დღეს ხარაგაულის მუნიციპალიტეტის მერმა, ნიკოლოზ თოფურიძემ საკრებულოს ბიუროს წევრებს გაწეული მუშაობის შესახებ ანგარიში წარუდგინა. საკითხის განხილვა კითხვა- პასუხის ფორმატში წარიმართა. საკრებულოს საფინანსო-საბიუჯეტო კომისიის თავმჯდომარე, ვარლამ ჭიპაშვილი  დაინტერესდა, რა მიზეზით შეფერხდა სტიქიის სალიკვიდაციო ფონდიდან გამოყოფილი თანხით საუბნო გზების რეაბილიტაცია ბაზალეთში, რა  შედეგები გამოიღო ა(ა)იპ-ების რეორგანიზაციამ და  რომელი პროექტების დაფინანსებაზე აწარმოებს მერია მოლაპარაკებებს მუნიციპალური განვითარების ფონდთან. ნიკოლოზ თოფურიძის განცხადებით, სტიქიის სალიკვიდაციო ფონდიდან დასაფინანსებელ პროექტებზე ტენდერში არაკეთილსინდისიერმა მეწარმემ გაიმარჯვა, რის შედეგადაც,  ამ დრომდე, ვერ მოხერხდა ბაზალეთში პროექტების განხორციელება. ნიკოლოზ თოფურიძის განმარტებით, ბაზალეთში ნანიტაშვილების გზის რეაბილიტაციის პროექტი, ამ დროისათვის ტენდერზეა და სამშენებლო სამუშაოები დაიწყება. მუნიციპალიტეტის მერმა, ასევე, მუნიციპალური განვითარების ფონდში წარდგენილ პროექტებზე ისაუბრა. ესენია ღორეშა-ბაზალეთის დამაკავშირებელი გზის რეაბილიტაცია, კიცხის სკოლის რეაბილიტაცია, სოფლებში ვერტყვიჭალასა და საღანძილეში საბავშო ბაღების მშენებლობა, ასევე, ნადაბურის ხიდის რეაბილიტაცია. კომენტარი გააკეთა მერმა ა(ა)იპ-ების რეორგანიზაცია-ოპტიმიზაციის შესახებაც და აღნიშნა, რომ ეს პროცესი ჯერ არ დასრულებულა და ხარაგაულში რეორგანიზაციები ისევ გაგრძელდება.  ფრაქცია „თვითმმართველობა ხალხისთვის“ თავმჯდომარე ინგა მაღრაძე დაინტერესდა, რა ბედი ეწევა ცენტრალურ პარკში არსებულ ამფითეატრს. მისი აზრით, ასევე ვერანაირი შედეგი ვერ გამოიღო ა(ა)იპ-ების რეორგანიზაციამ. ნიკოლოზ თოფურიძის თქმით, ამფითეატრთან დაკავშირებით ლევან სამხარაულის ექსპერტიზამ   დადო დასკვნა, რომ შენობა ექსპლუატაციისთვის არ არის ვარგისი. აღნიშნულიდან გამომდინარე უნდა მოხდეს ობიექტის დემონტაჟი და აშენდეს ახალი. დეპუტატ მალხაზ ფხალაძის განცხადებით, წყალაფორეთის ადმინისტრაციულ ერთეულში ყველაზე მეტად წყალთან დაკავშირებით არის პრობლემები. ნიკოლოზ თოფურიძის ინფორმაციით, 2019 წელი, მერიამ წყლის წლად გამოაცხადა, ამისთვის ბიუჯეტში თანხებიც განისაზღვრა. მერი განმარტავს, რომ ადგილობრივი ბიუჯეტის დაფინანსებას, დაემატება სოფლის მხარდაჭერის პროგრამით გამოყოფილი თანხები და სახელმწიფოს ნება, რომელიც არტეზიული ჭების დაფინანსებას გეგმავს.  