა აუტისტი ბავშვების რაოდენობის შესახებ არ არსებობს, ამერიკის დაავადებათა კონტროლის და პრევენციის ცენტრის მონაცემებით კი, ყოველ 88 ბავშვში ერთი აუტისტია.

დღეს სარკინიგზო მაგისტრალის მოდერნიზაციის პროექტის ფარგლებში, ზესტაფონი-ხარაგაულის მონაკვეთის საპროექტო ნაწილში, შეტანილ ცვლილებებზე პროექტის საჯარო განიხილავა მოეწყო. პროექტის საჯარო განხილვაზე, შ.პ.ს „გამაკონსტალტინგის“ გარემოს დაცვით პროექტების კოორდინატორმა, ჯუღული ახვლედიანმა მშენებლობის პროექტზე და გარემოს ზემოქმედების შეფასების ანგარიშის შესახებ ისაუბრა. ჯუღული ახვლედიანის განმარტებით, 2012 წელს დამტკიცებული პროექტი გეოლოგიური კვლევების საფუძველზე გარკვეულწილად შეიცვალა და შეტანილი ცვლილებებთან დაკავშირებით, კანონმდებლობის შესაბამისად, საჭირო გახდა პროექტის საჯარო განხილვა. როგორც საჯარო განხილვაზე აღინიშნა მცირედით შეიცვალა პროექტის ტექნიკური პარამეტრები, კერძოდ ლიანდაგის ტრასა, (დერეფანი) გვირაბების შესასვლელი პორტალები და დერეფნის კონფიგურაცია. რაც შეეხება განსახლების საკითხს, რომელთან დაკავშირებით მოსახლეობის მხრიდან დიდი ინტერესი გამოიკვეთა,  ამ მიმართულებით ცვლილებები არ არის მოსალოდნელი. საჯარო განხილვის პროცესში დაისვა კითხვები მშენებლობის პროცესთან დაკავშირებულ პრობლემებზე, რომელიც იწვევს ხმაურს, მტვერს და გეოლოგიურ პრობლემებს. როგორც  ჯუღული ახვლედიანი განმარტავს, ხმაურთან დაკავშირებით უახლოეს საცხოვრებელ სახლებს ნახავენ  და თუ საჭიროდ ჩათვლიან გამოყენებულ იქნება დამცავი ბარიერები.  „ზესტაფონ- ხარაგაულის მონაკვეთზე გეოლოგიური პრობლემა სერიოზულია ძირულასა და შორაპანში, ასევე არის ქვათა ცვენის საშიშროებაც. საზოგადოების მხრიდან ყურადღება უნდა მიექცეს  წყლებს, თუ როგორ მართავს მშენებელი კომპანია. წყლის დაბინძურების შემთხვევაში აუცილებლად უნდა ეცნობოს გარემოს დაცვის სამინისტროს. სერიოზული პრობლემაა ნარჩენების მართვასთან დაკავშირებით. მშენებელ კომპანიას აქვს ვალდებულება, რომ პროქტის დასრულების შემდეგ პირვანდელი მდგომარეობასთან მიახლოებით დატოვონ სამშენებლო ბანაკები, გზები და სანაყაროების მიმდებარე ტერიტორიები.“ როგორც შ.პ.ს სააქციო საზოგადოება რკინიგზის წარმომადგენელმა, ნინო ჩობანიამ განმარტა  სარკინიგზო მაგისტრალზე სამუშაოების ძირითადი ნაწილი დასრულებულია. „პროექტის ფარგლებში, ზესტაფონი ხარაგაულის მონაკვეთზე დაგეგმილია ვაკისებისა და სამი ახალი ხიდის მშენებლობა. პროექტი საბოლოოა და  არ შეიცვლება თუ ცვლილება  საავტომობილო გზის მშენებლობამ არ გამოიწვია“. განმარტა ქალბატონმა ნინომ. საჯარო განხილვის ორგანიზატორი გახლდათ საქართველოს გარემოს დაცვისა და სოფლის მეურნეობის სამინისტრო, რომლსაც დაბა ხარაგაულისა და სოფელ ჯაფაროულის მოსახლეობა ესწრებოდა.

