პროექტის დაგეგმე შენი ბიუჯეტი  შესახებ დიმა ჩიკვაიძემ მეგობრებიდან და ხარაგაულის მუნიციპალიტეტის მერიის ოფიციალური ფეისბუქ გვერდიდან გაიგო , სადაც სიახლეებს, როგორც ამბობს, ყოველთვის ეცნობა.  დიმა ჩიკვაიძე:  ვისურვებდი თითოეული მოქალაქე რაიონის ბიუჯეტის შედგენაში აქტიურად იღებდეს თავის წვლილს, გრძნობდეს პასუხისმგებლობას, იმიტომ რომ ეს ბიუჯეტი ჩემი, თქვენი და ყველას გადახდილი გადასახადებიდან გროვდება და სწორედ  მოქალაქეების  საჭიროებებზე და კეთილდღეობაზე უნდა იყოს მორგებული, რაშიც ჩვენი ჩართულობა და თანამონაწილეობა აუცილებელია . პროექტის_აღწერა:  პროექტი დაბა ხარაგაულში, ქუჩის კალათბურთის სტადიონის მიმდებარე ტერიტორიაზე, სპორტულ-გასართობი სივრცის, კერძოდ, ფრენბურთის მოედნის მოწყობას ითვალისწინებს.  უკანასკნელი წლების განმავლობაში, ფრენბურთი ხარაგაულელი ახალგაზრდებისათვის, ერთ-ერთ საყვარელ სპორტად ჩამოყალიბდა. აღსანიშავია, ის ფაქტიც, რომ მათ ეს ძალიან კარგად გამოსდით.  დაახლოებით 10 წელია, რაც ხარაგაულში ფრენბურთის ჩემპიონატები ტარდება, აღნიშნულ სპორტში ჩართულია, როგორც დაბის ასევე  ხარაგაულის მუნიციპალიტეტში შემავალი ადმინისტრაციული ერთეულების მაცხოვრებლებიც.  ყოველ წელს იზრდება როგორც მონაწილეების ასევე მაყურებლების რაოდენობაც, რადგან იზრდება სპორტისადმი დაინტერესება და შესაბამისად იზრდება თამაშის ხარისხიც.  იმის გამო, რომ რაიონში არაა ფრენბურთის მოედანი, ყოველ წელს გვიწევს დევების მიმდებარე ტერიტორიის მომზადება ჩემპიონატისთვის ან პირველი სკოლის ადმინისტრაციისთვის თხოვნა, რომ თავიანთი სტადიონი დაგვითმონ. ვფიქრობ, ფრენბურთის მოედნის მოწყობა ხელს შეუწყობს აღნიშნული სპორტის კიდევ უფრო მეტად პოპულარიზებას. და რაც მთავარია, ხარაგაულელი ახალგაზრდები შეძლებენ საყვარელ სპორტის სახეობა, შესაბამის ინფრასტრუქტურულ გარემოში ითამაშონ.  პროექტის იდეაა,  ჯანსაღი ცხოვრების წესის დამკვიდრება ახალგაზრდებში. 3️⃣1️⃣ ოქტომბრამდე ქვემოთ მოცემული ბმულის საშუალებით შეგიძლიათ აირჩიოთ თქვენთვის სასურველი საპროექტო წინადადება და მხარი დაუჭიროთ მის გამარჯვებას. https://bit.ly/3lOrBnW ხმის მიცემის პრინციპი:  საპროექტო წინადადებაზე ხმის მიცემა შეუძლია ხარაგაულის მუნიციპალიტეტში რეგისტრირებულ საქართველოს მოქალაქეს. თითო მოქალაქეს აქვს 1️⃣ პროექტზე ხმის მიცემის უფლება.  