ფრაქცია „ქართული-ოცნება მრეწველების“ თავმჯდომარემ  ვალოდა კელენჯერიძემ „საპატიო ხარაგაულელის“ სტატუსის მინიჭებასთან დაკავშირებით ისაუბრა. ვალოდა კელენჯერიძის განცხადებით, სპატიო ხარაგაულელის წოდება მიენიჭა 2014-2015 წლებში რამდენიმე წარმატებულ ხარაგაულელს და კარგი იქნება ეს ტრადიცია თუ აღდგება. ნიკოლოზ თოფურიძემ აღნიშნა, რომ მომავალ წელს აუცილებლად მოხდება „საპატიო ხარაგაულელების“  არჩევა. ხარაგაულის მერის წლიურ ანგარიშს საკრებულო 2019 წლის 8 იანვარს მორიგ სხდომაზე მოისმენს. ბიუროს სხდომაზე ასევე განიხილეს 2018 წელს რეგიონული განვითარების ფონდში წარსადგენი დასაფინანსებელი პროექტები, რომელიც ინფრასტრუქტურის სამსახურის უფროსმა თემურ თაბუკაშვილმა წარადგინა. ხარაგაულის მუნიციპალიტეტის მერია, რეგიონალური განვითარების ფონდში 9 057 304 მილიონამდე ლარის ღირებულების პროექტებს წარადგენს. ბიუროს წევრებმა, რეგიონული განვითარების ფონდში წარსადგენი პროექტები მოიწონეს, რომელთა განხილვა კომისიებში გაგრძელდება და საკითხი 24 დეკემბრის საკრებულოს რიგგარეშე სხდომაზე გავა. სხდომაზე საფინანსო-საბიუჯეტო სამსახურის უფროსმა ვლადიმერ გელაშვილმა მორიგი საბიუჯეტო ცვლილება წარადგინა. ვლადიმერ გელაშვილის განცხადებით, სტიქიის სალიკვიდაციო ფონდიდან ხარაგაულის მუნიციპალიტეტს 60 ათასი ლარი ჩაერიცხა. ამავე სხდომაზე დეპუტატებმა განიხილეს ფრაქცია „ქართული-ოცნება მრეწველების“ ანგარიში, რომელიც ამავე ფრაქციის თავმჯდომარემ, იუზა კელენჯერიძემ წარუდგინა ბიუროს წევრებს. სხდომაზე ასევე განიხილეს: 1. ხარაგაულის მუნიციპალიტეტის საკრებულოს სამანდატო საპროცედურო საკითხთა და ეთიკის კომისიის ანგარიში გაწეული მუშაობის შესახებ; 2. ხარაგაულის მუნიციპალიტეტის საკრებულოს 2017 წლის 21 ნოემბრის #50/72 განკარგულებაში „ხარაგაულის მუნიციპალიტეტის საკრებულოს საფინანსო - საბიუჯეტო კომისიის შემადგენლობის დამტკიცების შესახებ“ ცვლილების შეტანის თაობაზე.

ხევი-უბისას ავტობანის მშენებლობასთან დაკავშირებით სავტომობილო გზების დეპარტამენტის განსახლების სამსახურისა და ხარაგაულის მუნიციპალიტეტის ადგილობრივი ხელისუფლების ერთობლივი, საინფორმაციო შეხვედრა წითელ ზოლში მოხვედრილ მოსახლეობასთან, გრძელდება.  ამ ეტაპზე მიმდინარეობს სასოფლო და არასასოფლო-სამეურნეო მიწების შეფასება, რაზეც მოსახლეობის შეკითხვებს განსახლების სამსახურის წარმომადგენლებთან ერთად, კერძო კომპანიის ექსპერტ-შემფასებელმაც უპასუ ხა. ხარაგაულის მერი, ნიკოლოზ თოფურიძე განმარტავს, რომ წითელ ზოლში მოხვედრილ მოსახლეობასთან შეხვედრები სისტემატურად ტარდება, როგორც ერთობლივ, ასევე ინდივიდუალურ რეჟიმში.  მერის ინფორმაციით, მნიშვნელოვანია ქვეყნისთვის ასეთი მასშტაბური პროექტის განხორციელებას ხელი შევუწყოთ და ეს, არცთუ ისე სასიამოვნო პროცესი, რასაც განსახლება ქვია, ორივე მხარისთვის სასარგებლოდ დასრულდეს.  „ადგილობრივი თვითმმართველობა, ისევე როგორც სახელმწიფო, ბოლომდე დაიცავს მოსახლეობის ინტერესებს. ჩვენ იქამდე ვიქნებით ყოველდღიურ რეჟიმში ჩართული ამ პროცესებში, ვიდრე ისე არ დარეგულირდება საკითხი, რომ დაზარალებული არ დარჩნენ მხარეები“- განაცხადა ნიკოლოზ თოფურიძემ.

