შეხვედრა გაიმართა მერიაში იუსტიციის სამინისტროს სახელმწიფო სერვისების განვითარების სააგნეტოს წარმომადგენლებსა და მერიის თანამშრომლებს შორის. საუბარი შეეხო აღნიშნული სააგენტოს მიერ შემუშავებული მუნიციპალური მართვის სისტემის დანერგვას, რომელიც ხელს შეუწყობს მერიაში არსებული მუნიციპალური სერვისების ხარისხის ამაღლებას. ელექტრონული პროგრამა Mms (მუნიციპალური მართვის სისტემა) ამჟამად საქართველოს 55 მუნიციპალიტეტში მოქმედებს.  Mms - ელექტრონული სისტემის მეშვეობით მომხმარებელს შეუძლია სახლიდან გაუსვლელად, ელექტრონული პორტალის My.gov.ge - ს საშუალებით დაარეგისტრიროს განცხადება.  სახელმწიფო სერვისების განვითარების სააგენტოს წარმომადგენლების ინფორმაციით ისინი უახლოეს დღეებში პირად კონსულტანტს გამოაგზავნიან, რომელიც ადგილზე გადაამზადებს თანამშრომლებს.  Mms - ელექტრონული სისტემა იმუშავებს e-document -თან ერთად და მისი მომხმარებლები ძირითადად სოციალური, ინფრასტრუქტურის, ეკონომიკის და ზედამხედველობის სამსახურის თანამშრომლები იქნებიან. სისტემაში ჩაერთვება კანცელარიის განყოფილებაც.   

დღეს გამართულ საკრებულოს სხდომაზე, ხარაგაულის მერიის საფინანსო-საბიუჯეტო სამსახურის უფროსმა ვლადიმერ გელაშვილმა, ბიუჯეტის პირველი კვარტლის საპროგნოზო მაჩვენებლების შესრულების მდგომარეობის შესახებ ინფორმაცია წარადგინა. ინფორმაციის გაცნობის შემდეგ საფინანსო-საბიუჯეტო კომისიის თავმჯდომარემ, ვარლამ ჭიპაშვილმა კომისიის დასკვნა წარმოადგინა. მისი განცხადებით ბიუჯეტის პირველი კვარტლის შესახებ ინფორმაციაში მხოლოდ მშრალი ციფრებია წარმოდგენილი და იგი არ იძლევა სიღრმისეული შეფასების საშუალებას. ვარლამ ჭიპაშვილმა  ასევე შენიშვნები გამოთქვა  მუნიციპალიტეტში ინფრასტრუქტურული პროექტების შესრულების დაბალ ტემპზე და მეწარმეებისთვის წინასწარ გაცემულ ავანსებზე. მისი განცხადებით, 3 თვის მაჩვენებლით საგზაო ინფრასტრუქტურის მოსაწესრიგებლად დაგეგმილი სამუშაოების, დაახლოებით, 25%-მდე შესრულდა. დეპუტატმა ასევე აღნიშნა, რომ მუნიციპალიტეტის ბიუჯეტიდან წყალმომარაგების სისტემის მოსაწესრიგებლად ამ დრომდე არცერთი თეთრი არ გახარჯულა, არ გაუმჯობესებულა  მუნიციპალური ტრანსპორტით უზრუნველყოფის პროგრამა და მოუწესრიგებელია გარე განათების სისტემა. სხდომაზე ეკონომიკის, ქონების მართვისა და ინფრასტრუქტურის საკითხთა კომისიის თავმჯდომარემ, მალხაზ ფხალაძემ დამსწრე საზოგადოებას  კომისიის დასკვნა გააცნო და დაუსრულებელ ინფრასტრუქტურულ პროექტებზე ისაუბრა. დაუსრულებელ ინფრასტრუქტურულ პროექტებზე ისაუბრეს ასევე, დეპუტატებმა: ლადო ტალახაძემ, გივი ხიჯაკაძემ, ვახტანგ ტალახაძემ, ლენა აბაშიძემ, დოდო ხაჩიძემ და ფრაქციის „ძალა ერთობაშია“ თავმჯდომარე, თორნიკე ავალიშვილმა. მათ მიერ დასმულ კითხვებს  მერიის ინფრასტრუქტურის სამსახურის უფროსი, თემურ თაბუკაშვილი პასუხობდა. მან დეპუტატებს დეტალურად გააცნო რა ეტაპზეა ადმინისტრაციულ ერთეულებში საგზაო ინფრასტრუქტურის მშენებლობა და რა სანქციების გატარება  იგეგმება მუნიციპალიტეტის მხრიდან. თემური თაბუკაშვილის განცხადებით,  პროექტების შესრულების დაბალი მაჩვენებელი არაკეთილსინდისიერი მეწარმეებითაა გამოწვეული, რომლებმაც  ერთდროულად რამდენიმე ტენდერში გაიმარჯვეს და სამუშაოების შესასრულებლად არ გაზარდეს არც ტექნიკისა და არც მუშა ხელის რაოდენობა. „მეწარმეებს ხელშეკრულების ვადები გადაეწიათ და განესაზღვრათ საბოლოო ვადები, რომელიც როგორც სამხარეო ასევე შესაბამისი სამინისტროს წარმომადგენლებლთან შეთანხმებით გადაწყდა. თუ ამჯერადაც ვერ შეასრულებენ  ნაკისრ ვალდებულებებს, მათ ხელშეკრულება შეუწყდებათ.