ხარაგაულის მერია, ყოველდღიურ რეჟიმში, ინდივიდუალურად გაგაცნობთ  კენჭისყრის ეტაპზე  გადასული პროექტების ავტორებს და მათ იდეებთან დაკავშირებით სრულ ინფორმაციას მოგაწვდით.  შეგახსენებთ, ,,დაგეგმე შენი ბიუჯეტი,, პროექტის ფარგლებში, ხარაგაულის მუნიციპალიტეტის მერიაში სულ  25 საპროექტო წინადადება შემოვიდა, ხმის მიცემის ეტაპზე 16 იდეა გადავიდა. პროექტი გერმანიის საერთაშორისო თანამშრომლობის საზოგადოების (GIZ) მხარდაჭერით ხორციელდება . ხარაგაულის მუნიციპალიტეტის მერია-Kharagauli Municipality Hall    

ხარაგაულის მუნიციპალიტეტის მერიაში „მაღალმთიან დასახლებაში მცხოვრებთა სტატუსის მართვის საბჭოს“  სხდომა გაიმართა. საბჭოს გადაწყვეტილებით ორ პირს მაღალთიან დასახლებაში მცხოვრები პირის სტატუსი მიენიჭა. შეგახსენებთ, რომ მაღალმთიან დასახლებაში მცხოვრების სტატუსის მინიჭების მიზნით, ფიზიკურმა პირმა  მუნიციპალიტეტის მერს შესაბამისი განცხადებით უნდა მიმართოს. განცახადებას თან უნდა დაერთოს მოქალაქის პირადობის დამადასტურებელი დოკუმენტის ასლი, მაღალმთიან დასახლებაში კალენდარული წლის განმავლობაში  9 თვის ან მეტი ვადით ფაქტობრივად ცხოვრების და მაღალმთიან დასახლებაში რეგისტრაციის დამადასტურებელი დოკუმენტი. დოკუმენტების წარმოდგენის შემდეგ კომისია ორი თვის განმავლობაში შეისწავლის საკითხს. ხარაგაულის „მაღალმთიან დასახლებაში მცხოვრებთა სტატუსის მართვის საბჭოს“ თავმჯდომარე იურიდიული განყოფილების უფროსი ინგა ლურსმანაშვილი გახლავთ.  მოადგილე - იურიდიული განყოფილების  პირველი კატეგორიის უფროსი სპეციალისტი თამარ სულაქველიძე;  სხდომის მდივანი - ადმინისტრაციული სამსახურის მეორე კატეგორიის უფროსი  სპეციალისტი ნინო ფერაძე; საბჭოს წევრები: თამთა მეტრეველი (იურიდიული განყოფილების მესამე კატეგორიის უფროსი სპეციალისტი); ალექსანდრე ტაბატაძე (სოციალური დაცვის განყოფილების უფროსი). შეგახსენებთ, რომ ხარაგაულის მუნიციპალიტეტიდან მაღალმთიან დასახლებათა ნუსხაში 11 სოფელი შედის: გოლისი, გოლათუბანი, გუდათუბანი, ფონა, ნუნისი, პატარა სახვლარი, ზვარე, ჩრდილი, გედსამანია, წიფა, ბჟინევი. მაღალმთიანი დასახლებაში მცხოვრები სტატუსი ხარაგაულში  1 172 ფიზიკურ პირს აქვს მინიჭებული. ოქმი      

