7 ივნისს, გვიან ღამით, ძლიერი წვიმის შედეგად მნიშვნელოვნად დაზიანდა ხარგაულის მუნიციპალიტეტის სოფლები: მარელისი, ლეღვანი და დიდვაკე. ადიდებულმა მდინარე ჩხერიმელამ და ლეღვნულამ, ხარაგაულის სოფლებში მუნიციპალური და კერძო ინფრასტრუქტურა დააზიანა.  წაიღო  გზები და  ხიდები. დატბორა მოსახლეობის კარ-მიდამო. სტიქიის ზონაში მხარისა და ადგილობრივი თვითმმართველობის წარმომადგენლები იმყოფებოდნენ, მობილიზებული იყო ასევე სამაშველო ჯგუფები. იმერეთის მხარის რწმუნებულის პირველი მოადგილე, ზვიად შალამბერიძე და ხარაგაულის მერი, ნიკოლოზ თოფურიძე ადგილობრივ მოსახელობას  შეხვდნენ და პირადად გაეცნენ სტიქიის ზონაში არსებულ პრობლემებს. სტიქიის ზონაში  დაზიანებული ინფრასტრუქტურის აღდგენითი სამუშაოები ამ დრომდე ინტენსიურად გრძელდება. სპეც ტექნიკის საშუალებით  გაწმენდითი სამუშაოები მიმდინარეობს ლეღვანის, მარელისსა და  მოლითი-ჩუმათელეთის დამაკავშირებელ გზაზე, სადაც მეწყერია ჩამოწოლილი. შლამისგან და ნარჩენებისგან იწმინდება, როგორც საუბნო გზები ისე მოსახლეობის კარ-მიდამო. გაწმენდითი სამუშაოები უტარდება ასევე  მდინარე ლეღვნულას კალაპოტს. სტიქიის შედეგად გამოწვეულ ზარალს შესაბამისი კომისია ითვლის, რომელიც ამ დროისთვის უკვე მილიონ ლარს აჭარბებს. მერიაში ასევე შექმნილია საგანგებო შტაბი, რომელსაც მერი, ნიკოლოზ თოფურიძე ხელმძღვანელობს. როგორც ხარაგაულის მერი ნიკოლოზ თოფურიძე აღნიშნავს, ზარალის საბოლოო დადგენის შემდეგ, სტიქიის სალიკვიდაციო ფონდი გამოყოფს შესაბამის თანხას და სოფლებში დაზიანებული ინფრასტრუქტურის აღდგენითი სამუშაოები დაუყოვნებლივ დაიწყება.

ხარაგაულის მუნიციპალიტეტის მერიის კულტურის, განათლების, სპორტისა და ახალგაზრდობის საქმეთა სამსახურის ორგანიზებით, X-XI კლასის მოსწავლეთა შორის ტირის ჩემპიონატი გაიმართა. ტირის ჩემპიონატი ხარაგაულში წელს პირველად ჩატარდა, რამაც მოსწავლეებში დიდი დაინტერესება გამოიწვია.   შეჯიბრის გამარჯვებული წმიდა ანდრია პირველწოდებულის სახელობის გიმნაზიის მოსწავლე სანდრო ჭიპაშვილი გახდა. მეორე ადგილი მეორე საჯარო სკოლის მოსწავლე საბა ბერაძემ, ხოლო მესამე ადგილი ბორითის საჯარო სკოლის მოსწავლემ, საბა ბარბაქაძემ მოიპოვა. გოგონებს შორის ტურნირის გამარჯვებული ვახანის საჯარო სკოლის მოსწავლე ანი ინასარიძე გახდა. ჩემპიონატში მუნიციპალიტეტის მასშტაბით 60 მოსწავლე ჩაერთო.      