“ განმარტა სამსახურის უფროსმა. მიხეილ ჭიპაშვილის განცხადებით, ინფრასტრუქტურული პროექტები ფარცხნალის ადმინისტრაციულ ერთეულში ნორმალურ რეჟიმში სრულდება და ამ მიმართულებით სოფელში პრობლემები არ არის.  მან ყურადღება გაამახვილა მუნიციპალიტეტში კარიერების გამოყოფის მნიშვნელობაზე. მიხეილ ჭიპაშვილის თქმით, მოსახლეობამ სოფლის მხარდაჭერის პროგრამის ფარგლებში აირჩია სასოფლო გზის დახრეშვა, რის გამოც საჭიროა ზესტაფონში ჩავიდეს მეწარმე და იქ შეიძინოს საჭირო მასალა, რაც ძალიან ძვირი ჯდება.  3 თვის ბიუჯეტის შესრულებასთან დაკავშირებით აზრი გამოთქვა განათლების, კულტურის და ახალგაზრდულ საქმეთა კომისიის თავმჯდომარემ, დავით კიკნაძემ, რომელმაც აღნიშნა, რომ ხარაგაულში განათლებისა და კულტურის სფერო ერთ-ერთი წარმატებულია. მისი ინფორმაციით, მოსაწესრიგებელია ბორის სკოლა-პანსიონში არსებული საბავშვო ბაღი, რომელიც არ შედის სკოლამდელ დაწესებულებათა გაერთიანებაში. მან ასევე, ყურადღება გაამახვილა საბავშვო ბაღის აღმზრდელების დაბალ ანაზღაურებასთან დაკავშირებით.  სხდომაზე დეპუტატებმა ასევე განიხილეს საბიუჯეტო ცვლილება. აღნიშნულ საკითხთან   დაკავშირებით დეპუტატებმა მოითხოვეს ქორეოგრაფიულ ანსამბლ „უბისის“ ბაქოს საერთაშორისო ფესტივალში მონაწილეობისთვის დაფინანსების გაზრდა 5 000 ლარით. აღნიშნული მოთხოვნა მერიამ გაითვალისწინა, რის შედეგადაც ანსამბლი „უბისის“ გამგზავრება ქალაქ ბაქოში  10 000 ლარით გადაწყდა. სხდომაზე დეპუტატებმა მუხლობრივად უყარეს კენჭი და დაამტკიცეს სალოტბარო სკოლაში დასაქმებულთა ხელფასებისათვის 13 800 ლარით   დაფინასების საკითხი.  ასევე, ხარაგაულის ისტორიული მუზეუმისთვის ახალი ექსპონატების შეძენისთვის  და საგამოფენო დარბაზის განათებისთვის 10 000 ლარით სუბსიდირებისა და  ხარაგაულის სახალხო თეატრის ლატვიაში საერთაშორისო ფესტივალში მონაწილეთა ტრანსპორტირებისთვის  4 500 ლარით დაფინანსების საკითხები. სხდომაზე იმსჯელეს ასევე, სალოტბარო სკოლის ჩამოყალიბებასთან დაკავშირებით, საკითხი კულტურის სამსახურის უფროსმა, ირინე ჩხეიძემ წარადგინა, რომლის მიხედვითაც დეპუტატებმა თანხმობა მისცეს მერს, საქართველოს ფოლკლორის სახელმწიფო ცენტრსა და ხარაგაულის მუნიციპალიტეტის მერს შორის სალოტბარო სკოლის ჩამოსაყალიბებლად მემორანდუმის გასაფორმებლად. მუნიციპალიტეტის საკრებულომ ასევე, თანხმობა მისცა მუნიციპალიტეტის მერს იუსტიციის სამინისტროზე 1450 კვ.მ მიწის ფართობის 30 წლით უსასყიდლო-უზურფრუქტით გადაცემის საკითხს. როგორც სხდომაზე მომხსენებელმა მუნიციპალური ქონების აღრიცხვისა და მართვის განყოფილების უფროსმა, მაია ალავიძემ განაცხადა დაბა ხარაგაულში იუსტიციის სამინისტრო გეგმავს საზოგადოებრივი ცენტრის მშენებლობას, რისთვისაც სჭირდება აღნიშნული ფართი. სხდომაზე წარდგენილი საკითხები დეპუტატებმა დაამტკიცეს.    

