ხარაგაულის მუნიციპალიტეტის საკრებულოს  ბიუროს  2019   წლის 30    ივლისის რიგგარეშე  სხდომაზე, ხარაგაულის მუნიციპალიტეტის  თვითმმართველი ერთეულის 2019  წლის ბიუჯეტის   მეორე კვარტლის შესრულების  შედეგების განხილვის შესახებ ინფორმციას მოისმენენ, რომელსაც მერიის საფინანსო-საბიუჯეტო სამსახურის უფროსი, ვლადიმერ გელაშვილი წარადგენს. ბიუროს წევრები ასევე განიხილავენ ორ საკითხს : 1. ა(ა)იპსოფლისა და სოფლის მეურნეობის განვითარების სააგენტოსთვის დაბა ხარაგაულში, 9 აპრილის ქუჩა N 15-ში,   ხარაგაულის მუნიციპალიტეტის ადმინისტრაციული შენობის  მესამე  სართულზე, მარცხენა ფლიგელში მდებარე ორი ოთახის საერთო ფართით 31.7 კვ.მ .(ს/კ 36.01.33.046)  სარგებლობის უფლებით, უსასყიდლო უზურფრუქტის ფორმით, ორი წლის  ვადით  გადასაცემად ხარაგაულის მუნიციპალიტეტის მერისთვის თანხმობის მიცემის შესახებ. მომხსენებელი იქნება მერიის ეკონომიკისა ქონების მართვის  სამსახურის უფროსი, ჯაბა ბერაძე. 2.ხარაგაულის მუნიციპალიტეტის საკრებულოს, 2019 წლის 1 ივლისის, N18 დადგენილებაში „ხარაგაულის მუნიციპალიტეტის ტერიტორიაზე უსახლკარო პირების რეგისტრაციისა და მათი დროებითი თავშესაფრით უზრუნველყოფის წესის დამტკიცების შესახებ“ ცვლილების შეტანის თაობაზე: საკითხს მერიის ჯანდაცვისა და სოციალური დაცვის სამსახურის უფროსი, ნანა კიკნაძე წარადგენს. ხარაგაულის მუნიციპალიტეტის საკრებულო აღნიშნულ საკითხებს 5 აგვისტოს მორიგ სხდომაზე განიხილავს.                                                                                                             

 მიუხედავად იმისა, რომ ბოლო 3-4 წლის განმავლობაში ხარაგაულის 50-ზე მეტ სოფელში გაკეთდა როგორც ცენტრალური, ასევე საუბნო გზები, მუნიციპალიტეტში ჯერ კიდევ არის ათეულობით დასახლებული პუნქტი, სადაც უგზოობის პრობლემა მწვავედ დგას.   მათ შორისაა, სოფელ ბორითიდან ერეთა-მდინარისკენ მიმავალი გზა. აღნიშნულ სოფელში 30 ოჯახი ცხოვრობს. 2 კილომეტრიან გზაზე, დაახლოებით 100 მეტრამდე მონაკვეთი, წვიმების დროს, განსაკუთრებით გაუვ ალია.   ერეთა-მდინარის მოსახლეობას ხარაგაულის მერის მოადგილე, თემურ ჩხეიძე და მერის თანაშემწე, ლაშა გელაშვილი შეხვდნენ. მათ ადგილობრივებთან ერთად დაათვალიერეს გზის ამორტიზებული მონაკვეთი და მოსახლეობასთან შეთანხმებით, პირველ ეტაპზე მისი შეკეთება დაგეგმეს.  რაც შეეხება აღნიშნულ გზაზე ბეტონის საფარის მოწყობას, თემურ ჩხეიძის ინფორმაციით პროექტი მზადაა და ის ახლა ექსპერტიზას გადის. ადგილობრივი ხელისუფლების წარმომადგენლები მოსახლეობას დაპირდნენ, რომ ბორითიდან ერეთე-მდინართან დამაკავშირებელი გზის კაპიტალური რეაბილიტაცია 2020 წელს აუცილებლად განხორციელდება. 