ხარაგაულის რეზო თაბუკაშვილის სახელობის სახალხო ლიტერატურული თეატრი და ხარაგაულის მოსწავლე-ახალგაზრდობის სახლი ხარაგაულის კინოთეატრში გამართავს ერთობლივ ღონისძიებას -  "მარადიული პიონერფილმელი, გრიშა მასწ...". ლიტერატურული წარმოდგენა  თბილისის მოსწავლე-ახალგაზრდობის სასახლის სტუდია "პიონერფილმის" ხელმძღვანელს, რეჟისორს, თეატრმცოდნეს, ოპერატორს, ჟურნალისტს, პედაგოგს, გრიგოლ ჩიგოგიძეს ეძღვნება. ამ დღეს გრიგოლ ჩიგოგიძესთან ერთად ხარაგაულს  "პიონერფილმის" აღსაზრდელები ეწვევიან. აღნიშნული ლიტერატურული წარმოდგენის პრემიერა, ხარაგაულის ლიტერატურულმა თეატრმა  თბილისში, 2 ივნისს, მოსწავლე-ახალგაზრდობის სასახლში გამართა, ღონისძიება12 ივნისს, ოთხშაბათს, 16:00 საათზე დაიწყება.

5 ივნისს ხარაგაულის კინოთეატრში  ოთარ აბაშიძის სახელობის სახალხო თეატრმა სპექტაკლის პრემიერა „ხორუმი ქართული ცეკვაა“ წარმოადგინა. სპექტაკლი გურამ დოჩანაშვილის პიესის მიხედვით მერიის კულტურის სამსახურის უფროსის, ირინე ჩხეიძის რეჟისორობით დაიდგა. პრემიერას კლასიკოსი მწერალი გურამ დოჩანაშვილი და თეატრმცოდნე ლაშა ჩხარტიშვილი ესწრებოდნენ. სპექტაკლი პატარა ქართულ ტრადიციულ სოფელში მცხოვრებ სხვდასხვა ასაკის, პროფესიის და ხასიათის ადამიანების ურთიერთობებზე ვითარდება. ერთი სოფლის მაგალითზე  კარგად ჩანს ქართული ხასიათი. სადაც პერსონაჟების საუბრები, ბჭობა, კამათი ქართველების დადებით და უარყოფით მხარეებს წარმოაჩენს. ეს ყველაფერი   სპექტაკლში იუმორით, კრიტიკითა და ირონიით არის გადმოცემული. პრემიერის დასასრულს, მწერალმა გურამ დოჩანაშვილმა ხარაგაულზე და სპექტაკლის შესახებ ისაუბრა-„ხარაგაული ძალიან მიყვარ, აქ ჩამოსვლა ყოველთვის მაბედნიერებს. დღეს, ხარაგაულის სცენაზე ჩემი პიესა გაცოცხლდა, რითაც  თანადგომა, სიყვარული და ყურადღება ვიგრძენი. დღევანდელი დღით კიდევ ერთხელ დავრწმუნდი, რომ ტყუილად არ მიშრომია.“ თეატრმცოდნე ლაშა ჩხარტიშვილმა წარმატებული პრემიერა მიულოცა  ოთარ აბაშიძის სახელობის სახალხო თეატრს და აღნიშნა, რომ სპექტაკლით ილია ჭავჭავაძე იქნებოდა ბედნიერი, რადგან  თეატრი ერის სარკეა : „ძნელია მწერლობის სცენაზე გადატანა, მითუმეტეს გურამ დოჩანაშვილის-შემოქმედების, ამ დიდი მწერლის პიესასთან შეჭიდება რთულია, თუმცა რეჟისორმა ირინე ჩხეიძემ ეს ოსტატურად შეძლო და სპექტაკლი წარმატებით დასრულდა.“ სპექტაკლის პრემიერა-„ხორუმი ქართული ცეკვაა“ სრული ანშლაგისა და ოვაციების ფონზე დამთავრდა. სპექტაკლში მონაწილეობენ: ვასილ კიკნაძე, გიორგი მაქაძე, ბათუ კიკნაძე, ლია ჭიპაშვილი, ლუიზა კიკნაძე, ნიკო წიკლაური, ნიკუშა მაჭავარიანი, ნიკო დეკანოსიძე, ბიჭიკო მაისურაძე, მაია ბერაძე, როლანდ ხიჯაკაძე, გიორგი ჭიპაშვილი, დავით ჭყოიძე, ლია თაბუკაშვილი, ბექა ხიჯაკაძე. რეჟისორი - ირინე ჩხეიძე სპექტაკლის განმეორებითი ჩვენება 7 ივნისს 17-00 საათზე გაიმართება. 8 ივნისს კი ხარაგაულის ოთარ აბაშიძის სახელობის სახალხო თეატრი ამ სპექტაკლით ქუთაისის ლადო მესხიშვილის თეატრში იმერეთის თეატრალურ ფესტივალზე ,,თეატრალური იმერეთი 2019"-ზე  წარსდგება.        