1 აპრილს ხარაგაულის მუნიციპალიტეტის საკრებულოს მორიგი სხდომა გაიმართა. სხდომაზე დეპუტატებმა დღის წესრიგით გათვალისწინებული რამდენიმე საკითხი განიხილეს. მათ შორის გახლდათ საკითხი ხარაგაულის მუნიციპალიტეტის საკრებულოს 2018 წლის 14 დეკემბრის N48 დადგენილებაში „ხარაგაულის მუნიციპალიტეტის თვითმმართველი ერთეულის 2019 წლის ბიუჯეტის დამტკიცების  შესახებ“ ცვლილების შეტანის შესახებ. საკრებულოს წევრებს საბიუჯეტო ცვლილება სახაზინო საბიუჯეტო დაგეგმარების  განყოფილების უფროსმა, ნინო მაღლაკელიძემ წარუდგინა. საკითხების განხილვამდე,  ფრაქციის „ძალა ერთობაშია“ თავმჯდომარემ, თორნიკე ავალიშვილმა სასწრაფო წესით მოითხოვა გარკვევა თუ სად წავიდა მერიისთვის ავტომობილის შესაძენად განკუთვნილი 43 ათასი ლარი.  მისი განცხადებით: „თებერვალში მხარი არ დავუჭირეთ მერიისთვის ავტომობილის შეძენის საკითხს და  ერთობლივი გადაწყვეტილებით მერიას  საკითხი უკან დავუბრუნეთ, რათა  ავტომობილის შესაძენად განკუთვნილი - 43 ათასი ლარი  უფრო პრიორიტეტული საკითხის მოსაგვარებლად მიმართულიყო. ავტომობილის შეძენისთვის ბიუჯეტში იყო თანხა, ახლა ეს თანხა, რომ გადმოვიტანოთ სოციალურად გაჭირვებული მოქალაქეების ერთჯერად დახმარების პროგრამაში, რა უშლის ხელს?!. საკითხთან დაკავშირებით უკვე ერთი თვეა  წერილობით მივმართე მერიას, დღეს, გვეცნობა წერილობით, რომ თურმე საკითხს მერია ერთ თვეში განიხილავს. მოვითხოვ, დღესვე, გაირკვეს, სად წავიდა ის თანხა, რომელიც მერიისთვის ავტომობილის შეძენისთვის იყო განკუთვნილი“ - განაცხადა საკრებულოს ოპოზიციონერმა დეპუტატმა. თორნიკე ავალიშვილის პოზიცია გაიზიარეს სხდომაზე მყოფმა დეპუტატებმაც და მას საკითხის დღის წესრიგში დამატებას დათანხმდნენ. სოციალური მიმართულებით დაფინასების გაზრდასთან დაკავშირებით განმარტება გააკეთა  მერის მოადგილემ, თემურ ჩხეიძემ: - „ სოციალური მიმართულებით დაფინანსება აუცილებლად გაიზრდება. ერთ თვეში უფრო  თვალსაჩინო იქნება თუ რომელი მიმართულებით არის პრიორიტეტული თანხების გაზრდა, სამედიცინო-გამოკვლევებისათვის თუ ერთჯერადი დახმარებებისთვის“. საბოლოოდ, დეპუტატები და მერიის წარმომადგენლები შეთანხმდნენ, რომ ამ ეტაპზე სოციალურ პროგრამების დაფინანსება  26 ათასი ლარით გაიზრდებოდა, რომელიც სოციალურად დაუცველი ოჯახების მკურნალობისა და  ერთჯერადი დახმარების ხარჯების ქვეპროგრამაში  მიიმართება. ნინო მაღლაკელიძის ინფორმაციით, საბიუჯეტო ცვლილება შეეხება და  საკუთარი სახსრების ნაშთიდან ბიუჯეტის ხარჯებში გადავა 27 700 ლარი. კერძოდ: 4000 ლარი - მუნიციპალიტეტის საკრებულოს ოთახების რემონტისათვის; 2800 ლარი-ა(ა)იპ დასუფთავებისა და კეთილმოწყობის გაერთიანებას - საკანალიზაციო სისტემის გამართული ფუნქციონირებისათვის - მაღალი წნევის ტუმბოსა და მილების შესაძენად; 5300 ლარი - ა(ა)იპ სპორტისა და შიდა ტურიზმის ცენტრს - წაგებული სასამართლო დავის აღსრულების ეროვნულ ბიუროში გადასახდელად; 8000 ლარი ა(ა)იპ კულტურისა და ხელოვნების ცენტრს - შეზღუდული შესაძლებლობების მქონე პირთათვის, კერძოდ უსინათლოთათვის, ბრაილის შრიფტით წერა-კითხვის სწავლებისა და საზოგადოებაში ინტეგრაციის ხელშეწყობისათვის 7600 ლარი ა(ა)იპ საზოგადოებრივი ჯანდაცვის ცენტრს გამოეყოს მ.შ. 4000 ლარი C ჰეპატიტზე, აივ-ინფექცია-შიდსზე და ტუბერკულოზზე ინტეგრირებული სკრინინგის უზრუნველსაყოფად და 3600 ლარი სველი წერტილების მოსაწესრიგებლად. ამავე სხდომაზე დეპუტატებმა, ასევე, ხარაგაულის მუნიციპალიტეტის მერიის სამხედრო აღრიცხვისა და გაწვევის სამსახურის ანგარიში მოისმიეს და დადებითად შეაფასეს.