საქართველოს მთავრობის №1635 განკარგულებით, ხარაგაულის მუნიციპალიტეტს, სტიქიით დაზიანებული ობიექტების სარეაბილიტაციოდ, პირველ ეტაპზე, 270 ათასი ლარი გამოეყო.  ხარაგაულის მერიამ თანხის მიღების შემდეგ, დაუყოვნებლივ გამოაცხადა ტენდერი ლეღვნის გზის რეაბილიტაციის მიზნით. ელექტრონულ ტენდერზე წინადადებების მიღების ბოლო ვადა 30 ივლისია.  ტენდერში გამოვლენილი კომპანია, ხელშეკრულების გაფორმებიდან 5 დღეში ვალდებულია დიწყოს გზის აღდგენითი სამუშაოები.  პროექტის სატენდერო ღირებულება 159 370 ლარია, რომლის ფარგლებში აღდგება გზის დაიზანებული საფარი და მდინარე ლეღვნულას ნაპირზე, საჭიროების ადგილებზე მოეწყობა გაბიონები.  აქვე გაცნობებთ, რომ 7-12-16 ივნისის სტიქიით დაზიანებული სხვა ინფრასტრუქტურის, ხიდების, ხიდბოგირების და გზების აღსადგენად მერიის ადგილობრივი ბიუჯეტიდან გამოყოფილი თანხით(120 000 ლარი) საპროექტო სამუშაოებზე ტენდერი უკვე გამოცხადებულია, წინადადებების მიღება 26 ივლისს დასრულდება.  ხარაგაულის მუნიციპალიტეტის მერია ბოდიშს გიხდით შეფერხებისთვის, რომელიც ჩვენგან დამოუკიდებელი მიზეზებითაა გამოწვეული.  ამ დროისთვის სოფელ ლეღვანში შეგიძლიათ შემოვლითი გზით გადაადგილდეთ, რომელიც ცენტრალური გზის გასწვრივ, მდინარის ნაპირზე, 500 მეტრის მანძილზეა მოწყობილი. 

26 ივლისს, ხარაგაულის სოფელ ვარძიაში, უფასო სამედიცინო აქცია ჩატარდება. „ბომონდი“ შენი ჯანმრთელობისთვის“, -აღნიშნული სლოგანით ქუთაისში არსებულმა "კლინიკა ბომონდმა" იმერეთის რეგიონის მოსახლეობისთვის უფასო სამედიცინო კვლევების აქცია დაიწყო. პროექტი, რომელიც მოსახლეობისათვის სამედიცინო სერვისის მიწოდებას საცხოვრებელ ადგილზე ითვალისწინებს, იმერეთის სამხარეო ადმინისტრაციის მხარდაჭერით ხორციელდება. მის მიზანს სამედიცინო სერვისებზე მოსახლეობის ხელმისაწვდომობის ზრდა წარმოადგენს. სამედიცინო აქცია, დილის 11 საათიდან, ვარძიის საჯარო სკოლაში დაიწყება, მომსახურებით შეუძლიათ ისარგებლონ, მიმდებრე სოფლების კიცხის, წყალაფორეთის და ხიდრის მოსახლეობამ. აქციის ფარლებში, ადგილობრივები 12 სხვადასხვა პროფილის ექიმის (დერმატოვენეროლოგი, მეან-გინეკოლოგი, ზოგადი ქირურგი, თერაპევტი, ენდოკრინოლოგი, ოფთალმოლოგი, ექოსკოპისტი, პედიატრი, კარდიოლოგი, ნევროლოგი, უროლოგი, ბავშვთა ქირურგი) მომსახურებას მიიღებს. „კლინიკა ბომონდი“ დასავლეთ საქართველოში დაარსებული პირველი კერძო კლინიკაა, რომელიც 2001 წელს, გინეკოლოგმა მამუკა მიქაძემ დააარსა. „კლინიკა ბომონდი“ პაციენტების სამედიცინო მომსახურებას ახორციელებს შემდეგი მიმართულებებით: ქალთა კონსულტაცია; პოლიკლინიკა; რადიოლოგია; EMERGENCY-გადაუდებელი მედიცინა; ინტენსიური თერაპია; ქირურგია; პედიატრია; მეანობა-გინეკოლოგია; ოფთალმოლოგია.