5 ივნისს ხარაგაულის სპორტულ დარბაზში ჩატარდა მუნიციპალიტეტის პირველობა ჭადრაკში მოსწავლე გოგონებსა და ჭაბუკებს შორის. ჩემპიონატში მონაწილეობა მიიღო  27-მა მოსწავლემ. გამარჯვებული მონაწილეები გამოვლინდნენ ნახევარფინალური  შეჯიბრის შემდეგ, რომლებსაც გადაეცათ სიგელები და ფასიანი საჩუქრები. გოგონათა შორის  გამარჯვებულები გახდნენ: თამუნა გიორგაძე (ბორის სკოლა პანსიონი), ნინი ბაკურაძე (საღანძილის სკოლა), მარიამ თაბაგარი (ბაზალეთი საჯარო სკოლა). მონაწილე ვაჟებს შორის საპრიზო ადგილი დაიმსახურა: გიორგი ლურსმანაშვილმა (მესამე საჯარო სკოლა), ვაჟა მაღრაძემ (მესამე საჯარო სკოლა) და  მურად  ოკრიბელაშვილმა (ვარძია საჯარო სკოლა). ჭადრაკის ჩემპიონატი გაიმართა ა(ა)იპ  "სპორტისა და შიდა ტურიზმის ცენტრი"-ს (დირექტორი გრიგოლ ჭიპაშვილი) ინიციატივითა და ორგანიზებით.

ხარაგაულის მუნიციპალიტეტის მერი, ნიკოლოზ თოფურიძე სოფელ ვარძიის პირველ, მეორე და მესამე უბნის მოსახლეობას შეხვდა. ხარაგაულის მერმა  სოფლის წინაშე არსებულ გამოწვევებზე და მათი მოგვარების გზებზე მოსახლეობასთან ერთად ისაუბრა. მოსახლეობის მხრიდან, ძირითად პრობლემად საუბნო გზების გაუმართაობა დასახელდა. მერის ინფორმაციით, ვარძიაში საუბნო გზების რეაბილიტაცია 2020 წლისთვის დასრულებული იქნება. რთულ მონაკვეთებზე კი, მოხრეშვითი სამუშაოები ჩატარდება.  ნიკოლოზ თოფურიძე ბოდიშს უხდის მოსახლეობას შექმნილი დისკომფორტის გამო და აღნიშნავს რომ მიუხედავად არსებული გამოწვევებისა, პროექტი "გზა ყველა სოფელს" ხარაგაულში წარმატებით ხორციელდება. მერი აღნიშნავს, რომ მუნიციპალიტეტის 78 სოფელში გზა ერთდროულად ვერ დაიგება და მოსახლეობა ამას შეგნებით უნდა მოეკიდოს.    