,,დაგეგმე შენი ბიუჯეტი” პროექტის ფარგლებში, ხარაგაულის მუნციიპალიტეტის მერიაში სულ 25 საპროექტო წინადადება შემოვიდა, ხმის მიცემის ეტაპზე 16 იდეა გადავიდა. მათგან ერთ-ერთი იდეა ხარაგაულელ ზურა თაბუკაშვილს ეკუთვნის. ,,ხარაგაული ჩაიფიქრე“ ასეთია  პროექტის სახელწოდება, რომელიც გამარჯვების შემთხვევაში პატარა ხარაგაულის სერზე განხორციელდება. ზურა თაბუკაშვილი, კომპანია  ,,numbers'' -ის ფინანსური აღრიცხვის დეპარტამენტის ხელმძღვანელია. კოვიდ პანდემიის გამო, ზურა  დისტანციურად მუშაობს ხარაგაულიდან. სწორედ აქ ყოფნის პერიოდში გაიგო თავის მეგობრისგან  პროგრამის ,,დაგეგმე შენი ბიუჯეტის“ შესახებ. ,,ჩემი ბავშვობა  სწორედ პატარა ხარაგაულს უკავშირდება. იმ ადგილთან, სადაც პროექტის განხორციელება მსურს  არაერთი მოგონება მაკავშირებს. სწორედ ამიტომ გადავწყვიტე ამ შესაძლებლობის გამოყენება, რომ ადგილი, საიდანაც ხარაგაულის ულამაზესი ხედები იშლება , საინტერესო და სიმბოლური გახდეს, როგორც ადგილობრივებისთვის ასევე სტუმრებისთვის. პროექტის აღწერა: სარეკრეაციო ზონის მოწყობა პატარა ხარაგაულის სერზე, კერძოდ ჯვრის მიმდებარე ტერიტორიაზე. აქ არის უმშვენიერესი ხედები, სასიამოვნო გარემო, რაც ხაზს უსვამს ჩვენი რაიონის სილამაზეს. სარეკრეაციო ზონაში მოიაზრება ორსაჯდომიანი საქანელა,რომელიც   მნახველს მისცემს  საშუალებას მოწყდეს რეალურ სამყაროს, თითქოს დაფრინავს ხარაგაულის თავზე, პირდაპირი და გადატანითი მნიშვნელობით,  ასევე ფოტოს გადასაღები ჩარჩო , რომელიც უბიძგებს ადგილზე მისულ ტურისტებსა თუ ადგილობრივებს გადაიღონ ფოტოები, განათავსონ ისინი სოციალურ ქსელში და გაუზიარონ ფართო საზოგადოებას,რაც  საბოლოოდ ხელს შეუწყობს ხარაგაულის ტურისტული პოტენციალის ზრდას. პროექტი ასევე ითვალისწინებს ასევე   გადმოსახედი ე.წ. ,,ფანჩატურის“ მოპწყობას, მისი მეშვეობით  ადგილზე მისულ ადამიანებს   შესაძლებლობა ექნებათ ხანგრძლივად  დატკბნენ არაჩვეულებრივი გარემოთი, და ბუნებასთან ახლოს და ხმაურისგან შორს დაისვენონ. 3️⃣1️⃣ ოქტომბრამდე ქვემოთ მოცემული ბმულის საშუალებით შეგიძლიათ აირჩიოთ თქვენთვის სასურველი საპროექტო წინადადება და მხარი დაუჭიროთ მის გამარჯვებას. https://bit.ly/3lOrBnW ❗ხმის მიცემის პრინციპი:  საპროექტო წინადადებაზე ხმის მიცემა შეუძლია ხარაგაულის მუნიციპალიტეტში რეგისტრირებულ საქართველოს მოქალაქეს. თითო მოქალაქეს აქვს 1️⃣ პროექტზე ხმის მიცემის უფლება. ხარაგაულის მერია ინდივიდუალურად გაგაცნობთ  კენჭისყრის ეტაპზე  გადასული პროექტების ავტორებს და მათ იდეებთან დაკავშირებით სრულ ინფორმაციას შემოგთავაზებთ. პროექტს ხარაგაულის მუნიციპალიტეტის მერია, გერმანიის საერთაშორისო თანამშრომლობის საზოგადოების (GIZ) მხარდაჭერით ახორციელებს.    

