ხარაგაულის მერის, კობა ლურსმანაშვილის ინიციატივით მერიის სოციალური პოლიტიკის ფარგლებში, უკვე მესამე წელია გაზაფხულის დღესასწაულებთან დაკავშირებით მრავალშვილიან დედებს სიმბოლური საჩუქრები გადაეცემათ. დღეს, ხარაგაულის მერის პირველმა მოადგილემ, ვარლამ ჭიპაშვილი, ადგილობრივი ხელისუფლების წარმომადგენლებთან ერთად მრავალშვილიან დედებს ოჯახებში ესტუმრა, გაზაფხულის დღესასწაულები მიულოცა და მერიის სახელით საყოფაცხოვრებო ტექნიკა გადასცა. მხარდაჭერის ფარგლებში, უბისაში, ბორითში, ვერტყვიჭალასა და სოფელ ხონში მცხოვრებ პაქსაშვილების, სებისკვერაძეების, გურეშიძეების, ბარბაქაძეებისა და შველიძეების ოჯახებს სარეცხი მანქანები, გაზქურა და წყლის გამათბობელი გადაეცათ. ვარლამ ჭიპაშვილის განცხადებით, ხარაგაულის მერიის სოციალური პოლიტიკა მიზანმიმართულად არის მიმართული ოჯახების საჭიროებების შესწავლასა და მათ რეალურ მხარდაჭერაზე. ვარლამ ჭიპაშვილი: „ხარაგაულის მერია სოციალური მიმართულებით აქტიურად მუშაობს. ჩვენი სოციალური სამსახური და ბავშვთა განყოფილება მრავალშვილიან ოჯახებთან მთელი წლის განმავლობაში მუდმივ რეჟიმში თანამშრომლობს, რაც გვაძლევს საშუალებას კარგად ვიცოდეთ მათი საჭიროებები და შესაბამისი პროგრამებით მათ მიზანმიმართული მხარდაჭერა გავუწიოთ. დღეს მონახულებულ ოჯახებს შორის არის ოჯახიც, რომელსაც მრავალშვილიანი ოჯახების ბინის უზრუნველყოფის სახელმწიფო პროგრამის ფარგლებში საცხოვრებელი შევუძინეთ, ხოლო რამდენიმე ოჯახი ამ ეტაპზე დაფინანსების მოლოდინშია. ჩვენი პასუხისმგებლობაა, რომ ასეთ ოჯახებს მუდმივი მხარდაჭერა ჰქონდეთ და გრძნობდნენ, რომ მუნიციპალიტეტი მათ გვერდით დგას.“ მრავალშვილიან ოჯახებს მერის პირველი მოადგილე სპორტის ცენტრის ხელმძღვანელთან, რევაზ შერგელაშვილთან, მაჟორიტარ დეპუტატთან ლენა აბაშიძესთან, ასევე მერის წარმომადგენლებთან — ბადრი ბარბაქაძესთან, ქეთი კუბლაშვილთან და ემზარ აბულაძესთან ერთად ესტუმრა. ხარაგაულის მერია სოციალური პოლიტიკის ფარგლებში მთელი წლის განმავლობაში განაგრძობს მრავალშვილიანი ოჯახებისა და სხვადასხვა მოწყვლადი ჯგუფების მხარდაჭერას და მათი გაძლიერებისკენ მიმართულ პროგრამებს აქტიურად განახორციელებს.

სსიპ ახალგაზრდობის სააგენტომ, პროგრამის „ახალგაზრდული ღონისძიებების ხელშეწყობა“ ქვეპროგრამის – „მუნიციპალიტეტების შესაძლებლობების გაძლიერება“ ფარგლებში დაიწყო პროექტი „ახალგაზრდული საქმიანობის დელეგატი“. პროექტი ემსახურება „სახელმწიფო ახალგაზრდული სტრატეგია 2023–2026“-ით განსაზღვრული მიზნების განხორციელებას და ახალგაზრდული პოლიტიკის გაძლიერებას ადგილობრივ დონეზე. პროექტის მიზანია ადგილობრივ თემებში ახალგაზრდული სფეროს გაძლიერება, ახალგაზრდების სამოქალაქო ჩართულობის ზრდა და მათთვის არსებული შესაძლებლობების შესახებ ინფორმაციის ხელმისაწვდომობის გაუმჯობესება. ახალგაზრდული საქმიანობის დელეგატის როლი გულისხმობს ახალგაზრდობის სააგენტოსა და ადგილობრივი მუნიციპალიტეტების მიერ გამოცხადებული პროგრამებისა და შესაძლებლობების შესახებ ინფორმაციის გავრცელებას, ძირითადად სოციალური პლატფორმების მეშვეობით. დელეგატები უზრუნველყოფენ სააგენტოსა და მუნიციპალიტეტის აქტივობების, კონკურსებისა და ინიციატივების შესახებ კომუნიკაციას ონლაინ არხებში, რათა ინფორმაცია სწრაფად და ეფექტიანად მიეწოდოს ადგილობრივ ახალგაზრდებს. ასევე, დელეგატი აქტიურად თანამშრომლობს ახალგაზრდებთან და ადგილობრივ თვითმმართველობასთან, აორგანიზებს საინფორმაციო შეხვედრებსა და მცირე მასშტაბის აქტივობებს. პროექტის ფარგლებში, ქვეყნის მასშტაბით, ღია კონკურსის წესით თითოეული მუნიციპალიტეტიდან შეირჩევა ერთი ახალგაზრდული საქმიანობის დელეგატი — ჯამში 64 ახალგაზრდა (16-დან 29 წლამდე). დელეგატების შერჩევა განხორციელდება ორეტაპიანი პროცესის საფუძველზე: პირველ ეტაპზე მოხდება მიღებული განაცხადების ტექნიკური გადარჩევა წინასწარ განსაზღვრული კრიტერიუმების შესაბამისად; მეორე ეტაპზე კანდიდატებთან ჩატარდება გასაუბრება მათი მოტივაციის, გამოცდილებისა და საჭირო უნარების შეფასების მიზნით. შერჩეული კანდიდატები გაივლიან სპეციალურ გადამზადებას თბილისში და ამის შემდეგ შეუდგებიან დელეგატის საქმიანობას საკუთარ მუნიციპალიტეტში. პროექტის ფარგლებში ახალგაზრდობის სააგენტო დელეგატებს სთავაზობს: სპეციალურ გადამზადებას ლიდერული და ციფრული უნარების გასაძლიერებლად; ტექნიკურ მხარდაჭერას პროექტის განხორციელების პროცესში; სააგენტოს პროგრამებსა და ღონისძიებებში აქტიური ჩართულობის შესაძლებლობას. წლის ბოლოს განხორციელებული საქმიანობის შეფასების საფუძველზე შეირჩევა ხუთი საუკეთესო დელეგატი, რომელთათვისაც ორგანიზებული იქნება საერთაშორისო სასწავლო ვიზიტი ცოდნისა და გამოცდილების გასაღრმავებლად. განაცხადების მიღება დაიწყო 20 თებერვალს და დასრულდება 3 მარტს. მოვუწოდებთ დაინტერესებულ ახალგაზრდებს, გამოიყენონ შესაძლებლობა და მიიღონ მონაწილეობა პროექტში.