ხარაგაულის მერმა , კობა ლურსმანაშვილმა დღეს საკადრო ცვლილებების შესახებ ოფიციალური განცხადება გააკეთა. მერის გადაწყვეტილებით, ა(ა)იპ  ,,მოსწავლე - ახალგაზრდობის სახლს" ახალი დირექტორი ჰყავს. აღნიშნული პოზიციას ჰამლეტ ბერაძე დაიკავებს,რომელიც  2005 - 2019 წლებში ბორის სკოლა - პანსიონის დირექტორი გახლდათ. დირექტორის მოადგილის პოზიციაზე გააგრძელებს საქმიანობას  მოსწავლე-ახალგაზრდობის სახლის დირექტორი მაია ბლუაშვილი.    ა(ა)იპ ,, კულტურისა და ხელოვნების ცენტრის”  მამუკა ჭიპაშვილი უხელმძღვანელებს, რომელიც ამ დრომდე  სკოლამდელ დაწესებულებათა გაერთიანების დირექტორი გახლდათ. ეთერ კიკნაძის სახელობის სკოლამდელ დაწესებულებათა გაერთიანების დირექტორის მოვალეობას თამარ ლაცაბიძე შეასრულებს. მერის მრჩევლის პოზიციაზე, კულტურის საკითხებში  გააგრძელებს საქმიანობას ნიკოლოზ მაჭავარიანი, რომელიც დღემდე ,,კულტურისა და ხელოვნების ცენტრის" დირექტორის პოზიციას იკავებდა. კობა ლურსმანაშვილის  განცხადებით, საკადრო ცვლილებების მიზანი ეფექტური საქმიანობის განხორციელება, ახალი მენეჯმენტით ახალ შედეგებზე გასვლა და საზოგადოებისთვის საინტერესო და მნიშვნელოვანი პროექტების შეთავაზებაა. ხარაგაულის მერი ახლად დანიშნულ ხელმძღვანელ პირებს , ოფიციალურად, უახლოეს დღეებში წარადგენს.  

ხარაგაულის მერის, კობა ლურსმანაშვილის  გადაწყვეტილებით, ა(ა)იპ  ,,მოსწავლე - ახალგაზრდობის სახლს" ახალი დირექტორი ჰყავს. აღნიშნული პოზიციას ჰამლეტ ბერაძე დაიკავებს,რომელიც  2005 - 2019 წლებში ბორის სკოლა - პანსიონის დირექტორი გახლდათ. კობა ლურსმანაშვილი: ,,ჰამლეტ ბერაძე ერთ-ერთი წარმატებული სკოლის დირექტორი გახლდათ. მას კარგი მენეჯერული უნარები და ასევე არასამთავრობო ორგანიზაციებთან მუშაობის სერიოზული გამოცდილება აქვს. ვფიქრობ მისი ამ პოზიციაზე დანიშვნა, მოსწავლე - ახალგაზრდობის სახლს ახალ შესაძლებლობებს შესძენს.” ჰამლეტ ბერაძემ მადლობა გადაუხადა მერს ნდობის გამოცხადებისთვის და აღნიშნა რომ ეს სფერო მისთვის ნაცნობია და  ის შესაძლებლობების მაქსიმუმს გააკეთებს, ,,მოსწავლე - ახალგაზრდობის სახლის“  წარმატებული და საინტერესო  საქმიანობისთვის. დირექტორის მოადგილის პოზიციაზე გააგრძელებს საქმიანობას  მოსწავლე-ახალგაზრდობის სახლის დირექტორი მაია ბლუაშვილი, რომელიც აღნიშნულ მიმართულებას 35 წლის განმავლობაში ხელმძღვანელობდა.      