ტრადიციული გვირილობის დღესასწაული აღინიშნა ქუთაისში 2 მაისს. ქალაქი მთელი დღის განმავლობაში დატვირთული იყო სხვადასხვა კულტურულ-საგანმანათლებლო და სოციალური ღონისძიებებით. გვირილობის ერთ-ერთი შემადგენელი ნაწილი - იმერეთის სახალხო დღესასწაული, მუხნარის ტყეში აღინიშნა, სადაც იმერეთის 12-ივე მუნიციპალიტეტთან ერთად, მერიის კულტურის სამსახურის ორგანიზებით, ხარაგაული ქართული ხალხური რეწვის ნიმუშებითა და ტრადიციული იმერული სამზარეულოთი წარსდგა. ხარაგაულის ფოტო-ვიდეო სალონმა, ქუთათურებს, სპეციალურად ამ დღის სიმბოლოებით გამოსახული საკუთარი ნაწარმი შესთავაზა.  მუხნარის ტყეში გამართულ კონცერტში მონაწილეობა მიიღო ხარაგაულის კულტურის ცენტრის ფოლკლორულმა ანსამბლმა „უბისმა“, რომელთაც „იმერული სატრფიალო“ და „ლეჩხუმური სახუმარო“ შეასრულეს. მუხნარის ტყეში ასევე, მთელი დღის განმავლობაში მიმდინარეობდა სპორტული შეჯიბრებები და მუსიკალური პერფორმანსები.  სახალხო დღესასწაულს ქუთაისში ხარაგაულის მუნიციპალიტეტის მერი, ნიკოლოზ თოფურიძე და მოადგილე, თემურ ჩხეიძე დაესწრნენ. 

ხარაგაულის მუნიციპალიტეტის საკრებულოს  ბიუროს რიგგარეშე სხდომაზე დღის წესრიგით გათვალისწინებული ორი საკითხი განიხილეს. მერიის საფინანსო-საბიუჯეტო სამსახურის უფროსმა, ვლადიმერ გელაშვილმა ბიუროს წევრებს ბიუჯეტის პირველი კვარტლის საპროგნოზო მაჩვენებლის შესრულების შესახებ ინფორმაცია და საბიუჯეტო ცვლილება გააცნო.   ანგარიშის მიხედვით ბიუჯეტის შემოსავლების გეგმა პირველ კვარტალში შესრულებულია  ჯარიმებიდან და არაფინანსური აქტივების კლებიდან, კერძოდ: სხვა შემოსავლების გეგმა  პირველ კვარტალში განისაზღვრა 252 800 ათასი ლარით,  ფაქტობრივად კი მიღებულია-568 500  ათასი ლარი. გეგმა შესრულებულია 224,9  პროცენტით. არაფინანსური აქტივების კლებიდან   შემოსულობები პირველ კვარტალში დაგეგმილი არ ყოფილა, ამ მუხლში კი, ფაქტობრივად  შემოსულია 9 600   ლარი, აქედან 4 600  ლარი ძირითადი ქონების გაყიდვიდან და 5 000   ლარი მიწების გაყიდვიდან. როგორც ვლადიმერ გელაშვილმა განმარტა პირველი კვარტლის ბიუჯეტი შემოსულობების ნაწილში განისაზღვრა 2 399.0 ათასი ლარით, ხოლო ფაქტობრივად მიღებულია 2 262.9  ათასი ლარი.  კვარტალური გეგმა შესრულებულია 94,3  პროცენტით. გადასახადებში  მუნიციპალიტეტს  დაგეგმილი 1590,1  ათასი ლარიდან მიღებული აქვს  1087,5 ათასი ლარი, გადასახადების კვარტლის გეგმა შესრულებულია  68,4  %-ით.    