ახლადრეაბილიტირებული სკოლა დღეს იმერეთში სახელმწიფო რწმუნებულმა, ზვიად შალამბერიძემ,  ხარაგაულის მერ, კობა ლურსმანაშვილთან,საკრებულოს თავმჯდომარესთან, მანანა ბარბაქაძესთან, მაჟორიტარ დეპუტატ პაატა კვიჟინაძესთან და ხარაგაულის საგანმანათლებლო სფეროს და ადგილობრივი ხელისუფლების წარმომადგენლებთან ერთად დაათვალიერა და მოსწავლეებსა და პედაგოგებს სასწავლო წლის დაწყება მიულოცა.    ,, საგანმანათლებლო ინფრასტრუქტურის მოწყობა არის უმთავრესი პრიორიტეტი ჩვენი ხელისუფლებისთვის, რის ფარგლებშიც წელს უკვე იმერეთში 7 ახალი სკოლა აშენდა და მოხდა 3 სკოლის სრული რეაბილიტაცია. რა თქმა უნდა ჩვენ გავაგრძელებთ სასკოლო ინფრასტრუქტურის მოწყობას სანამ თითოეულ  ბავშვს, როგორც სკოლის მოსწავლეს ასევე, საბავშვო ბაღის აღსაზრდელს არ ექნება ის პირობები, რაც მათთვის არის მისაღები და კომფორტული " - ზვიად შალამბერიძე.   ხარაგაულის მერი, კობა ლურსმანაშვილი:    ,,დღეს ჩვენ დავათვალიერეთ სოფელ  ვერტყვიჭალაში ევროპული დონის სკოლა, რომელმაც დიდი შთაბეჭდილება მოახდინა ჩვენზე. რაც მთავარია,ხარაგაულში ჩვენ გვაქვს ახალი აშენებული სკოლა კიცხის თემში და ახლად რეაბილიტურებული სკოლა სოფელ მარელისში. ასეთი ინფრასტრუქტურული პროექტები გაგრძელდება. საქართველოს სახელმწიფოს პოლიტიკა მიმართული და ორიენტირებულია  განათლების სისტემის,ბავშვების ,მასწავლებლების გაძლიერებისაკენ,  რომელიც ვფიქრობ შედეგს გამოიღებს და ჩვენ გვეყოლება კომფორტულ გარემოში აღზრდილი შესანიშნავი მომავალი თაობები."     მაჟორიტარი დეპუტატი, პაატა კვიჟინაძე:    ,,ძალიან მიხარია რომ ვარ დღეს ვერტვიჭალაში, ვულოცავ სოფელს ,მოსწავლეებს , მასწავლებლებს და განსაკუთრებით პირველკლასელებს.ბედნიერებაა ასეთ სკოლაში სწავლა და იმედი მაქვს ჩვენ  უახლოეს პერიოდში არა მარტო ხარაგაულში,არამედ მთელ საქართველოში ასეთი ტიპის თანამედროვე სკოლები გვექნება."     ვერტყვიჭალის საჯარო სკოლის დირექტორი ლენა აბაშიძე:   ,,სასიხარულოა დღევანდელი დღე , გაუსაძლის პირობებში უწევდა სკოლას ფუნქციონირება, განათლების სამინისტროს და ადგილობრივი ხელისუფლების თანადგომით მოხდა სკოლის სრული რეაბილიტაცია. გამოვხატავ ძალიან დიდ მადლიერებას ,რადგან სკოლა სრულიად ახალ , თანამედროვე, ევროპული  სტანტარტების მქონე გარემოში იწყებს სასწავლო წელს."   100 წლის წინ აშენებულ სკოლას სრული რეაბილიტაცია რეგიონული განვითარების და ინფრასტრუქტურის სამინისტროს მუნიციპალური განვითარების ფონდის ფინანსური მხარდაჭერით განხორციელდა და სამუშაოებისთვის 2 500 000-მდე ლარი დაიხარჯა.    აღნიშნული სკოლით 5 მიმდებარე სოფლის მოსახლეობა სარგებლობს. ამ ეტაპზე საჯარო სკოლაში 140 მოსწავლე არის რეგისტრირებული.    რეაბილიტირებული სკოლის შენობა თანამედროვე საერთაშორისო სტანდარტების შესაბამისია. პროექტის ფარგლებში მოხდა შენობის სრული რეაბილიტაცია, მოეწყო შშმ პირებისთვის ადაპტირებული გარემო, რეკრეაციული სივრცე და ღია სპორტული ინფრასტრუქტურა.   სკოლას აქვს  ბიბლიოთეკა,  კომპიუტერული ლაბორატორია, საბუნებისმეტყველო საგნების კაბინეტი. შენობაში განთავსებულია სპორტდარბაზი.    შენობის შიდა ნაწილში დამონტაჟებულია ლიფტი, ხოლო შენობის გარეთ პანდუსი მოეწყო, რომელიც შშმ პირებს  შესაძლებლობას მისცემს უპრობლემოდ გადაადგილდნენ.    სოფელ ვერტყვიჭალას სკოლა 330 ბავშვზეა გათვლილი.      