საქართველოს საავტომობილო გზების დეპარტამენტი 10 ივნისს ხარაგაულის მუნიციპალიტეტის მე-8, მე-9, მე-10 და მე-11 კლასის მოსწავლეებთან, ძირულა-ხარაგაული-მოლითი-ფონა-ჩუმათელეთის დამაკავშირებელი გზის რეაბილიტაციის პროექტის ფარგლებში, შეხვედრას გამართავს. შეხვედრას ხარაგაულის მუნიციპალიტეტის მერი, ნიკოლოზ თოფურიძე და საქართველოს გზების დეპარტამენტის თავმჯდომარის მოადგილე, გიორგი ციბაძე გახსნიან.  შეხვედრაზე შემდეგ თემებს განიხილავენ მომხსენებლები: „გზების დაგეგმარება“ - საქართველოს საავტომობილო გზების დეპარტამენტის ინფრასტრუქტურის განვითარებისა და განვითარების პარტნიორებთან ურთიერთობის სამსახურის უფროსი, პავლე გამყრელიძე; „საგზაო უსაფრთხოება“ - საქართველოს საავტომობილო გზების დეპარტამენტის საგზაო უსაფრთხოების სამსახურის უფროსი, მამუკა პატაშური; „გენდერული თანასწორობისთვის“ - საქართველოს საავტომობილო გზების დეპარტამენტის ადამიანური რესურსების მართვის სამსახურის უფროსი და გენდერზე პასუხისმგებელი პირი,  ეკატერინე ფურცელაძე და ხარაგაულის მუნიციპალიტეტის საკრებულოსა და გენდერული საბჭოს თავმჯდომარე, მანანა ბარბაქაძე. შეხვედრია დასასრულს მოსწავლეებს შესაძლებლობა ექნებათ მომხსენებლებისგან მათთვის საინტერესო კითხვებზე მიიღონ პასუხები. შეხვედრა ხარაგაულის კინოთეატრში, 14:00 საათზე, ალაფურშეტით გაიხსნება.  

3 ივნისს ხარაგაულის კინოთეატრში „ახალგაზრდა მოყვარულ მხატვართა კონკურსის“  გამარჯვებულების  გამოვლენა-დაჯილდოება მოეწყო.  კონკურსში მონაწილეობა საბაზო და საჯარო სკოლის მოსწავლეებმა მიიღეს. მათ საშუალება ჰქონდათ ნახატები შეესრულებინათ შემდეგ სამ თემაზე: „ეს ჩემი საქართველოა“’,   „მომავალი ჩვენია“ და „თავისუფალი ფანტაზია“. კონკურსის პირობებიდან გამომდინარე გამარჯვებულები გამოვლინდნენ სამ ასაკობრივ კატეგორიაში. პირველიდან-მეექვსემდე, მეშვიდედან-მეცხრემდე  და მეათედან მეთორმეტე მოსწავლეთა კლასებს შორის. I-IV კლასის მოსწავლეებს შორის პირველი სამი ადგილის გამარჯვებულები გახდნენ: პირველი ადგილი-მარიტა ჩაგელიშვილი (III კლასი გიმნაზია). მეორე ადგილი-თათია ნოზაძე        (VI კლასი, ნადაბური). მესამე ადგილი-მართა გურგენიძე  (V კლასი, გიმნაზია). VII-IX კლასების გამარჯვებულები არიან: პირველი ადგილი-თეონა ჭიპაშვილი (VII კლასი, გიმნაზია). მეორე ადგილი-ნოდარ მანჩხაშვილი (VII კლასი, ზვარე). მესამე ადგილი-ეკატერინე ბუაჩიძე (VII კლასი , ნადაბური). X-XII კლასებს შორის საპრიზო ადგილი დაიმსახურეს: პირველი ადგილი-მარიამ გელაშვილი (X კლასი, ნადაბური). მეორე ადგილ- ლუკა ყრუაშვილი (X კლასი, გიმნაზია). მესამე ადგილი-ანა კვინიკაძე ( X კლასი, მესამე საჯარო სკოლა). ხატვის კონკურსის გამარჯვებული მოსწავლეები დაჯილდოვდნენ სიგელებით და საჩუქრებით. კონკურსის ორგანიზატორები გახლდათ, ა(ა)იპ  "სპორტისა და შიდა ტურიზმის ცენტრი" (დირექტორი გრიგოლ ჭიპაშვილი) ხარაგაულის საგანმანათლებლო რესურსცენტრი, ხარაგაულის მერიის კულტურის, განათლებისა, სპორტისა და ახალგაზრდულ საქმეთა სამსახური და ა(ა)იპ კულტურისა და ხელოვნების ცენტრი.