გაცნობებთ, რომ ხარაგაულის მუნიციპალიტეტის საკრებულო 12 დეკემბერს, 11 საათზე,  რიგგარეშე  სხდომას გამართავს. სხდომაზე შემდეგ საკითხებს განიხილავენ: ხარაგაულის მუნიციპალიტეტის საკრებულოს 2017 წლის 19 დეკემბრის N42 დადგენილებაში ,,ხარაგაულის მუნიციპალიტეტის თვითმმართველი ერთეულის 2018 წლის ბიუჯეტის დამტკიცების შესახებ“ ცვლილების შეტანის თაობაზე მომხს: ვლადიმერ გელაშვილი ხარაგაულის მუნიციპალიტეტის თვითმმართველი ერთეულის 2019 წლის ბიუჯეტის დამტკიცების შესახებ მომხს: ვლადიმერ გელაშვილი ხარაგაულის მუნიციპალიტეტის საკრებულოს თავმჯდომარის ანგარიში გაწეული მუშაობის შესახებ მომხს: მანანა ბარბაქაძე ხარაგაულის მუნიციპალიტეტის გენდერული თანასწორობის საბჭოს მიერ გაწეული მუშაობის შესახებ ანგარიში მომხს: მანანა ბარბაქაძე ხარაგაულის მუნიციპალიტეტის საკრებულოს 2019 წლის წლიური და კვარტალური სამუშაო გეგმის დამტკიცების შესახებ მომხს: მანანა ბარბაქაძე ფრაქცია „ძალა ერთობაშია“-ს რეგისტრაციის ცნობად მიღების შესახებ მომხს: ოთარ ლურსმანაშვილი

დღეს ხარაგაულის მუნიციპალიტეტის კინოთეატრში არასამთავრობო ორგანიზაციამ „სამოქალაქო საზოგადოების განათლების ცენტრის“ წარმომადგენლებმა, ლანა მოწონელიძემ და ია კაშიამ საინფორმაციო შეხვედრა გამართეს. შეხვედრას ხარაგაულის საგანმანათლებლო რესურსცენტრის წარმომადგენლები, საჯარო სკოლების დირექტორები და სხვადასხვა ორგანიზაციის წარმომადგენლები ესწრებოდნენ. შეხვედრა განათლების მიღმა დარჩენილი ბავშვების განათლების სისტემაში ჩართულობასა და საზოგადოებაში ინტეგრაციას ეხებოდა. მოზარდის პიროვნული განვითარებისათვის, სოციალიზაციისათვის და პროფესიული უნარების შესაძენად აუცილებელია მისი საგანმანათლებლო პროცესში ჩართვა, მიუხედავად მისი სოციალური სტატუსის, ჯანმრთელობის, ეთნიკური, რელიგიური თუ სხვა მდგომარეობისა. არასრულფასოვანი განათლება მოზარდს მრავალი რისკის წინაშე აყენებს. ხშირად ის ვერ ახერხებს საფრთხეების თავიდან არიდებას და  არასასურველი გავლენის ქვეშ ხვდება. განათლების მიღმა ძირითადად ის   მოზარდები რჩებიან, რომლებიც არიან სოციალურად დაუცველთა ოჯახებიდან, შეზღუდული შესაძლებლობების მქონე, ოჯახურ მეურნეობაში ჩართული, ქუჩაში მცხოვრები ბავშვები და ა.შ. არსებობს სხვადასხვა სახის დაწესებულებები, დღისა და კრიზისული მომსახურების ცენტრები, მცირე საოჯახო სახლები, სადაც მზრუნველობის გარეშე დარჩენილ, სხვადასხვა სახის პრობლემების მქონე ბავშვებს იღებენ, თუმცა, როგორც არასამთავრობო ორგანიზაციის წარმომადგენელმა ია კაშიამ განაცხადა, აღნიშნულ დაწესებულებებში არის რიგი პრობლემები. სახელმწიფო ცდილობს მათ 18 წლამდე პროფესია მისცეს, რადგან ამის შემდეგ ეს ადამიანები სახელმწიფო ზრუნვის გარეშე რჩებიან. არსებობს