სექტემბრის თვეში სოციალური პროგრამებით  520-მა ბენეფიციარმა ისარგებლა, რისთვისაც ხარაგაულის მერიის ადგილობრივი ბიუჯეტიდან 67892 ლარი გაიცა.  ადმინისტრაციული დაპირებით დაკმაყოფილდა  69 განცხადება, თანხით 45485 ლარი.  ახალშობილთა ოჯახების დახმარების ქვეპროგრამით  9 ოჯახმა ისარგებლა, რისთვისაც 1100 ლარი გაიცა.  ერთჯერადი ფინანსური დახმარების ქვეპროგრამით 236 განცხადება  28650 ლარით დაკმაყოფილდა.  სამკურნალო და საოპერაციო ხარჯების დახმარების ქვეპროგრამით ანგარიშსწორება მოხდა - 47 განცხადებაზე და სამკურნალო დაწესებულებებში გადაირიცხა  28848 ლარი. შშმ პირთა მკურნალობის მიზნით შემოსულ 2 განცხადებაზე  1634 ლარი. მრავალშვილიანი ოჯახების დახმარების პროგრამის ფარგლებში 3 განცხადება 500 ლარით დაკმაყოფილდა.  მარტოხელა მშობლის დახმარება - 1 განცხადება  200 ლარი. ბინის ქირით უზრუნველყოფის მიზნით შემოსული 5 განცხადებაზე 900 ლარი გაიცა.  ხარაგაულის მერიის სოციალურ პროგრამებში, ყოველთვიური დახმარების ქვეპროგრამებით მოსარგებლეა 148 ბენეფიციარი. მათ შორის, დიალეზზე მყოფი პაციენტების დახმარება მიიღო 13  პირმა, რისთვისაც 1950  ლარი გაიცა. უსინათლო პირთა დახმარების პროგრამით ისარგებლა  78 პირმა თანხით  2340 ლარი.  შშმ პირთა მომვლელის დახმარების მიზნით 36 პირზე 1140 ლარი გაიცა.   დევნილთა დახმარების პროგრამით 18 პირს  540 ლარი ჩაერიცხა. სამამულო ომის ვეტერანის დახმარების პროგრამით ისარგებლა 3 ვეტერანმა -  90 ლარი. სექტემბრის თვეში, ხარაგაულის მერიას, დახმარების გაწევის მიზნით, 351 ადამიანმა მიმართა.    

პროექტით გათვალისწინებულ სამუშაოებს დღეს მერის პირველი მოადგილე, ვარლამ ჭიპაშვილი, მოადგილესთან , დავით დევდარიანთან ერთად გაეცნო. ვარლამ ჭიპაშვილი: ,,ხელისუფლება ასრულებს დაპირებას. ხარაგაულის მერის, კობა ლურსმანაშვილის ძალისხმევით, დიდვაკის მაცხოვრებლებისთვის  მნიშვნელოვანი პრობლემა გადაიჭრა. ეს არის კიდევ ერთი მაგალითი იმის, რომ ადგილობრივი ხელისუფლების ერთ-ერთი მთავარი პრიორიტეტი ინფრასტრუქტურული  მიმართულებაა.  ჩვენ 2022  წელს საკმაოდ  დიდი თანხების მობილიზებას შევძლებთ ინფრასტრუქტურის  მიმართულებით  და არაერთი პროექტი განხორციელდება.  ეს არის  დასახლება, სადაც მოსახლეობის მცირე რაოდენობაა,  მაგრამ ჩვენი ოპონენტების გასაგონად მინდა ვთქვა ,რომ გადაწყვეტილებების მიღებისას ჩვენ  მხოლოდ პრობლემის სიმძიმეს ვითვალისწინებთ და არა ამომრჩეველთა რაოდენობას.“ მერის მოადგილე, დავით დევდარიანი ,,დიდვაკის დაზიანებულ მრავალსართულიან ბინაში ამ დროისთვის 19 ოჯახი ცხოვრობს.აღნიშნული პროექტის განხორციელებით მათთვის მნიშვნელოვანი პრობლემა გადაიჭრება. პროექტის ღირებულება 201 850 ლარია. სამუშაოები ხელშეკრულებით გათვალისწინებულ ვადებში მიმდინარეობს და წლის ბოლომდე ადგილობრივი მაცხოვრებლები კომფორტულ და მოწესრიგებულ გარემოში შეძლებენ ცხოვრებას.“ შეგახსენებთ , რომ დიდვაკეში ასევე  დასრულდა სამსართულიან საცხოვრებელი  კორპუსის საერთო  სარგებლობის  კიბის უჯრედების  რეაბილიტაცია,  ამჯერად მიმდინარეობს  ხუთსართულიანი ბინის სახურავის შეცვლა. აღნიშნული  პროექტი  ხარაგაულის   ადგილობრივი  ბიუჯეტიდან   37 786   ლარით  დაფინანსდა.     