ბიუჯეტი ხარჯების ნაწილში განისაზღვრა 3853,9  ათასი ლარი, ფაქტობრივად  გაწეულია 2865,5  ათასი ლარი, ხარჯები დაფინანსებულია  74,4 %-ით. ბიუჯეტის სამი თვის შესრულების შესახებ ინფორმაციას საკრებულოს საფინანსო-საბიუჯეტო კომისიში დეტალურად განიხილავენ. დეპუტატები კი, ამის შესახებ ინფორმაციას  6 მაისის საკრებულოს სხდომაზე მოისმენენ. სხდომაზე, ასევე განხილული იყო საბიუჯეტო ცვლილება. ვლადიმერ გელაშვილის ინფორმაციით მთავრობის N815 განკარგულებით მაღალმთიანი დასახლების განვითარების  ფონდიდან ხარაგაულს  245 100 ლარი გოლათუბანში, სხევარისა და წიფის სადგურის უბნის გზის რეაბილიტაციისთვის გამოეყო. ასევე N986 განკარგულებით - 45 000 ლარი სტიქიის სალიკვიდაციო ღონისძიებების განსახორციელებლად. როგორც ვლადიმერ გელაშვილი განმარტავს, მუნიციპალიტეტის ტერიტორიაზე 30-31 მარტს მომხდარი ძლიერი ქარის შედეგად მიყენებული ზარალის აღმოსაფხვრელად 48, 500 ლარი გაიხარჯა, ამიტომ დამატებით 3 5000 ლარის მოძიება გახდა საჭირო, რომელიც შევსებულია გასული წლის ხიდების რეაბილიტაციის ხარჯებიდან. საბიუჯეტო ცვლილების თანახმად  ა(ა)იპ კულტურისა და ხელოვნების ცენტრის დამატებით 19 500 ლარი სჭირდება, კერძოდ მუზეუმის ახალი ექსპონატებისთვის 10 000 ლარი, ო. აბაშიძის სახელობის თეატრს ლატვიის ქალაქ რიგის თეატრალურ ფესტივალში მონაწილეობისათვის 4 500 ლარი და ანსამბლ „უბისს“ ბაქოში საერთაშორისო ფესტივალში მონაწილეობისათვის 5 000 ლარი. საფინანსო-საბიუჯეტო კომისიის თავმჯდომარემ, ვარლამ ჭიპაშვილმა აღნიშნა,  რომ საკრებულოზე წარდგენილი საკითხები სრულყოფილი არ არის. მისი განცხადებით  წარმოდგენილ ინფორმაციაში მხოლოდ მშრალი ციფრებია ნაჩვენები. „დეტალურად უნდა იყოს ასახული რამდენ ოჯახს შეუძინეთ ქარის მიერ დაზიანებული სახლებისთვის გადასახური მასალა და  რა რაოდენობის. ასევე არ არის დაკონკრეტებული რელიგიის მუხლიდან გაცემული თანხა 35 ათასი ლარი,  რა სამუშაოების განხორციელებას მოხმარდა, ისევე როგორც -ახალგაზრდულ ღონისძიებებზე გახარჯული თანხები რა ღონისძიებებს მოხმარდა “. აღნიშნულ მოსაზრებას დაეთანხმნენ ბიუროს დანარჩენი წევრებიც. რიგგარეშე ბიუროს სხდომაზე წარმოდგენილ  საკითხებს საკრებულო 6 მაისის სხდომაზე განიხილავს.

ხარაგაულის მუნიციპალიტეტის მერის, ნიკოლოზ თოფურიძის ანგარიში გაწეული საქმიანობის შესახებ! მერმა მუნიციპალიტეტის სოფლების მოსახლეობას 2018 წლის ანგარიში გააცნო.                             