ახალგაზრდული სახლები, სადაც 21 წლამდე შესაძლებელია მათი ცხოვრება, გარკვეული პირობების დაკმაყოფილების შემთხვევაში, თუმცა მათი რაოდენობა ძალიან მცირეა. ბორის საჯარო სკოლა-პანსიონის დირექტორმა, ჰამლეტ ბერაძემ სკოლის ბაზაზე არსებული დღის ცენტრის მნიშვნელობაზე ისაუბრა და აღნიშნა, რომ აუცილებელია სახელმწიფომ გააძლიეროს ყურადღება მზრუნველობა მოკლებული მოზარდებისთვის შექმნას უკეთესი პირობები, რათა მათ შეძლონ სრულფასოვანი განათლების მიღება და საზოგადოებაში ინტეგრაცია. შეხვედრაზე, ასევე, განიხილეს   საქართველოს მთავრობის კანონმდებლობა, რომლის ძალით ბავშვის განათლების უფლების დარღვევა კვალიფიცირდება მოზარდზე ძალადობად. სკოლის მიღმა დარჩენილი ბავშვების შესახებ ინფორმაციის მოპოვებასა და რეაგირებაზე პასუხისმგებელი არიან შემდეგი ორგანიზაციები: საქართველოს შინაგან საქმეთა სამინისტრო, სკოლები, სხვა საგანმანათლებლო დაწესებულებები, ბავშვთა სპეციალიზებული დაწესებულებები, სამედიცინო სერვისების მიმწოდებლები და მუნიციპალიტეტის მერია. საინფორმაციო კამპანიას აღნიშნული არასამთავრობო ორგანიზაციის მონაწილეობით, მთელი ქვეყნის მასშტაბით, განათლების, კულტურისა და სპორტის სამინისტრო ატარებს.  

დღეს ხარაგაულის მუნიციპალიტეტის საკრებულოს ბიუროს სხდომა გაიმართა. სხდომაზე ბიუროს წევრებმა მორიგი საბიუჯეტო ცვლილება განიხილეს. საკითხი მერიის საფინანსო-საბიუჯეტო სამსახურის უფროსმა, ვლადიმერ გელაშვილმა წარადგინა. ვლადიმერ გელაშვილის განმარტებით, საბიუჯეტო ვალდებულებების შესასრულებლად ხარაგაულის მუნიციპალიტეტს დამატებით 145 600 ლარი სჭირდება. კერძოდ, საკრებულოს  შრომის ანაზღაურების ხარჯების გასაცემად - 35 600 ლარი, ა(ა)იპ სკოლამდელ დაწესებულებათა გაერთიანებას ხელფასებისა და სხვა გადაუდებელი ხარჯებისთვის - 80 000 ლარი, სოციალური პროგრამებისათვის - 30 000 ლარი. სხდომაზე ბიუროს წევრები დაინტერესდნენ ახალი წლისთვის გაიცემა თუ არა   სოციალურად დაუცველი ოჯახებისათვის დახმარებები. განათლების, კულტურის, სპორტისა და ახალგაზრდულ საკითხთა კომისიის თავმჯდომარემ, დავით კიკნაძემ აღნიშნა, რომ მუნიციპალიტეტში გაჭირვებული ოჯახები ცხოვრობენ, რომლებზეც წინასაახალწლოდ მინიმალური თანხით  დახმარებაც კი მნიშვნელოვანი იქნება. როგორც სხდომაზე ჯანდაცვისა და სოციალურ საკითხთა სამსახურის უფროსმა, ნანა კიკნაძემ განმარტა, ახალი წლისთვის უკიდურესად გაჭირვებული ოჯახებისათვის, ერთჯერადი მატერიალური დახმარებისთვის ბიუჯეტიდან - 5 000 ლარი გაიხარჯება. საკრებულოს საფინანსო-საბიუჯეტო კომისიის თავმჯდომარის, ვარლამ ჭიპაშვილის აზრით, ერთჯერადი დახმარებებისთვის - 5 ათასი ლარი მცირეა და 10 ათას ლარამდე უნდა გაიზარდოს.  