 მაღალმთიანი სტატუსის მქონე წიფის ადმინისტრაციულ ერთეულში ოთხი სოფელია გაერთიანებული და ოთხივე აღნიშნული სტატუსით სარგებლობს. გოლათუბანი, გუდათუბანი, წიფა და ფონა. სწორედ ეს უკანასკნელი სოფელი გახლავთ აღმოსავლეთიდან ზემო იმერეთის კარიბჭე.   2014-2015 წლებში, წიფის თემის სოფლებში სოფლის პროექტებით, მოსახლეობის გადაწყვეტილებით, სარიტუალო სახლები მოეწყო, რომლებიც დღესაც ფუნქციონირებს.  2016 წელს სოფელ წიფაში აშენდა ახალი საბავშვო ბაღი, რომელიც 25 აღსაზრდელზეა გათვლილი, დსაქმებულია 7 ადგილობრივი. 2017 წელს სრული რეაბილიტაცია ჩაუტარდა სოფელ გოლათუბნის ცენტრალური გზის 1 500 მეტრიან მონაკვეთს, რომელზე გადაადგილება თითქმის შეუძლებელი იყო, როგორც დაბალი, ასევე მაღალი გამავლობის ავტომანქანებისთვის. აღნიშნული გზის 500 მეტრიანი მონაკვეთი რეგიონული განვითარების ფონდიდან, ხოლო 1 000 მეტრიანი მთის განვითარების ფონდიდან დაფინანსდა.   2017 წელს კეთილმოეწყო ასევე, წიფის სასოფლო გზები ორ მონაკვეთზე, საერთო ჯამში 2 200 მეტრამდე ამორტიზებულ გზაზე დაიგო ბეტონის საფარი.  2019 წელს სოფელ წიფაში გოლათუბანთან დამაკავშირებელი ახალი ხიდბოგირი მოეწყო, რომლის მშენებლობაც სტიქიის ფონდიდან დაფინანსდა. ამავე ფონდიდან დაფინანსდა ასევე, წიფის სადგურის უბანში მრავალბინიანი კორპუსის გადახურვის სამუშაოები.   2019 წელს მთის განვითარების ფონდიდან გამოყოფილი თანხით რეაბილიტაცია ჩაუტარდება გოლათუბანში სხევარის უბნისა და სადგურის უბნის გზებს. ჯამში 1 800 მეტრიანი მონაკვეთის კეთილმოწყობაა დაგეგმილი. აღნიშნულ უბნებში საგზაო ინფრასტრუქტურის მშენებლობის მიზნით, ხარაგაულის მუნიციპალიტეტის მერიამ ტენდერი უკვე გამოაცხადა. წიფის ადმინისტრაციულ ერთეულში, 2019 წლის მონაცემებით, 654 ადამიანი ცხოვრობს. 2014 წელს ჩატარებული მოსახლეობის საყოველთაო აღწერასთან შედარებით, მოსახლეობის რაოდენობამ საგრძნობლად მოიმატა. გამომდინარე აქედან, წიფის ადმინისტრაციული ერთეული ხარაგაულის მუნიციპალიტეტში ერთ-ერთი არამიგრაციული ცენტრია, რაზეც დადებითად იმოქმედა მთის განვითარების პროგრამამ და ყველა იმ შეღავათმა, რითაც აღნიშნულ ერთეულში ოთხივე სოფლის მოსახლეობა სარგებლობს.   წიფის ადმინისტრაციული ერთეული ჩხერიმელას ხეობაში, ხარაგაულიდან 29 კილომეტრში მდებარეობს. 