დღეს ხარაგაულის მუნიციპალიტეტის საგანმანათლებლო რესურსცენტრში 2017-2018 სასწავლო წლის ოქროსა და ვერცხლის მედალოსანი მოსწავლეები დააჯილდოეს. შეხვედრას მუნიციპალიტეტის საკრებულოს თავმჯდომარე, მანანა ბარბაქაძე, მერის მოადგილე თემურ ჩხეიძე, განათლების, კულტურის და ახალგაზრდულ საქმეთა კომისიის თავმჯდომარე, დავით კიკნაძე, საფინანსო-საბიუჯეტო კომისიის თავმჯდომარე, ვარლამ ჭიპაშვილი, წარჩინებული მოსწავლეები და მათი მშობლები ესწრებოდნენ. საგანმანათლებლო რესურსცენტრის უფროსმა, მარინე ვეფხვაძემ და ადგილობრივი თვითმმართველობის წარმომადგენლებმა ოქროსა და ვერცხლის მედალოსან მოსწავლეებს მედლების გადაცემა მიულოცეს და წარმატებები უსურვეს. ხარაგაულის მასშტაბით სულ 25 ახალგაზრდა დაჯილდოვდა ოქროსა და ვერცხლის მედალით, აქედან 13 ოქროს  მედალოსანია. გოგა აბაშიძე - დაბის მე-2 საჯარო სკოლა (ოქროს  მედალი); ბერიკა ებანოიძე - დაბის მე-2 საჯარო სკოლა  (ოქროს  მედალი); კესო შარიქაძე - დაბის მე-2 საჯარო სკოლა (ოქროს მედალი); ლუკა თაბუკაშვილი - დაბის მე-3 საჯარო სკოლა (ოქროს მედალი); ამანდა ხვედელიძე - დაბის მე-3 საჯარო სკოლა (ოქროს  მედალი); ანა მაღრაძე - ვახანის საჯარო სკოლა (ოქროს მედალი); საბა გრიგალაშვილი - ხევის საჯარო სკოლა (ოქროს მედალი); სოსო გოგოლაძე - ვერტყვიჭალის საჯარო სკოლა (ოქროს მედალი); ლაშა ლურსმანაშვილი - ვერტყვიჭალის საჯარო სკოლა (ოქროს მედალი); გრიშელ გამრეკელაშვილი - კიცხის საჯარო სკოლა  (ოქროს მედალი); ერეკლე გამრეკელაშვილი - კიცხის საჯარო სკოლა (ოქროს მედალი); მეგი მიქაბერიძე - წმინდა ანდრია  პირველწოდებულის სახელობის სასულიერო გიმნაზია (ოქროს მედალი); ნათია რამინიშვილი - წმინდა ანდრია პირველწოდებულის სახელობის სასულიერო გიმნაზია (ოქროს მედალი); გიორგი ნიქაბაძე - დაბის მე-3 საჯარო სკოლა (ვერცხლის მედალი); ბორის ზვიადაძე - კიცხის საჯარო სკოლა (ვერცხლის მედალი); თამარ კურტანიძე - ვერტყვიჭალის საჯარო სკოლა (ვერცხლის მედალი); ნინო გელაშვილი - წმინდა ანდრა პირველწოდებულის სახელობის სასულიერო გიმნაზია (ვერცხლის მედალი); გიორგი ლომსაძე - წმინდა ანდრა პირველწოდებულის სახელობის სასულიერო გიმნაზია (ვერცხლის მედალი); ნინო რამიშვილი - წმინდა ანდრა პირველწოდებულის სახელობის სასულიერო გიმნაზია (ვერცხლი  მედალი); ეთერ ხიჯაკაძე - ვარძიის საჯარო სკოლა (ვერცხლის მედალი); მედეა ინასარიძე - ვახანის საჯარო სკოლა (ვერცხლის მედალი); მარიამ კვინიკაძე - წიფის საჯარო სკოლა (ვერცხლის მედალი); თამუნა ტალახაძე - წიფის საჯარო სკოლა ( ვერცხლის მედალი); თეონა ტალახაძე - წიფის საჯარ სკოლა (ვერცხლის მედალი); რომა გრიგალაშილი - ხევის საჯარო სკოლა (ვერცხლის მედალი).

1 მაისს ხარაგაულის მუნიციპალიტეტის საკრებულოს  ბიუროს  სხდომა გაიმართება. სხდომაზე დეპუტატები დღის წესრიგით გათვალისწინებულ შემდეგ 2 საკითხს განიხილავენ:   1. ხარაგაულის მუნიციპალიტეტის თვითმმართველი ერთეულის 2019  წლის ბიუჯეტის პირველი კვარტლის საპროგნოზო მაჩვენებლების შესრულების მდგომარეობის შესახებ ინფორმაცია; მომხს: ვლადიმერ გელაშვილი ხარაგაულის მუნიციპალიტეტის საკრებულოს 2018 წლის 14 დეკემბრის N48 დადგენილებაში „ხარაგაულის მუნიციპალიტეტის თვითმმართველი ერთეულის 2019 წლის ბიუჯეტის დამტკიცების  შესახებ“ ცვლილების შეტანის თაობაზე; მომხს: ვლადიმერ გელაშვილი აღნიშნული საკითხებს დეპუტატები 6 მაისის საკრებულოს მორიგ სხდომაზე, შემდეგ საკითხებთან