ვარლამ ჭიპაშვილის პოზიცია გაიზიარა ბიუროს წევრთა უმრავლესობამ. დღევანდელ სხდომაზე ასევე განიხილეს 2019 წლის ბიუჯეტის პროექტი, რომელსაც საკრებულო 14 დეკემბერს დაამტკიცებს.  სხდომაზე, ახალი ფრაქციის  „ძალა ერთობაშია“ შექმნასთან დაკავშირებით განცხადება გააკეთა, საკრებულოს იურდიული, სამანდატო, საპროცედურო და ეთიკის კომისიის თავმჯდომარემ, ოთარ ლურსმანაშვილმა. ფრაქცია შექმნა, ნაციონალური მოძრაობის წევრებმა, თორნიკე ავალიშვილმა, ქეთევან ზუმბაძე და დავით მაღლაფერიძემ(ევროპული საქართველოს წევრი). ახალი ფრაქციის თავმჯდომარე იქნება თორნიკე ავალიშვილი, ხოლო მოადგილე, ქეთევან ზუმბაძე ბიუროს სხდომაზე ასევე განიხილეს ხარაგაულის მუნიციპალიტეტის საკრებულოს თავმჯდომარის ანგარიში გაწეული მუშაობის შესახებ მომხს: მანანა ბარბაქაძე ხარაგაულის მუნიციპალიტეტის გენდერული თანასწორობის საბჭოს მიერ გაწეული მუშაობის შესახებ ანგარიში მომხს: მანანა ბარბაქაძე ხარაგაულის მუნიციპალიტეტის საკრებულოს 2019 წლის წლიური და კვარტალური სამუშაო გეგმის დამტკიცების შესახებ მომხს: მანანა ბარბაქაძე  

აქცია - პერფორმანსით დაასრულა ხარაგაულის მუნიციპალიტეტის გენდერული თანასწორობის საბჭომ ქალთა მიმართ ძალადობის წინააღმდეგ მიძღვნილი კამპანია. ,,მოლაპარაკე ფეხსაცმელები“ - სიმბოლურად ასე უწოდეს პერფორმანსს, რომელსაც ყველაზე მეტი მამაკაცი დამთვალიერებელი ჰყავდა.  ,,ჩვენ ამ ფორმით შევეცადეთ, ხმამაღლა მოგვეყოლა ქალების ამბები, იმ ქალების, რომელთა უფლებები არაა დაცული. თითოეული ქალის ფეხსაცმელი ჰყვება ისტორიას, რომელთაგან ყველა რეალურია. ჩვენ ავიღეთ პროტოტიპები, რომლებთანაც შეხება გვქონია,  ჩვენ გარშემო ცხოვრობს და ვერ საუბრობს თავის მძიმე ცხოვრებაზე. აქციას ყველაზე მეტი მამაკაცი დამთვალიერებლები ჰყავდა, საინტერესო იყო მათი რეაქციები.  ყურადღების მიქცევის და სათქმელის ამ ფორმით გამოხატვის ეს  მეთოდი დიდი ხანია  გამოიყენება მსოფლიოში სხვადასხვა აქციის დროს. ჩვენ ვგმობთ ძალადობის ნებისმიერი სახეს. კამპანია დასრულდა, მაგრამ საუბარი , განსჯა და ფიქრი ამ თემაზე კვლავ გრძელდება“ - ამბობს მერის თანაშემწე გენდერულ საკითხებში ინგა ბერაძე. წელს ქალთა მიმართ ძალადობის წინააღმდეგ მიმართული კამპანიის მოწოდება გახლდათ ,,შევაჩეროთ ძალადობა ქალთა მიმართ შრომით სამყაროში“. კამპანიის ბოლო დღეს შეხვედრა ჩატარდა, ასევე, ბაზალეთის საჯარო სკოლის მოსწავლეებთან, თემაზე - გენდერული თანასწორობა.                                                            