ხარაგაულის მუნიციპალიტეტში სოფლის მხარდაჭერის პროგრამის ფარგლებში პროექტების განხორციელება აქტიურ ფაზაშია. მოლითის ადმინისტრაციული ერთეულის სოფლებში ბაბში, ანიულაში, დეისში და ბეჟათუბანში საუბნო გზების კეთილმოწყობა მიმდინარეობს. აღნიშნულ სოფლებში საერთო კრება, 11 თებერვალს გაიმართა, სადაც მოსახლეობამ პრიორიტეტი თავად შეარჩია.   ვრცლად იხილეთ ➘   http://kharagaulinews.gov.ge/%E1%83%A1%E1%83%98%E1%83%90%E1%83%AE%E1%83%9A%E1%83%94%E1%83%94%E1%83%91%E1%83%98/page/553#  

ხარაგაულის მოსწავლე-ახალგაზრდობის სახლში 5 დღიანი პროექტი, „დღის ბანაკი“ დაიწყო. იდეის ავტორი, მოსწავლე-ახალგაზრდობის სახლის თანამშრომელი მარინა ვეფხვაძე ამბობს, რომ ამ პროექტის განხორციელება წლებია უნდოდა, თუმცა ვერ ახერხებდა. პროექტში, ამ დროისთვის 32 ახალგაზრდაა ჩართული, ბანაკში არიან როგორც ადგილობრივები, ასევე დამსვენებლები. მოსწავლე-ახალგაზრდობის სახლის დირექტორის მაია ბლუაშვილის ინფორმაციით, ბანაკი ინტელექტუალურ-შემეცნებითი და გასართობი პროგრამებითაა დატვირთული. ბავშვები ყოველი დღის გეგმას დილით თავად ადგენენ და აქტივობებს სურვილის მიხედვით არჩევენ. ახალგაზრდების სახლში მათ ტექნიკურ მხარდაჭერას უწევენ და მთელი დღის განმავლობაში ჩაი-ყავა, ტკბილეულით, შუა დღით კი, სადილით უმასპინძლდებიან. ბანაკის მონაწილეები სამ ჯგუფად არიან დაყოფილები. არის შეჯიბრებები, რომელსაც სპეციალური ჟიური აფასებს.  მოსწავლე-ახალგაზრდობის სახლში რამდენიმე სივრცე და ერთი საკონცერტო დარბაზია. ასე, რომ დილის 9 საათიდან, საღამოს 17 საათამდე ბანაკის მონაწილეებს ნამდვილად აქვთ შესანიშნავი გარემო იმისთვის, რათა ზაფხულის არდადეგები, შინაარსიანად, საიმედო გარემოში გაატარონ.   დღის ბანაკს, ხვალიდან, კიდევ რამდენიმე ახალგაზრდა შეუერთდება. მონაწილეებს დღის განმავლობაში გარეთ გასვლა ეკრძალებათ, მაგრამ როგორც თავად აღნიშნავენ დრო ისე გადის ამის არც სურვილი გასჩენიათ და არც საჭიროება დამდგარა. დღის ბანაკს ერთი მენეჯერი ყავს - თათია ჭიპაშვილი, რომელიც ახალგაზრდებს აქტივობების ორგანიზებაში და დღის დაგეგმვაში ეხმარება. პროექტი, პარასკევს, 26 ივლისს, ღია ცის ქვეშ, საზეიმოდ დაიხურება.  