ერთად, განიხილავენ: საქართველოს ფოლკლორის სახელმწიფო ცენტრსა და ხარაგაულის მუნიციპალიტეტის მერს შორის ხარაგაულის მუნიციპალიტეტში სალოტბარო სკოლის ჩამოსაყალიბებლად მემორანდუმის გასაფორმებლად თანხმობის მიცემის შესახებ; მომხს: ირინე ჩხეიძე თანამომსხ: გიორგი დონაძე ხარაგაულის მუნიციპალიტეტის საკრებულოს 2014 წლის 14 ივლისის N12 დადგენილებაში „ხარაგაულის მუნიციპალიტეტის საკრებულოს განათლების,  კულტურისა და ახალგაზრდულ  საქმეთა კომისიის დებულების დამტკიცების შესახებ“ ცვლილების შეტანის თაობაზე; მომხს: დავით კიკნაძე ხარაგაულის მუნიციპალიტეტის საკრებულოს 2014 წლის 14 ივლისის N13 დადგენილებაში „ხარაგაულის მუნიციპალიტეტის საკრებულოს იურიდიული სამანდატო, საპროცედურო  საკითხთა   და  ეთიკის   კომისიის დებულების დამტკიცების შესახებ“ ცვლილების შეტანის თაობაზე; მომხს: ოთარ ლურსმანაშვილი ხარაგაულის მუნიციპალიტეტის საკრებულოს 2014 წლის 14 ივლისის N14 დადგენილებაში „ხარაგაულის მუნიციპალიტეტის საკრებულოს საფინანსო - საბიუჯეტო  კომისიის დებულების დამტკიცების შესახებ“ ცვლილების შეტანის თაობაზე; მომხს: ვარლამ ჭიპაშვილი ხარაგაულის მუნიციპალიტეტის საკრებულოს 2014 წლის 14 ივლისის N15 დადგენილებაში „ხარაგაულის მუნიციპალიტეტის საკრებულოს ეკონომიკის, ქონების მართვისა  და ინფრასრტუქტურის საკითხების კომისიის დებულების დამტკიცების შესახებ “ ცვლილების შეტანის თაობაზე; მომხს: მალხაზ ფხალაძე    ხარაგაულის მუნიციპალიტეტის საკრებულოს 2014 წლის 14 ივლისის N16 დადგენილებაში „ხარაგაულის მუნიციპალიტეტის საკრებულოს საკრებულოს ჯანდაცვისა და სოციალურ საკითხთა კომისიის დებულების დამტკიცების შესახებ“ ცვლილების შეტანის თაობაზე;  მომხს: გივი თხელიძე ხარაგაულის მუნიციპალიტეტის საკრებულოს 2014 წლის 04 აგვისტოს #25 დადგენილებაში ’ხარაგაულის მუნიციპალიტეტის საკრებულოს აპარატის დებულების დამტკიცების შესახებ“ცვლილების შეტანის თაობაზე; მომხს: ოთარ ლურსმანაშვილი ხარაგაულის მუნიციპალიტეტის საკრებულოს 2016 წლის 1 თებერვლის N4 დადგენილებაში „დასახლების საერთო კრების ტიპური დებულების დამტკიცების შესახებ“ ცვლილების შეტანის თაობაზე;  მომხს: ოთარ ლურსმანაშვილი

ხარაგაულის მუნიციპალიტეტის მერთან, ნიკოლოზ თოფურიძესთან  „ფონდ ტასო“-ს (ქალთა ფონდი და მეხსიერების კვლევის ცენტრი) გენერალური დირექტორის მოადგილემ, ცისანა გოდერძიშვილმა და სოფელ თეთრაწყაროს ქალთა თვითდახმარების ჯგუფმა შეხვედრა გამართა. შეხვედრას ხარაგაულის მუნიციპალიტეტის მერის თანაშემწე გენდერულ და არასამთავრობო ორგანიზაციებთან ურთიერთობის საკითხებში, ინგა ბერაძე, მერის თანაშემწე, ლაშა გელაშვილი, ინფრასტრუქტურის სამსახურის უფროსი, თემური თაბუკაშვილი და საფინასო-საბიუჯეტო სამსახურის წარმომადგენელი, ნინო მაღლაკელიძე ესწრებოდნენ. როგორც შეხვედრაზე ცისანა გოდერძიშვილმა განმარტა, ფონდის მიზანი სოფლად მცხოვრები ქალბატონების გაძლიერებაა. თეთრაწყაროს ქალთა თვითდახმარების ჯგუფი ,,ფონდ ტასო“ -ს დახმარებით ჩამოყალიბდა, რომელიც სოფელში არსებულ საჭიროებებსა და პრობლემებს იკვლევს. „უნდა აღინიშნოს, რომ ძალიან აქტიური ჯგუფი შეიკრიბა, მათ უკვე დაიწყეს სოფლისთვის მნიშვნელოვანი პრობლემის გადაჭრაზე ზრუნვა, ისინი გრძნობენ თავიანთ წილ პასუხისმგებლობას და სოფლისთვის  მნიშვნელოვანი პრობლემების გადაჭრისთვის, პირველ რიგში, მზად არიან ადგილობრივ თვითმმართველობასთან სათანამშრომლოდ და ურთიერთობისთვის. ამ შემთხვევაში სოფლის უმთავრესი პრობლემა წყალია. სწორედ ამ პრობლემის მოგვარების გზებზე სასაუბროდ შედგა შეხვედრა მუნიციპალიტეტის მერთან“- აღნიშნა ცისანა გოდერძიშვილმა.  