ხარაგაულის მუნიციპალიტეტის მერი, ნიკოლოზ თოფურიძე ხევი-უბისას მონაკვეთზე (F2 - II სექცია) ავტობანის მშენებლობის მიზნით ტენდერში გამარჯვებული ჩინური კომპანიის - Hunan Road and Bridge Construction Group -ის მთავარ მენეჯერს ტაი სინაგიანგს და წარმომადგენლებს შეხვდა.  შეხვედრზე მშენებლობის დაწყებამდე მოსამზადებელ სამუშაოებზე ისაუბრეს.  ჩინური მხარის განცხადებით, ასეთი მნიშვნელოვანი პროექტის განხორციელების დროს აუცილებელია მჭიდრო კონტაქტი ადგილობრივ ხელისუფლებასთან.  მოგეხსენებათ ხევი-უბისას 12,2 კილომეტრიანი მონაკვეთი მთლიანად ხარაგაულის მუნიციპალიტეტის ტერიტორიაზე გაივლის, რაც ოთხზოლიანი გზის საფარის მოწყობას, 35 ახალი ხიდისა და 18 გვირაბის მშენებლობას გულისხმობს.  როგორც შეხვდრის დროს აღინიშნა, მოსამზადებელი სამუშაოები 3-4 თვე გაგრძელდება, რის შემდეგაც 2019 წლის გაზაფხულზე ავტობანის მშენებლობა დაიწყება.  სახელშეკრულებო ვადებით ხევი-უბისას მონაკვეთის მშენებლობა სამ წელიწადში დასრულდება.

კიცხში გიორგაძეების უბანში 30-მდე ოჯახს, მათ შორის კიცხის საბავშვო ბაღს, სასმელი წყალი მიეწოდება.  ხარაგაულის მუნიციპალიტეტის მერი ნიკოლოზ თოფურიძე შესრულებულ სამუშაოებს ადგილზე გაეცნო და აღნიშნა, რომ ეს პროექტი განსაკუთრებით მნიშვნელოვანი იყო საბავშვო ბაღისთვის. სასმელი წყლის მაგისტრალის რეაბილიტაციისთვის რეზერვუარი და წყლის მილები მერიის ბიუჯეტიდან შეიძინეს, სამუშაოები კი ადგილობრივმა მოსახლეობამ საკუთარი ძალებით შეასრულა. სოფელ კიცხში წყლის სისტემის მოსაწყობად სამუშაოები მიმდინარეობს ასევე მდინარაძეების უბანში. ადგილობრივი ბიუჯეტის დაფინანსებით და მოსახლეობის ჩართულობით მილების გაყვანის შემდეგ, სასმელი წყალი 29 ოჯახს მიეწოდება.  ხარაგაულის მერის, ნიკოლოზ თოფურიძის ინფორმაციით, კიცხში კეთილმოეწყობა ასევე, სათავე ნაგებობა, საიდანაც სასმელი წყლით სოფელში მცხოვრები 30-ზე მეტი ოჯახი მარაგდება. 2019 წელი მერიამ წყლის წლად გამოაცხადა და პროექტი წყალი ყველა სოფელს უკვე აქტიურ ფაზაშია. მერის განცხადებით, სასმელი წყლის პრობლემა ყველა სოფელში უნდა მოგვარდეს.

ხარაგაულის მუნიციპალიტეტის მერი, ნიკოლოზ თოფურიძე, კიცხის იგორეთში მცხოვრებ გოჩა ბოგვერაძეს ესტუმრა და ა(ა)იპ „სათნობის სახლის“ სახელით საკვები პროდუქტები გადასცა. გოჩა ბოგვერაძე მარტოხელაა, არ აქვს სოციალური დახმარება და ძალიან ხელმოკლედ ცხოვრობს. მან მარჯვენა ხელი და ფეხი, 2009 წელს, უბედური შემთხვევის შედეგად დაკარგა.  როგორც მუნიციპალიტეტის მერმა განმარტა, იგი პირადად გაუწევს გოჩას შუამდგომლობას სოციალურ სააგენტოსთან, რათა დროულად დაენიშნოს ფულადი დახმარება და მისი ყოფა შემსუბუქდეს. ნიკოლოზ თოფურიძის ინფორმაციით, მუნიციპალიტეტის მასშტაბით, რამდენიმე ასეთი მარტოხელა, კიდურების გარეშე დარჩენილი ადამიანი ცხოვრობს, რომელთაც ფიზიკური შრომა არ შეუძლიათ და შემწეობას არ იღებენ. მერი ყველა ასეთ ადამიანთან პირადად მისვლას გეგმავს, რათა პრობლემები ადგილზე მოისმინოს და შესაბამისი ზომები მიიღოს.    