4 ოქტომბერს ხარაგაულის მუნიციპალიტეტის საკრებულოს  სხდომა გაიმართა. სხდომას საკრებულოს თავმჯდომარე მანანა ბარბაქაძე უძღვებოდა. სხდომას ესწრებოდა მერის მოადგილე დავით დევდარიანი, რომელიც  ინფრასტრუქტურულ პროექტებთან დაკავშირებით არესებულ კითხვებს პასუხობდა. საკრებულოს წევრებს პირველი საკითხი მერიის ინფრასტრუქტურისა და კეთილმოწყობის სამსახურის უფროსმა, პეტრე შარიქაძემ წარუდგინა, რომელმაც 2020-2021 წლებში დაგეგმილ ინფრასტრუქტურული პროექტების შესრულებასთან დაკავშირებით ამომწურავად ისაუბრა.   „მიმდინარე წელს რეგიონული განვითარების ფონდიდან ხარაგაული 5 521 191 ლარით დაფინანსდა. აღნიშნული თანხით დაიგეგმა 30 პროექტი, მათგან სამშენებლო სამუშაოები  დასრულებულია  20 პროექტზე . დარჩენილ 10-ზე კი ინტენსიური სამუშაოები მიმდინარეობს. პეტრე  შარიქაძემ ასევე ისაუბრა „მაღალმთიანი დასახლებების განვითარების ფონდიდან“ დაფინანსებულ პროექტებზეც და აღნიშნა, რომ სოფელ ზვარესა და გედსამანიაში, გზის მობეტონების სამუშაოები წინსწრებით შესრულდა.   სხდომაზე დეპუატატები ასევე გაეცვნენ ადგილობრივი ბიუჯეტიდან, სტიქიის სალიკვიდაციო და სოფლის მხარდაჭერის პროგრამით დაფინანსებულ პროექტებს. პეტრე შარიქაძემ განმარტება გააკეთა ასევე 2018-2019 წლებში დაუსრულებელ პროექტებთან დაკავშირებით: „ მერიამ ხელშეკრულება შეუწყვიტა იმ კომპანიებს, რომლებმაც სამუშაოები 2018-2019 წლებში ვერ შეასრულეს.  ხელშეკრულება შეწყდა 11 პროექტზე. შემდეგ, ფასთა ცვლილების გამო საჭირო გახდა პროექტების გადაფასება გაზრდილი ღირებულება შეივსო ადგილობრივი სახსრებით -299 215 ლარით. ასეთი იყო 11 პროექტი, ხელშეკრულება გაფორმდა 10 პროექტზე, 8 მათგანზე სამუშაოები დასრულებულია. დარჩენილი 2 პროექტიდან 1-ზე ხელშეკრულება შეწყვეტილია. 1 -ზე კი-მიმდინარეობს ინტენსიური სამუშაოები.“ სხდომაზე ასევე განხილული იყო  ხარაგაულის მუნიციპალიტეტის მერიაში შექმნილი ,,თვითნებურად დაკავებულ მიწაზე საკუთრების უფლების აღიარების კომისიის“ მიერ, 2021 წლის 1 იანვრიდან 1 ივლისამდე გაწეული საქმიანობის შესახებ ანგარიში. საკითხი ხარაგაულის მუნიციპალიტეტის მერიის იურდიული განყოფილების უფროსმა, ინგა ლურსმანაშვილა წარადგინა.  განყოფილების უფროსმა კომისიის საქმიანობასა და უფლებამოსილებებზე ამომწურავად ისაუბრა.   მისი განმარტებით “სსიპ „საჯარო რეესტრის ეროვნული სააგენტოდან“ შუამდგომლობით განსახილველად გადმოიგზავნა 41 განაცხადი, რომელთაგანაც 4-ზე გაიცა საკუთრების უფლება, ხოლო უარი ეთქვა 4 დაინტერესებულ პირს.   