მუნიციპალიტეტის მერის, ნიკოლოზ თოფურიძის განმარტებით, სოფელ თეთრაწყაროს მოსახლეობის პრობლემას კარგად იცნობს. სოფლის მხარდაჭერის პროგრამის ფარგლებში, წყლის სათავე ნაგებობის მოსაწყობად გამოყოფილია 12 000 ლარი. ამას გარდა, სოფლებში წყლის პრობლემების მოსაგვარებლად, მუნიციპალიტეტის ბიუჯეტში გათვალისწინებულია თანხა. მას შემდეგ რაც პროექტი დასრულდება, მიზნობრივი თანხა დაიხარჯება და გაირკვევა თუ რა ეტაპზე იქნება პრობლემა მოგვარებული, ამის შემდეგ, მოგვმართეთ მოხსენებითი ბარათით და მუნიციპალიტეტის მერია შესაძლებლობების ფარგლებში გაგიწევთ დახმარებას“ - განაცხადა ნიკოლოზ თოფურიძემ. გაცნობითი ხასიათის შეხვედრაზე, სოფელ თეთრაწყაროში მცხოვრებმა ქალბატონებმა მუნიციპალიტეტის მერთან  მათთვის მნიშვნელოვან და მთავარ პრობლემაზე ისაუბრეს. სოფელს 35 წელია არ აქვს წყალი, და ის თითოეული ოჯახის პრობლემაა.  როგორც თვითდახმარების ჯგუფის ლიდერი, ნინო გველესიანი  აცხადებს, ჯგუფის წევრებს უკვე შეკრებილი აქვთ ხელმოწერები, ასევე, შედგენილია ცხრილები და პრობლემის მოსაგვარებლად მოსახლეობა ფიზიკური დახმარებით მზადაა. ინგა ბერაძე, მერის თანაშემწე გენდერულ საკითხებში: ,,ძალიან მნიშვნელოვანია, თითოეული ადამიანი გრძნობდეს თავის წილ პასუხისმგებლობას სოფლისთვის მნიშვნელოვანი პრობლემის გადაჭრის დროს. თეთრაწყაროს ქალთა თვითდახმარების ჯგუფი, რომელიც სულ ახლახან შეიქმნა არის კარგი მაგალითი იმის, თუ როგორ შეიძლება მოქალაქეების ჩართულობამ, პრობლემების გადაჭრის ეფექტური გზები გააჩინოს. ეს გაცნობითი ხასიათის შეხვედრა იყო, სოფელ თეთრაწყაროში მცხოვრებმა ქალებმა მუნიციპალიტეტის მერთან მათთვის მნიშვნელოვან და მთავარ პრობლემაზე ისაუბრეს. სოფელს 35 წელია არ აქვს წყალი, და ის თითოეული ოჯახის პრობლემაა.“

22-23 აპრილს ბორჯომ-ხარაგაულის ეროვნული პარკის კოტეჯში, სოფელ მარელისში, საქართველოს ეკოტურიზმის ასოციაციის წარმომადგენლებმა ტრადიციულ რეწვასთან დაკავშირებით ორდღიანი ტრენინგი გამართეს. პროექტი, რომლის ფარგლებში ადგილობრივ მოსახლეობას შესაძლებლობა ეძლევა განავითაროს მცირე ბიზნესი, საქართველოს ეკოტურიზმის ასოციაციის ორგანიზებითა და „USAID“ -ის ფინანსური მხარდაჭერით ხორციელდება. პროექტის მიზანია ბორჯომ-ხარაგაულის ეროვნული პარკის მიმდებარე ტერიტორიაზე არსებული თემების განვითარება, ტურისტული პოტენციალის წარმოჩენისა და პროდუქტის შექმნის კუთხით და ადგილობრივების ჩართვა ტურიზმის ინდუსტრიაში. ტრადიციული რეწვის პროდუქციის განვითარება, როგორ უნდა გაკეთდეს ბრენდინგი, შეფუთვა, პროდუქციის პოპულარიზაცია ადგილობრივ და საერთაშორისო ბაზარზე - ამ თემებთან დაკავშირებით მიმდინარეობდა ორდღიანი ტრენინგი პროექტის ბენეფიციარებისთვის. შეხვედრაზე იმყოფებოდნენ რეწვით დაინტერესებული პირები, როგორც ფარცხნალიდან და მარელისიდან, ასევე, ხარაგაულის მუნიციპალიტეტის სხვა სოფლებიდან. საქართველოს ეკოტურიზმის ასოციაციის წარმომადგენლის, ნატა რობიტაშვილის ინფორმაციით, ბენეფიციარებთან ინდივიდუალური კონსულტაციები მაისის დასაწყისში გაიმართება. შემდეგ დაიგეგმება საინფორმაციო ტურები და დაიბეჭდება ბუკლეტები, იმისათვის რომ შექმნილი პროდუქტები გახდეს ცნობადი და ინფორმაციულად ხელმისაწვდომი პოტენციური მომხმარებლისთვის.