3 ივნისს ხარაგაულის მუნიციპალიტეტის მერი, ნიკოლოზ თოფურიძე, ადმინისტრაციულ ერთეულებში მერის წარმომადგენლებს შეხვდა. მერმა სოფლებში მიმდინარე ინფრასტრუქტურულ პროექტებზე და ამ მიმართულებით არსებულ გამოწვევებზე ისაუბრა.  ნიკოლოზ თოფურიძის ინფორმაციით, ეტაპობრივად მიმდინარეობს ყველა იმ კომპანიასთან ხელშეკრულების შეწყვეტა, რომელმაც ვალდებულება ვერ შეასრულა. „არსებული გამოწვევების ფონზე ნადმვილად უნდა აღინიშნოს, რომ ბოლო ორი წლის განმავლობაში 60-მდე სოფელში დაიგო როგორც ცენტრალური, ასევე საუბნო გზები“ - აღნიშნა ხარაგაულის მერმა.       

ხარაგაულის მუნიციპალიტეტის საკრებულოს 3 ივნისის მორიგ სხდომაზე დეპუტატებმა მერიის ინფრასტრუქტურისა და კეთილმოწყობის სამსახურის ანგარიში მოისმინეს. ანგარიშის დეტალური განხილვა საკრებულოს კომისიების სხდომების ფორმატში, ორი კვირის განმავლობაში მიმდინარეობდა, ამიტომ სხდომაზე 2018 წლის თებერვლის თვიდან 2019 წლის პირველი კვარტლის ჩათვლით გაწეული საქმიანობის შესახებ ანგარიშზე მსჯელობა,  პირდაპირ კითხვა-პასუხის რეჟიმზე გადავიდა. ძირითადი გამოწვევები, რაზეც სამსახურის უფროსმა, თემური თაბუკაშვილმა სხდომის დაწყებამდე თავად ისაუბრა, გასულ წელს დაწყებული და დღემდე დაუსრულებელი პროექტებია. სწორედ ეს შენიშვნები ქონდა დეპუტატების უმრავლესობას. საკრებულოს სხდომას, ხარაგაულის მერი ნიკოლოზ თოფურიძე დაესწრო, რომელმაც ხაზგასმით აღნიშნა, რომ ინფრასტრუქტურულ პროექტებში არსებულ გამოწვევებზე თანაბრად პასუხისმგებელია ადგილობრივი თვითმმართველობის როგორც აღმასრულებელი ხელისუფლება, ასევე, საკანონმდებლო  ორგანო. მისივე განმარტებით, ის რომ სიკეთე მოსახლეობამდე დროულად ვერ მივიდა, ნამდვილად არ არის სახარბიელო მდგომარეობა, თუმცა აღსანიშნავია, რომ  არაკეთილსინდისიერ მეწარმეებს, რომელთაც ამ დრომდე ვერ შეასრულეს ვალდებულებები ხელშეკრულებები უკვე შეუწყდათ. „სამწუხაროა, რომ არავინ საუბრობს იმაზე, რამდენი პროექტი გაკეთდა ხარაგაულში ბოლო ორი წლის განმავლობაში“ - აღნიშნა სხდომაზე ხარაგაულის მერმა და საკრებულოს დეპუტატებს შეახსენა, რომ 2017-2018-2019 წლებში ხარაგაულის მუნიციპალიტეტის 78 სოფლიდან, თითქმის 60 სოფელში ცენტრალური და საუბნო გზების კაპიტალური რეაბილიტაცია განხორციელდა.   