განხილვის პროცესშია-23 განაცხადი.“  კომისიამ განიხილა ასევე 2020 წელს საჯარო რეესტრის ეროვნულ სააგენტოდან გადმოგზავნილი 46 განაცხადი, რომელთაგანაც 26 განაცხადით სარეგისტრაციოდ წარდგენილი მიწის ნაკვეთი დაექვემდებარა საკუთრების უფლების აღიარებას და შესაბამისად გაიცა საკუთრების უფლების მოწმობები. 4 განაცხადზე, რომლითაც მოთხოვნილი იყო რეგისტრირებულ მონაცემებში ცვლილების რეგისტრაცია, მიღებული იქნა დადებითი გადაწყვეტილება, გამოიცა განკარგულებები და შესაბამისი ბეჭდით დამოწმებული თანდართული ნახაზებით გადაეგზავნა საჯარო რეესტრს. უარი ეთქვა 11 დაინტერესებულ პირს. სხდომაზე ასევე განხილული იყო „ ხარაგაულის მუნიციპალიტეტის საკრებულოს 2017 წლის 20 ნოემბრის N50/70 განკარგულებაში „ხარაგაულის მუნიციპალიტეტის საკრებულოს ბიუროს შემადგენლობის დამტკიცების შესახებ“ ცვლილების შეტანის თაობაზე .   მომხსენებელი: ოთარი ლურსმანაშვილი            

დღეს სკოლის კარი პირველად 218 პირველკლასელმა შეაღო სწავლა საკლასო ოთახებში კოვიდპანდემიის რეგულაციების სრული დაცვით განახლდა.   მოსწავლეებს სასწავლო წლის დაწყება ხარაგაულის საგანმანათლებლო რესურსცენტრის უფროსმა მარინა ვეფხვაძემ, სპმთპ-ის ხარაგაულის რაიონული ორგანიზაციის თავმჯდომარესთან,  ლალი სებისკვერაძესთან და ხარაგაულის საგანმანათლებლო რესურსცენტრის პედაგოგთან, თინათინ ბოჭორიშვილთან ერთად მიულოცა. მარინა ვეფხვაძე: ,,ვულოცავ ყველას ახალი სასწავლო წლის დაწყებას, განსაკუთრებული ემოცია ახლავს დღევანდელ დღეს, ძალიან ბევრი სირთულე გამოვიარეთ ერთად, ბევრჯერ მოგვიწია  გამოწვევების წინაშე დგომამ, მაგრამ იმედი მაქვს ჩვეულებრივ რიტმში გაგრძელდება სწავლა, დავიცავთ კოვიდ პანდემიის წესებს და შევძლებთ რომ მთელი წლის განმავლობაში, სასწავლო პროცესი  სკოლის კედლებში გავატაროთ“. მარგვეთისა და უბისის ეპისკოპოსთან , მეუფე მელქისედეკ ხაჩიძესთან, ერთად განსაკუთრებული საზეიმო განწყობით შეხვდა ახალ სასწავლო წელს, ხარაგაულის წმ. ანდრია პირველწოდებულის სახელობის სასულიერო გიმნაზია. პირველკლასელებს სასკოლო სახელმძღვანელოები და პორტაბელური კომპიუტერები, როგორც გასულ წლებში, ამჯერადაც საჩუქრად გადაეცათ. ახალ სასწავლო წელს სიახლეებით შეხვდა კიცხის, მარელისისა და ვერტყვიჭალის საჯარო სკოლები.   კიცხში  მოსწავლეებმა ახალ, ევროპული სტანდარტების შესაბამისი სკოლაში დაიწყეს სწავლა. სრული რეაბილიტაცია ჩაუტარდათ  მარელისისა და ვერტყვიჭალის საჯარო სკოლებს. სკოლამდელი დაწესებულებები სასწავლო-სააღმზრდელო პროცესს 6 ოქტომბრიდან დაიწყებენ.       