2 აპრილს ხარაგაულის მუნიციპალიტეტის მერს ნიკოლოზ თოფურიძეს, ასევე, მერიის ინფრასტრუქტურისა და ქონების მართვის სამსახურების უფროსებს ცენტრალურ საავტომობილო მაგისტრალზე უბისა-შორაპნის (F3) მონაკვეთზე ავტობანის მშენებლობის მიზნით, ტენდერში გამარჯვებული კომპანია „China Road and Bridge Corporation“-ის წარმომადგენლები  შეხვდნენ.   მათი ინფორმაციით, ამ ეტაპზე, მშენებელი კომპანია სხვადასხვა ლოკაციაზე იწყებს ბაზების განთავსებას და ტექნიკის მობილიზებას. საგზაო ინფრასტრუქტურის მშენებლობა კი, მაისში დაიწყება. უბისა-შორაპნის მონაკვეთზე პროექტი, ცემენტ-ბეტონის 4 ზოლიანი 13 კმ-იანი გზის, 27 ხიდისა და 18 გვირაბის მშენებლობას ითვალისწინებს.  პროექტს ევროპის საინვესტიციო ბანკი აფინანსებს. სახელშეკრულებო ვადებით გზის მშენებლობა 2021 წელს უნდა დასრულდეს.    

ხარაგაულის მუნიციპალიტეტის სოფელ ვერტყვიჭალაში ახალი საბავშვო ბაღის ასაშენებლად ფართის გამოსაყოფად მუნიციპალიტეტის მერიას საქართველოს განათლების, მეცნიერების, კულტურისა და სპორტის სამინისტროდან პასუხი მოუვიდა. „სოფელ ვერტყვიჭალაში საჯარო სკოლის სარგებლობაში არსებული, საგანმანათლებლო საქმიანობისთვის გამოუყენებელი, სასოფლო-სამერუნეო დანიშნულების 1 410 კვ.მ მიწის ნაკვეთი საკუთრებაში გადაეცეს ხარაგაულის მუნიციპალიტეტის მერიას საბავშვო ბაღის აშენების მიზნით“ - ნათქვამია განათლების, მეცნიერების, კულტურისა და სპორტის სამინისტროს მიერ გამოგზავნილ წერილში.    სოფელ ვერტყვიჭალაში ახალ, თანამედროვე სტანდარტების შესაბამის ბაღს მუნიციპალური განვითარების ფონდი ააშენებს.         ამ ეტაპზე, საბავშვო ბაღის მომსახურებით  40 აღსაზრდელი სარგებლობს. მოგეხსენებათ, ცენტრალურ საავტომობილო მაგისტრალზე ავტობანის მშენებლობის მიზნით, სოფელ ვერტყვიჭალაში მოქმედი საბავშვო ბაღის ტერიტორიის გარკვეული ნაწილი წითელ ზოლში ხვდება, თავად ბაღის შენობა კი მოძველებული და სააღმზრდელო პროცესის ნორმალურად წარმართვისთვის თითქმის შეუსაბამოა.