საკრებულოს უმრავლესობამ ინფრასტრუქტურისა და კეთილმოწყობის სამსახურის ანგარიში გაწეული საქმიანობის შესახებ უარყოფითად შეაფასა. ხარაგაულის მუნიციპალიტეტის საკრებულოს სხდომაზე ასევე განიხილეს შვიდი საკითხი: 1. ხარაგაულის მუნიციპალიტეტის საკუთრებაში არსებული, დაბა ხარაგაულში მდებარე ელექტრო საყრდენზე (ბოძებზე) საკომუნიკაციო ქსელის მოსაწყობად (საჰაერო ტრასით კაბელის გატარება) სააქციო საზოგადოება „სილქნეტისთვის“ ელექტრო საყრდენის (ბოძის) იმ ნაწილის, რაც კაბელის დასამაგრებლადაა საჭირო 2 წლის ვადით პირდაპირი განკარგვის წესით სასყიდლით (იჯარის ფორმით) სარგებლობის უფლებით გადასაცემად ხარაგაულის მუნიციპალიტეტის მერისთვის თანხმობის მიცემის შესახებ; 2. ხარაგაულის მუნიციპალიტეტის საკუთრებაში არსებული, სოფელ მოლითში მდებარე 2069 კვ.მ არასასოფლო-სამეურნეო დანიშნულების მიწის  ნაკვეთი (ს/კ36.17.33.328). პირდაპირი განკარგვით, იჯარით, (აუქციონის გარეშე) ორი წლის ვადით ღსს „სამშენებლო-სამრეწველო საინვესტიციო კორპორაცია „აკკორდის“ საქართველოში წარმომადგენლობის „აკკორდ ჯორჯიაა“-სთვის გადასაცემად ხარაგაულის მუნიციპალიტეტის მერიისთვის თანხმობის მიცემის შესახებ; 3. ხარაგაულის მუნიციპალიტეტის საკუთრებაში არსებული, სოფელ ხევში მდებარე 501 კვ.მ არასასოფლო-სამეურნეო დანიშნულების მიწის ნაკვეთის და მასზე მდგარი შენობა-ნაგებობა 280 კვმ (ყოფილი სარიტუალო სახლი)(ს/კ 36.05.31.202) პირდაპირი განკარგვით, იჯარით, (აუქციონის გარეშ) ორი წლის ვადით  კომპანია hinan bridge construqcion co. ltd-სთვის გადასაცემად ხარაგაულის მუნიციპალიტეტის მერისთვის თანხმობის მიცემის შესახებ; ხარაგაულის მუნიციპალიტეტის საკრებულოს 2017 წლის 3 ივლისის N50/44 განკარგულებაში „ხარაგაულის მუნიციპალიტეტის საკუთრებაში არსებული ქონების საპრივატიზაციო ობიექტთა გეგმის დამტკიცების შესახებ“ ცვლილების შეტანის თაობაზე; ხარაგაულის არასამეწარმეო (არაკომერციული) იურდიული პირის „სპორტისა და შიდა ტურიზმის ცენტრი“-სთვის სარგებლობის უფლებით (უზურფრუქტი) არსებობის ვადით დაბა ხარაგაულში სოლომონ მეფის ქუჩაზე (რიყე) მდებარე, 6615 კვ.მ არასასოფლო-სამეურნეო დანიშნულების მიწის ნაკვეთის (ს/კ 36.01.31.368) და მასზედ მდგარი შენობა-ნაგებობის N1-1798,83 კვ.მ ფართის გადასაცემად მუნიციპალიტეტის მერისთვის თანხმობის მიცემის შესახებ. ხარაგაულის მუნიციპალიტეტის საკრებულოს 2018 წლის 14 დეკემბრის N48 დადგენილებაში „ხარაგაულის მუნიციპალიტეტის თვითმმართველ ი ერთეულის 2019 წლის ბიუჯეტის დამტკიცების  შესახებ“ ცვლილების შეტანის თაობაზე; ხარაგაულის მუნიციპალიტეტის საკრებულოს განათლების, კულტურის და ახალგაზრდულ საქმეთა კომისიის ანგარიში გაწეული მუშაობის შესახებ.