4 ოქტომბერს ხარაგაულის მუნიციპალიტეტის საკრებულოს მორიგი სხდომა გაიმართება. სხომაზე განხილული იქნება შემდეგი საკითხები: ხარაგაულის მუნიციპალიტეტის საკრებულოს ეკონომიკის, ქონების მართვისა და ინფრასტრუქტურის საკითხთა კომისიის ანგარიში გაწეული მუშაობის შესახებ მომხსენებელი: მალხაზ ფხალაძე   ხარაგაულის მუნიციპალიტეტის ადმინისტრაციულ ერთეულებში 2020 და 2021 წლის განვლილ პერიოდში დაგეგმილი ინფრასტრუქტურული პროექტების შესრულების მდგომარეობის შესახებ მომხსენბელი: პეტრე შარიქაძე ხარაგაულის მუნიციპალიტეტის საკრებულოს 2017 წლის 20 ნოემბრის N50/70 განკარგულებაში „ხარაგაულის მუნიციპალიტეტის საკრებულოს ბიუროს შემადგენლობის დამტკიცების შესახებ“ ცვლილების შეტანის თაობაზე                                                                                         მომხსენებელი: ოთარი ლურსმანაშვილი   სხვადასხვა:   ხარაგაულის მუნიციპალიტეტის მერიაში შექმნილი ,,თვითნებურად დაკავებულ მიწაზე საკუთრების უფლების აღიარების კომისიის“ მიერ, 2021 წლის 01 იანვრიდან 01 ივლისამდე გაწეული საქმიანობის შესახებ ანგარიში მომხსენები: ინგა  ლურსმანაშვილი   ხარაგაულის მუნიციპალიტეტიში covid – 19 - ის გავრცელების მდგომარეობისა და პანდემიის პრევენციის მიზნით გატარებული ღონისძიებების შესახებ ინფორმაცია                                                  მომხსენებელი: შმაგი ხიჯაკაძე        

დღეს, ხარაგაულის მუნიციპალიტეტის მერის მოვალეობის შემსრულებელმა, დავით დევდარიანმა ადგილობრივი თვითმმართველობის წარმომადგენლებთან ერთად,  აფხაზეთის ომში გმირულად დაღუპულთა მემორიალი გვირგვინით შეამკო.  სამხედრო დაპირისპირება, აფხაზეთში, 1992 წლის 14 აგვისტოს დაიწყო, რომელიც 13 თვე და 13 დღე გაგრძელდა და 1993 წლის 27 სექტემბერს, სოხუმის დაცემით დასრულდა.  ომში 10 ათასზე მეტი ქართველი ჯარისკაცი და მშვიდობიანი მოქალაქე დაიღუპა, 300 ათასი კი - საკუთარი სახლებიდან დევნილად იქცა.  საქართველოს ტერიტორიული მთლიანობისთვის დაღუპული გმირები ხარაგაულიდან!   გელა კაპანაძე - 20 წლის  პაატა თაბაგარი - 21 წლის  თეიმურაზ ბაბლიძე - 23 წლის  მამუკა თაბუკაშვილი - 20 წლის  თენგიზ ჭიპაშვილი - 40 წლის  ზურაბ(ხვიჩა) მუმლაძე - 25 წლის  არსენ ბერაძე - 29 წლის  ნოდარ თავზარაშვილი - 31 წლის  ხვიჩა ჭყოიძე - 29 წლის  გოჩა ჩადუნელი - 19 წლის  კობა გელაშვილი - 21 წლის  თამაზ ლომიძე - 19 წლის  ალექსანდრე მდინარაძე - 21 წლის  მერაბ გელაშვილი - 33 წლის  როინ პავლაძე - 23 წლის  ალექსანდრე ბერაძე - 23 წლის  გიორგი ლურსმანაშვილი - 22 წლის  ზურაბ გელაშვილი - 30 წლის  სამუელ ჭყოიძე - 22 წლის  იოსებ პაქსაშვილი - 20 წლის  რეზო ვეფხვაძე - 24 წლის  ზაზა გლუნჩაძე - 29 წლის. აფხაზეთის ომში დაღუპულთა ხსოვნის პატივის მისაგებად, ყველა სახელმწიფო უწყების შენობაზე სახელმწიფო დროშები დაშვებულია.