ხარაგაულის მუნიციპალიტეტის მერი კობა ლურსმანაშვილი მოლითი–წიფა–ფონა–ჩუმათელეთის საავტომობილო გზის მონაკვეთზე მიმდინარე სამუშაო პროცესს ადგილზე გაეცნო. საავტომობილო გზის რეაბილიტაციის პროცესი ხარაგაულის მუნიციპალიტეტში აქტიურად გრძელდება. ამ ეტაპზე მიმდინარეობს ასფალტის საფარის დაგება. გზა უკვე მოასფალტებულია სოფელ წიფამდე, ხოლო სამუშაოები გრძელდება ფონა–ჩუმათელეთის მიმართულებით. გზის დარჩენილ მონაკვეთზე მოსამზადებელი და საფუძვლის მოწყობის სამუშაოების ძირითადი ნაწილი დასრულებულია და მონაკვეთი ეტაპობრივად მზადდება ასფალტის საფარის დასაგებად. განახლებული საგზაო ინფრასტრუქტურა მნიშვნელოვნად გააუმჯობესებს გადაადგილებას, გაზრდის ხელმისაწვდომობას და განვითარების ახალ შესაძლებლობებს შექმნის. მერის შეფასებით, მსგავსი მასშტაბის ინფრასტრუქტურული პროექტები არა მხოლოდ გადაადგილების გამარტივებას ემსახურება, არამედ მნიშვნელოვან გავლენას ახდენს სოფლების სიცოცხლისუნარიანობაზე, ეკონომიკურ აქტივობასა და მოსახლეობის ყოველდღიურ ცხოვრებაზე. 50-კილომეტრიანი პროექტის პირველი ეტაპი — ძირულა–მოლითის 25-კილომეტრიანი მონაკვეთი — უკვე დასრულებულია . პროექტის მეორე ეტაპზე — მოლითი–ფონა–ჩუმათელეთის მიმართულებით, 25-კილომეტრიანი მონაკვეთიდან დაახლოებით 20 კმ-ზე ასფალტის საფარი უკვე მოწყობილია. შედეგად, პროექტის ფარგლებში ჯამში 45 კილომეტრამდე გზა უკვე მოასფალტებულია, ხოლო სამუშაოები საბოლოო მონაკვეთამდე აქტიურად გრძელდება. სამუშაო პროცესს მერთან ერთად გაეცნენ მერის მოადგილეები ვარლამ ჭიპაშვილი და დავით დევდარიანი, საკრებულოს ინფრასტრუქტურისა და კეთილმოწყობის კომისიის თავმჯდომარე ბესიკ კვირიკაშვილი, მერის წარმომადგენელი მაია გაჩეჩილაძე და საკრებულოს მაჟორიტარი დეპუტატი , ბესიკ ტალახაძე.

 საქართველოს განათლების, მეცნიერებისა და ახალგაზრდობის სსიპ - ახალგაზრდობის სააგენტომ, პროგრამის „ახალგაზრდული ღონისძიებების ხელშეწყობა“ ქვეპროგრამის – „ახალგაზრდების მონაწილეობის გაძლიერება“ ფარგლებში დაიწყო მასშტაბური პროექტი „გაეროს მოდელირება“. პროექტი ემსახურება „სახელმწიფო ახალგაზრდული სტრატეგია 2023–2026“-ით განსაზღვრული მიზნების განხორციელებას და მიზნად ისახავს საქართველოს მთელ ტერიტორიაზე მაცხოვრებელ ახალგაზრდებში გაერთიანებული ერების ორგანიზაციის საქმიანობის, საერთაშორისო ურთიერთობებისა და გლობალური გამოწვევების შესახებ ცნობიერების ამაღლებას, ასევე სიმულაციური პროცესის მეშვეობით მოლაპარაკების, კრიტიკული აზროვნებისა და კოლექტიური გადაწყვეტილებების მიღების უნარების განვითარებას. პროექტის ფარგლებში იგეგმება 11 რეგიონულ ცენტრში გაეროს მოდელირების ჩატარება, რომელშიც მონაწილეობას მიიღებენ 14 დან - 18 წლამდე ახალგაზრდები. თითოეული რეგიონიდან კონკურსის წესით გაეროს მოდელირებაში შეირჩევა და მონაწილეობას მიიღებს 100 ახალგაზრდა, პროექტის პირველ ეტაპზე, რომელიც განხორციელდება რეგიონულ ცენტრებში შეირჩევიან საუკეთესო მონაწილეები, რომლებიც დასაჩუქრდებიან სამახსოვრო პრიზებით და მეორე ეტაპზე მონაწილეობას მიიღებენ ქ.თბილისში გასამართ შემაჯამებელ ღონისძიებაში, რომლის ფარგლებში გამოვლინდებიან გამარჯვებულები და შესაძლებლობა ექნებათ მონაწილეობა მიიღონ საერთაშორისო ღონისძიებაში. პროექტის შესახებ ინფორმაცია და სარეგისტრაციო ფორმა იხილეთ ბმულზე: https://forms.office.com/pages/responsepage.aspx? id=POnSYT1CtEOPIxWAwjQZUvaDIv0PP1lDmJ1ja_smO_5UOFZZVkI1WUdHR1EwQjlJMDNaVTFLV0Y2NC4u &route=short სსიპ - ახალგაზრდობის სააგენტოდან “გაეროს მოდელირების” ფარგლებში საკონტაქტო პირი : პროგრამების მართვის დეპარტამენტის პროექტების მართვის სამმართველოს მეორე კატეგორიის უფროსი სპეციალისტი თამარ კაკულია. ელ-ფოსტა t.kakulia@youthagency.gov.ge, ტელ: 577267777.