ნადაბურის ადმინისტრაციული ერთეული სოფელ ნადაბურსა და მაღალმთიანი სტატუსის მქონე სოფელ გოლისს აერთიანებს.   ნადაბური ერთ-ერთი მჭიდროდ დასახლებული ადმინისტრაციული ერთეულია ხარაგაულში, სადაც 2014 წლის მონაცემებით, დემოგრაფიული თვალსაზრისით, მოსახლეობის მნიშვნელოვანი მატებაა დაფიქსირებული. იმ დროისთვის ადმინისტრაციულ ცენტრში 400-მდე ადამიანი ცხოვრობდა, ხოლო 2019 წელს მოსახლეობის რაოდენობამ 500-ს მიაღწია. 2014 წელს, სოფლის მხარდაჭერის პროგრამის ფარგლებში, ნადაბურში, ძამულის, ჭალის და ქვრივიშვილების უბანში, მგზავრთა მოსაცდელები მოეწყო.  2017 წელს სოფელში აშენდა ახალი საბავშვო ბაღი, რომელიც 25 აღსაზრდელზეა გათვლილი. დასაქმებულია 6 ადგილობრივი. წლების განმავლობაში ნადაბურის მოსახლეობისთვის დიდ პრობლემას წარმოადგენდა ამორტიზებული ცენტრალური საავტომობილო გზა, რომლის კაპიტალური რეაბილიტაცია დაიწყო 2018 წელს და ამ დროისთვის, 5,5 კილომეტრიანი გზის მშენებლობა დასასრულს უახლოვდება. პროექტი ითვალისწინებს, ცხაურების, სანიაღვრე არხების, მილხიდების და გვერდულების მოწყობას. პროექტის ფარგლებში კეთდება ასევე 12 მეტრიანი გაბიონი მდინარე ძირულას ნაპირზე. 2018 წელს, სოფლის ცენტრში, მდინარე ძირულაზე აშენდა ნაპირსამაგრი საყრდენი კედელი, რომლის უქონლობაც ადიდებული მდინარისა და წყალმოვარდნების დროს სერიოზულ საფრთხეს უქმნიდა მოსახლეობას. 2019 წელს აშენდა სამი ახალი ხიდბოგირი და რეაბილიტაცია ჩაუტარდა ერთი ბონდის ხიდს ძამულის უბანში. მოძველებული ხიდბოგირები საფრთხეს უქმნიდა მოსახლეობის გადაადგილებას და წლების განმავლობაში აღნიშნული პრობლემა მწვავედ იდგა ადგილობრივი მაცხოვრებლების წინაშე. 2019 წელს სოფლის მხარდაჭერის პროგრამის ფარგლებში, ნაწილობრივ შემოიღობა სასაფლაოები სოფელ გოლისში და ძამულის უბანში. 2019 წელს დაიწყო სოფელ ნადაბურისთვის მნიშვნელოვანი პროექტის განხორციელება. კერძოდ,  საჩხერე-ხარაგაულის დამაკავშირებელი გზის რეაბილიტაციისთვის საპროექტო სამუშაოების ჩატარება. პროექტის მომზადების შემდეგ მუნიციპალური განვითარების ფონდი ტენდერს გზის მშენებლობის მიზნით გამოაცხადებს. საუბარია ლიჩი-ნადაბურის 12 კილომეტრიანი მონაკვეთის კეთილმოწყობაზე, რომლის დასრულებაც 2020 წელს იგეგმება. ასევე მნიშვნელოვანია, რომ ნადაბურის ადმინისტრაციული ერთეულის მაღალმთიან სოფელ გოლისის ცენტრალურ გზას, ბოლო 5 წლის განმვალობაში პერიოდულად უტარდება რეაბილიტაცია. სოფლის გზა საკმაოდ რთულ რელიეფზე მდებარეობს და იქ ბეტონის საფარის მოწყობა ვერ ხერხდება. ნადაბურის ადმინისტრაციული ერთეული ზ.დ. 760 მეტრზე, ხარაგაულიდან 53 კილომეტრში, მდინარე ძირულას მარცხენა სანაპირზე მდებარეობს.