დღეს ხარაგაულის მუნიციპალიტეტის საკრებულომ სოფლის მხარდაჭერის პროგრამის ფარგლებში დასაფინანსებელი პროექტები დაამტკიცა. პირველი თებერვლიდან 28 თებერვლის ჩათვლით, სოფლის საერთო კრება ჩატარდა ხარაგაულის მუნიციპალიტეტის 78 სოფელში, რომელსაც უშუალოდ ხარაგაულის მერი და მერის მოადგილეები წარმართავდნენ. მოსახლეობამ წინასწარ წარმოდგენილი საპროექტო წინადადებები სოფლის კრებებზე განიხილა და პრიორიტეტული საკითხები თავად აირჩია, რომელიც ზოგიერთ შემთხვევაში ღია, ხოლო ზოგიერთ შემთხვევაში ფარული კენჭისყრით აირჩა.   მარტის თვეში 78-ივე სოფელში მომზადდა პროექტები, გაკეთდა ხარჯთაღრიცხვა და წარედგინა საკრებულოს დასამტკიცებლად. საერთო ჯამში 192 პროექტიდან მეტი წილი წყლის სისტემებისა და საგზაო ინფრასტრუქტურის მოწესრიგებას, ასევე გარე განათების ქსელის მოწყობას და  წისქვილების რეაბილიტაციას გულისხმობს. სოფლის პროექტების განხორციელებაზე ტენდერები არ ცხადდება, სამუშაოები ერთ პირთან მოლაპარაკების გზით ჩატარდება. გაცნობებთ, რომ სოფლის მხარდაჭერის პროგრამა 2019 წელს განახლდა, რომლის ფარგლებში ხარაგაულს 860 000 ლარი გამოეყო.  

დღეს ხარაგაულის მუნიციპალიტეტის საკრებულომ მერიის ეკონომიკისა და ქონების მართვის სამსახურის შუალედური ანგარიში მოისმინა. დეპუტატებს 2018 წლის სექტემბრიდან 2019 წლის მარტამდე გაწეული საქმიანობის შესახებ ანგარიში სამსახურის უფროსმა, ჯაბა ბერაძემ წარუდგინა. სხდომაზე საკრებულოს ეკონომიკისა და ინფრასტრუქტურის და საფინანსო-საბიუჯეტო კომისიების თავმჯდომარეებმა კომისიების დასკვნები წარმოადგინეს. საფინანსო-საბიუჯეტო კომისიის თავმჯდომარემ, ვარლამ ჭიპაშვილმა აღნიშნა, რომ მერიის ეკონომიკისა და ქონების მართვის სამსახურს  ექვსი თვე ჰქონდა მიცემული ვადა, რათა გამოესწორებინა ის ხარვეზები, რაც წინა ანგარიშის წარმოდგენის დროს გამოიკვეთა, თუმცა ეს ხარვეზები დღეის მდგომარეობით აღმოფხვრილი არ არის. კერძოდ, დეპუტატი მუნიციპალური ქონების დაუსრულებელ ინვენტარიზაციასა და მუნიციპალიტეტის ეკონომიკური განვითარების გეგმის არარსებობაზე საუბრობს. სწორედ ზემოთ აღნიშნულიდან გამომდინარე, ვარლამ ჭიპაშვილმა, სამსახურის საქმიანობა უარყოფითად შეაფასა. მერიის ეკონომიკისა და ქონების მართვის სამსახურის უფროსი, ჯაბა ბერაძე არ ეთანხმება დეპუტატის მოსაზრებას და ხაზგასმით განმარტავს, რომ მუნიციპალიტეტში ქონების ინვენტარიზაცია დაწყებულია და ძალიან მარტივად შეუძლია ყველას მიმდინარე პროცესის ნახვა. „ეს არ არის მარტივად გასაკეთებელი პროცედურა, ჩვენ ვხელმძღვანელობთ ფინანსთა მინისტრის ბრძანებით, რომელიც საბიუჯეტო ორგანიზაციებში ინვენტარიზაციის ჩატარების წესს განსაზღვრავს, სადაც ასევე კონკრეტულადაა გაწერილი ვადები, ამიტომ ვერ დავეთანხმები, როდესაც მიზეზად  მოცემულ ვადას ასახელებენ. მუნიციპალიტეტის მასშტაბით ქონების აღწერა ექვს თვეში ვერ დასრულდებოდა. მთავარია, დავიწყეთ და ეს პროცესი წლის ბოლომდე დასრულდება. აღირიცხება და დაინიშნება ყველა მუნიციპალური ქონება“ - განმარტა ჯაბა ბერაძემ. რაც შეეხება ხარაგაულის ეკონომიკური განვითარების გეგმას, სამსახურის უფროსი აღნიშნავს, რომ  