“სახალხო უნივერსიტეტთა გერმანული ასოციაციის” ორგანიზებითა და მუნიციპალიტეტის მერიის მხარდაჭერით, ხარაგაულში, დღეს, პროფესიული სასწავლებელი - ზრდასრულთა განათლების ცენტრი, გერმანიის ფედერაციული რესპუბლიკის ელჩმა საქართველოში, ჰუბერტ ქნირშმა და ხარაგაულის მუნიციპალიტეტის მერმა ნიკოლოზ თოფურიძემ ოფიციალურად გახსნეს. ცენტრის ძირითადი მიზანია დაინტერესებულ პირებს საშუალება მისცეს უფასოდ დაეუფლონ თანამედროვე ბაზარზე მოთხოვნად პროფესიებს, გაიარონ პიროვნული განვითარებისა და პროფესიული განათლების კურსები, რაც გაზრდის მათი დასაქმების შანსს. ბენეფიციარებს, ასევე, შეუძლიათ უკვე არსებულ პროფესიაში ან ხელობაში აიმაღლონ კვალიფიკაცია და რეგიონებში პროფესიული კადრების ჩამოყალიბებაში მნიშვნელოვანი წვლილი შეიტანონ. ზრდასრულთა ცენტრის გახსნის ოფიციალურ ღონისძიებას, რომელშიც ხარაგაულის კულტურის ცენტრის ფოლკლორული და ქორეოგრაფიული ჯგუფები იღებდნენ მონაწილეობას, DVV International-ის კავკასიის, სამხრეთ-აღმოსავლეთ ევროპის და თურქეთის რეგიონული დირექტორი მაია ავრამოვსკა, DVV International-ის საქართველოს ოფისის დირექტორი, ლალი სანთელაძე,  ხარაგაულის ზრდასრულთა განათლების ცენტრის დირექტორი, გიორგი მუხურაძე, საკრებულოს თავმჯდომარე, მანანა ბარბაქაძე, ადგილობრივი თვითმმართველობისა და ბორჯომ-ხარაგაულის ეროვნული ტყე-პარკის  წარმომდგენლები ესწრებოდნენ. სახალხო უნივერსიტეტთა გერმანული ასოციაციის საერთაშორისო თანამშრომლობის ინსტიტუტის ინიციატივით, ზრდასრულთა განათლების ცენტრები საქართველოში  2006 წლიდან  ფუნქციონირებს.  ამჟამად, საქართველოს 7 რეგიონში 10 ცენტრი მუშაობს. ხარაგაულის პროფესიული სასწავლებელი კი, რიგით მეთერთმეტეა.   ხარაგაულის განათლების ახალ ცენტრში 70-მდე ბენეფიციარი ეუფლება სხვადასხვა პროფესიას. უკვე წარმატებით ფუნქციონირებს თექის, მაკრამეს, კულინარიის და ჭრა-კერვის კურსები. ცენტრში, ასევე, განთავსებულია სივრცეები მეფუტკრეობისა და კომპიუტერული პროგრამების სწავლების მსურველთათვის.    გერმანიის ელჩმა საქართველოში ჰუბერტ ქნირშმა მადლობა გადაუხადა ხარაგაულის მერს, ნიკოლოზ თოფურიძეს და ადგილობრივი თვითმმართველობის წარმომადგენლებს პროექტის განხორციელებაში შეტანილი წვლილისთვის. მუნიციპალიტეტის მერმა ხარაგაულელებს ახალი ზრდასრულთა განათლების ცენტრის  გახსნა მიულოცა და აღნიშნა, რომ ადგილობრივი თვითმმართველობის მხარდაჭერა ცენტრის ფუნქციონირებისთვის მომავალშიც გაგრძელდება.