ხარაგაულის მერიის კულტურის, განათლების, სპორტის და ახალგაზრდობის საქმეთა სამსახურის ორგანიზებით, კინოთეატრი ფოიეში, მოყვარულთათვის სამაგიდო თამაშების ჩემპიონატი ჩატარდა. თამაშები ნარდის მოყვარულებით დაიწყო და ჩემპიონატში 22-მა მსურველმა მიიღო მონაწილეობა. პირველი ადგილის მფლობელი მერიის კულტურის სამსახურის თანამშრომელი დავით ჩადუნელი გახდა, ხოლო მეორე ადგილი საკრებულოს დეპუტატმა დავით კიკნაძემ მოიპოვა. ასევე 22-მა მოხალისემ (11-მა წყვილმა) გამოთქვა სურვილი დომინოს ჩემპიონატში მონაწილეობისთვის. თამაშის გამარჯვებული გახდნენ მამა-შვილი თენგიზ და ირაკლი კიკნაძეები, მეორე ადგილ კი, პაატა ვეფხვაძისა და ალეკო ტაპატაძის წყვილმა დაიკავა. სამაგიდო თამაშების კვირეული ჭადრაკის ჩემპიონატით დასრულდა, რომელში მონაწილეობის  სურვილი 6 -მა მონაწილემ გამოთქვა. ამ უკანასკნელში კი, პირველი ადგილი გიორგი ღონღაძემ დაიკავა, ხოლო მეორე ადგილზე დომინოს გამარჯვებული ირაკლი კიკნაძე გავიდა. გამარჯვებულები სიგელებით და ფასიანი საჩუქრებით დაჯილდოვდნენ.

ხარაგაულის მუნიციპალიტეტის სოფელ ბორითში, რიკოთის საუღელტეხილო გზის, ხევი-უბისას მონაკვეთის მშენებლობის ფარგლებში, ადგილობრივი მოსახლეობის დასაქმების მიზნით შეხვედრა ჩატარდა. ღონისძიების ფარგლებში, ადგილობრივ მოსახლეობას, იმერეთში სახელმწიფო რწმუნებულის ადმინისტრაციის, საქართველოს საავტომობილო გზების დეპარტამენტის, ხარაგაულის ადგილობრივი ხელისუფლებისა და მშენებელი კოპანიის “Hunan Road and Bridge Construction Group“ -ის წარმომადგენლები შეხვდნენ. ადგილობრივ მოსახლეობას საშუალება ჰქონდა ხევი-უბისას პროექტსა და სურვილის შემთვევაში მშენებელი კომპანიის მხრიდან, მშენებლობის პირველ ეტაპზე წარმოდგენილ ვაკანტურ მიმართულებებს გაცნობოდა. აღნიშნული მიმართულებებია: მიწაზე მომუშავე პერსონალი, ოპერატორები, ლითონზე მომუშავე პერსონალი, ბეტონზე და ხის მასალაზე მომუშავე პერსონალი, შემდუღებლები, ელექტრიკოსები, გეოდეზისტები, არმატურის მქსოველები, მექანიკოსები, დამხმარე მუშები და ბეტონის ქარხნის ოპერატორი. კომპანია აღნიშნულ მონაკვეთზე 1 000-ზე მეტი მუშა-ხელი სჭირდება. დასაქმების მსურველებმა შეგიძლიათ მიმართოთ სოფელ ბორითში მდებარე კომპანიის მთავარ ოფისს, ან დარეკოთ საკონტაქტო პირთან - 593 31 76 18 გიზო კიკვაძე. ამ ეტაპზე, ხევი-უბისას მონაკვეთზე სამობილიზაციო და მოსამზადებელი სამუშაოები, სამშენებლო მოედნის გასუფთავება, ნაყოფიერი ფენის მოხსნა, ბანაკებისა და ქარხნების მოწყობის სამუშაოები, კომუნიკაციის გადატანის პროექტის მომზადება და ნარჩენების განსათავსებელი ადგილის შერჩევა მიმდინარეობს. პროექტი, ხევი-უბისას 12,2 კმ-იან მონაკვეთზე, ოთხზოლიანი გზის მშენებლობას ითვალისწინებს. აღნიშნულ მონაკვეთზე, 35 ახალი ხიდისა და 18 გვირაბის მშენებლობა იგეგმება. ხევი-უბისას 12.2 კმ-იანი მონაკვეთის მშენებლობას აზიის განვითარების ბანკი (ADB) აფინანსებს. პროექტის ღირებულება 732 296 478 ლარია და სამუშაოების განხორციელების ვადად 3 წელია განსაზღვრული.