,,შევაჩეროთ ძალადობა ქალთა მიმართ შრომის სამყაროში“ - ასეთი არის წელს გენდერული ძალადობის წინააღმდეგ მიმართული კამპანიის მოწოდება, რომლის ფარგლებში მთელ მსოფლოში 16 აქტიური დღე უკვე 25 წელია აღინიშნება . კამპანიის ფარგლებში ხარაგაულის  მუნიციპალიტეტის საკრებულოში გენდერული თანასწორობის  საბჭოს სხდომა გაიმართა, რომელსაც საბჭოს თავმჯდომარე, მანანა ბარბაქაძე ხელმძღვანელობდა. სხდომაზე საბჭოს წევრებთან ერთად, იმ ა(ა)იპების წარმომადგენლები იყვნენ მოწვეული, რომლებიც თავიანთი საქმიანობით ხარაგაულის მოსწავლე-ახალგაზრობას ემსახურებიან. ესენია - ,,კულტურისა და ხელოვნების ცენტრი“, „შ. ბუაჩიძის სახელობის სამუსიკო სკოლა“, ,,მოსწავლე - ახალგაზრდობის სახლი“ და „სპორტისა და შიდა ტურიზმის ცენტრი.“ ა(ა)იპ-ების ხელმძღვანელებს ვთხოვეთ ანგარიშში ეჩვენებინათ როგორია ბავშვების ჩართულობა და წრეების მიხედვით დაგვენახა გენდერული ბალანსი. სად უფრო მეტია გოგონების ინტერესი, სად ბიჭების -  აღინიშნა შეხვედრის დროს. აღსანიშნავია, რომ მოსწავლე ახალგაზრდობის სახლში  6-დან 18 წლამდე ბავშვები ირიცხება, მაგრამ აქტივობა  14-15 წლის ასაკის შემდეგ იკლებს, აღნიშნული ასაკობრივი კატეგორია ძირითადად  საგნობრივ წრეებში დადის, რადგან უმრავლესობა მათგანი აბიტურიენტია. სულ მოსწავლეთა სახლში 202 ბავშვი ირიცხება, აქედან 62 ბიჭია. ბიჭები ჩართულები არიან ყველა წრის საქმიანობაში.  აღსანიშნავია მათი დაინტერესება ქსოვის ერთ-ერთი სახეობის ,,მაკრამეს“ შესწავლით, ხოლო გოგონების - ხის მხატვრული დამუშავებით, ამ წრეში 12 ბავშვიდან 4 ბიჭი და 8 გოგოა. წლის განმავლობაში ღონისძიებებისა და  წრეობრივი სამუშაოებისთვის  ა(ა)იპ-ს 2 250 ლარი ჰქონდა განსაზღვრული ( წრეობრივი მუშაობისთვის მასალების შესაძენად). გასულ წელთან შედარებით მოსწავლე ახალგაზრდობის სახლში მოსწავლეთა კონტიგენტი 40 ბავშვით არის გაზრდილი. რაც შეეხება ,,სპორტისა და შიდა  ტურიზმის ცენტრს“, აქ 10 სახეობის 24 სპორტული სექცია დაბასთან ერთად ხარაგაულის 10 სოფელში ფუნქციონირებს. ისევე, როგორც მოისწავლე ახლაგაზრდობის სახლში აქაც ყველა სექცია უფასოა, სპორტულ სექციებში გაერთიანებული 376 ბავშვიდან 54 გოგონაა და 322 ვაჟი. გოგონები ჩართულები არიან სპორტის ისეთ სახეობებში როგორიცაა ძიუდო ( 110 ვაჟი - 4 გოგო), კალათბურთი ( 40 ვაჟი - 35 გოგო ), კარატე (21 ვაჟი - 8 გოგო ), მძლეოსნობა (12 ვაჟი - 5 გოგო), მაგიდის ჩოგბურთი (6 ვაჟი - 2 