მუშაობა ამ მიმართულებითაც დაწყებულია. „მერია ჩართულია პროექტში „მერები ეკონომიკური ზრდისთვის“, რომელიც ევროკავშირის დაფინანსებით მუნიციპალიტეტებს ეხმარება გეგმის შემუშავებაში. მიმდინარეობს შეხვედრები კერძო სექტორის წარმომადგენლებთან, ბიზნესმენებთან და სხვადასხვა ორგანიზაციებთან. მათთან ერთად მიმდინარეობს ეკონომიკური განვითარების გეგმის შემუშავება და დასრულებისთანავე წარედგინება საკრებულოს დასამტკიცებლად“ - განაცხადა ჯაბა ბერაძემ.   საკრებულოს ფრაქციის - „ძალა ერთობაშია“ წევრი, ქეთევან ზუმბაძე სამსახურის საქმიანობას დადებითად აფასებს და აღნიშნავს, რომ ის არგუმენტები და შენიშვნები, რის გამოც დეპუტატები  სამსახურის ანგარიშს უარყოფითად აფასებენ არც წლების წინ იყო გათვალისწინებული, ანუ არ ჩატარებულა ინვენტარიზაცია, არ დაწერილა ეკონომიკური განვითარების გეგმა, მაგრამ მაშინ, რატომღაც იგივე დეპუტატები დადებითად აფასებდნენ აღნიშნული სამსახურის საქმიანობას. ოპოზიციონერი დეპუტატის აზრით, ეს შეფასება პიროვნული დამოკიდებულებებითაა გამოწვეული.  დადებითად აფასებს სამსახურის ანგარიშს პარტია  „შენების მოძრაობის“ დეპუტატი, მიხეილ ჭიპაშვილიც და ამბობს, რომ მათ უნდა მიეცეთ დრო, რათა დაწყებული საქმეები დაასრულონ. როგორც დეპუტატი განმარტავს, თუ წლიური ანგარიშის წარდგენის დროს ეს პროცედურა კიდევ არ იქნება დაწყებული დასრულებული მაშინ უფრო კრიტიკული იქნება.   ასევე, დადებითად შეაფასეს ქონების მართვის სამსახურის საქმიანობა პარტია „ევროპული საქართველოს“ წევრებმაც. პარტიის წევრი კაკო მაჭავარიანი აღნიშნავს, რომ შენიშვნები, რაც წინა ანგარიშზე გამოითქვა გამოსწორებულია, მუშაობა დაწყებულია და ამას დანახვა უნდა. ფრაქცია „ქართული-ოცნება დემოკრატიული საქართველოს“ თავმჯდომარე პაატა გოგოლაძე, უკმაყოფილოა მერიის ეკონომიკის და ქონების მართვის სამსხურის საქმიანობით და მიიჩნევს რომ მეტი მუშაობაა საჭირო.  „რა შენიშვნებიც წინა ანგარიშის წარმოდგენის დროს მივეცით, არ არის გათვალისწინებული. მათ ქონდათ დრო, თუმცა ვერ გამოასწორეს. დღეს სრული პასუხისმგებლობით ვაცხადებ, რომ  შევცდი, როცა წინა მოსმენისას სამსახურის საქმიანობა დადებითად შევაფასე“- განაცხადა პაატა გოგოლაძემ და მერიის ეკონომიკისა და ქონების მართვის სამსახურის შუალედური ანგარიში უარყოფითად შეაფასა.  საბოლოოდ სხდომაზე მყოფი 29 დეპუტატიდან მერიის ქონების მართვის სამსახურის საქმიანობა დადებითად შეაფასა - 6-მა, უარყოფითად - 19-მა, ხოლო თავი შეიკავა 4 -მა დეპუტატმა. დადებითად შეაფასა რუსუდან გიორგაძემ, ქეთევან ზუმბაძემ, ნიკოლოზ მაღრაძემ, აკაკი მაჭავარიანმა, დავით მაღლაფერიძემ და მიხეილ ჭიპაშვილმა.   თავი შეიკავა ნონა ზურაბიანმა, თორნიკე ავალიშვილმა და თემურ ფცქიალაძემ. უარყოფითად შეაფასა მანანა ბარბაქაძემ, ვარლამ ჭიპაშვილმა, პაატა გოგოლაძემ, ოთარ ლურსმანაშვილმა, კაკო ლურსმანაშვილმა, შალვა ლურსმანაშვილმა, გივი თხელიძემ, დავით კიკნაძემ, მარინე ხვედელიძემ, ია პაქსაშვილმა, ეკა შველიძემ, ბესო ტალახაძემ, დოდო ხაჩიძემ, ლადო ტალახაძემ, ზურაბ ხაჩიძემ, ლენა აბაშიძემ, ირაკლი ფერაძემ, იულონ კოპაძემ და მალხაზ ფხალაძემ.