გოგო). სხვადასხვა სპორტულ ღონისძიებებზე მიმდინარე წელს გაიხარჯა 13 800 ლარი ( მგზავრობა, ღამის თევა და კვება). რაც შეხეება შ. ბუაჩიძის სახელობის სამუსიკო სკოლას აქ მუსიკალურ განათლებას 69 გოგო და 11 ვაჟი იღებს. სკოლაში სწავლა ფასიანია და გადასახადი თვეში 10 ლარს შეადგენს. აღსანიშნავია, რომ სამუსიკო სკოლის ბაზაზე უკევ მეორე წელია ფუნქცონირებს ვოკალურ - ინსტრუმენტალური ბენდი ,,გრავე“, რომელმაც მუსიკით დაინტერესებული ბიჭებისთვის მიღება უკვე გამოაცხადა. ინგა ბერაძე ( მერის თანაშემწე გენდერულ და არასამთავრობო ორგანიზაციებთან ურთიერთობის საკითხებში). ,,ძალიან საინტერესო ანალიზი გაკეთდა, ზოგადად ყურადღება მისაქცევია ის, რომ ერთია როგორი  ჩართულობა გვაქვს ამა თუ იმ წრეზე, ვაჟების და გოგონების მხრიდან, მაგრამ მეორეა, ვთავაზობთ თუ არა ჩვენ მოსწავლე ახალგაზრდობას მათ ინტერესებზე გათვლილ აქტივობებს. სპორტისა და ტურიზმის ცენტრში არ გვაქვს წრე, რომელიც უშუალოდ გოგონებისთვის იქნება განკუთვნილი, მაგალითად ტანვარჯიში ან ჩოგბურთი, მიზეზი არის ის, რომ არ გვყავს  შესაბამისი  სპეციალისტი, ჩოგბურთის შემთხვევაში - შესაფერისი ინფრასტრუქტურული გარემო. კარგი იქნება თუ ასეთი ანალიზის გაკეთების  შემდეგ ზუსტად გავთვლით ვის ვაწოდებთ სერვისს  და არის თუ არა მასში როგორც ბიჭების ისე გოგონების ინტერესები შესაბამისად დაკმაყოფილებული და ასევე, აქცენტს გავაკეთებთ ხარისხზე. გენდერული საბჭო შესაძლებლობების ფარგლებში, აქტიურად ითანამშრომლებს ა(ა)იპ-ებთან, როგორც  გამოწვევების დასაძლევად, ისე  გარკვეული სიახლეების და მიღწევების  პოპულარიზაციის მიზნით.“ შეხვედრაზე საუბარი შეეხო ასევე, შრომით სფეროში ქალთა უფლებების დაცვას. მოხდა კონკრეტული მაგალითების განხილვა და მასზე მსჯელობა. დაიგმო გენდერული თუ პოლიტიკური ნიშნით დისკრიმინაციის ყველა სახის ფორმა. მუხედვად იმისა, რომ შრომის კოდექსი, ეროვნული კანონები, ქვეყნის მიერ რატიფიცირებული საერთაშორისო დოკუმენტები, მათ შორის კონვენცია ქალის დისკრიმინაციის ყველა ფორმის ლიკვიდაციის შესახებ - კრძალავს დისკრიმინაციას, მაინც ხშირია ქალთა უფლებების დარღვევა შრომის ბაზარზე, როგორც წინასახელშეკრულებო ეტაპზე, ასევე სახელშეკრულებო ურთიერთობებში. ხარაგაულის მუნიციპალიტეტის გენდერული თანასწორობის საბჭო მადლობას უხდის ა/ო ,,ქალთა საინფორმაციო ცენტრს“ და კულტურულ - ჰუმანიტარულ ფონდ ,,სოხუმს“ გაწეული საინფორმაციო მხარდაჭერისთვის.