დღეს ჯანმრთელობისა და სოციალური დაცვის სამსახური უფროსმა, ნანა კიკნაძემ  ბავშვთა დაცვის და მხარდაჭერის განყოფილების უფროსთან, თეა ბერიძესთან ერთად ხარაგაულის საგანმანათლებლო რესურსცენტრში, საჯარო სკოლის დირექტორებთან, საინფორმაციო ხასიათის შეხვედრა გამართა. შეხვედრაზე, საგანმანათლებლო სფეროს წარმომადგენლებს, მერიის ახალი სტრუქტურული ერთეულის, ბავშვთა უფლებების დაცვისა და მხარდაჭერის განყოფილების  შესახებ მიეწოდათ ინფორმაცია. ,,ხარაგაულის მერიაში წელიწადზე მეტია ფუნქციონირებს  განყოფილება , რომელიც  სოციალური სამსახურის დაქვემდებარებაში შედის. მერიის ბავშვთა საკითხებზე მომუშავე ახალი განყოფილება  სოციალურ მუშაკს , ბავშვთა ფსიქოლოგს და ჯანდაცვის სპეციალისტს აერთიანებს, რომელსაც კოორდინირებას , განყოფილების უფროსი თეა ბერიძე უწევს. ჩვენი საქმიანობა ბავშვის საუკეთესო ინტერების დაცვა და მისი გათვალსიწინებაა, რაც თავის თავში ასევე კონფიდენციალურობას გულისხმობს, რომელიც თითოეული ჩვენგანის მიერ დაცული უნდა იყოს“ - აღნიშნა შეხვედრაზე ნანა კიკნაძემ. თეა ბერიძემ მადლობა გადაუხადა სკოლის დირექტორებს თანამშრომლობისთვის  და მათ განყოფილების მუშაობის პრინციპებზე,  პრაქტიკაში განხორციელებული საქმიანობის შედეგებზე, წარმატებული ქეისებსა და არსებული გამოწვევების შესახებ მიაწოდა ინფორმაცია.   ,,საქართველოს პარლამენტმა ბავშვთა უფლებათა კოდექსი 2020 წელს მიიღო, სწორედ ამ კოდექსის იმპლემენტაციის ფარგლებში გახდა აუცილებელი ადგილობრივი თვითმმართველობის დონეზე შექმნილიყო ბავშვთა უფლებების დაცვის და მხარდაჭერის განყოფილება. ეს არის ძალიან კარგი და მნიშვნელოვანი ნაბიჯი გადადგმული სახელმწიფოს მხრიდან“- აღნიშნა თეა ბერიძემ. თეა ბერიძის ინფორმაციით, ამ დრომდე განყოფილებამ 30 მდე ქეისი განიხილა. შეხვედრაზე ითქვა,რომ რეფერირების მექანიზმის ეფექტურად განხორციელებისთვის ძალიან მნიშვნელოვანია ყველა რგოლის თანაბარი ჩართულობა და თანამშრომლობა. შეხვედრაზე კოორდინაციის აუცილებლობაზე  ისაუბრა ასევე ხარაგაულის  საგანმანათლებლო რესურსცენტრის უფროსმა, მარინა ვეფხვაძემ და აღნიშნა, რომ სკოლის დირექციის მხრიდან მიღებული დროული შეტყობინება ერთგვარი პრევენციაა, რომ თავიდან ავირიდოთ საფრთხე და დროული და ეფექტური ნაბიჯები გადავდგათ   ბავშვთა უფლებების დაცვის კუთხით. ,,მაქსიმალურად ვითხოვთ თქვენს ჩართულობას, ჩვენთან კოორდინაციას, რაც ისევ და ისევ ბავშვთა საუკეთესო ინტერესების დაცვისკენ იქნება მიმართული" - აღნიშნა შეხვედრაზე ნანა კიკნაძემ.                        

ხარაგაულის მერმა , კობა ლურსმანაშვილმა ორშაბათის ტრადიციული თათბირი, მოადგილეებთან ვარლამ ჭიპაშვილთან, დავით დევდარიანთან და ადმინისტრაციული სამსახურის უფროსთან, კახა გოლუბიანთან ერთად წარმართა. თათბირზე კობა ლურსმანაშვილმა ,,სოფლის მხარდაჭერის პროგრამა“- ზე ისაუბრა და აღნიშნა, რომ პროექტების განსახორციელებლად სოფლებში ადგილობრივი, გამოცდილი, სანდო მეწარმეების შერჩევა უნდა მოხდეს, რომლებიც პროექტით გათვალისწინებულ სამუშაოებს კეთილსინდისიერად შეასრულებენ. მერმა მერის წარმომადგენლებს ამ პროცესში აქტიური ჩართულობა მოსთხოვა. თათბირზე აღინიშნა, რომ მერია უკვე მზადაა ,,სოფლის მხარდაჭერის პროგრამის“- ფარგლებში დაგეგმილი პროექტების განსახორციელებლად და შესაბამისი განკარგულების მიღების მოლოდინშია. კობა ლურსმანაშვილმა თათბირზე მერიის სოციალურ პროგრამებსა და სერვისებზე ხელმისაწვდომის გაზრდის აუცილებლობაზე ისაუბრა და აღნიშნა , რომ ამ კუთხით მერის წამრომადგენელების აქტიურობა მნიშვნელოვანია. კობა ლურსმანაშვილი: ,,მაქსიმალურად ეცადეთ ბენეფიციარების შერჩევა მოხდეს სამართლიანად. შეიძლება ბევრმა მოქალაქემ არ იცის ამ პროგრამების არსებობის შესახებ და იჩაგრება იმიტომ, რომ არ აქვს ხელმისაწვდომობა. მერის წარმომადგენლებს გთხოვთ მოახდინეთ ასეთი ოჯახების იდენტიფიცირება , თქვენ თვითონ ეცადეთ და აღმოაჩინეთ ისეთი ადამიანები, რომელთაც ამ წლების განმავლობაში აღნიშნული პროგრამებით არ უსარგებლიათ და თვლით რომ ნამდვილად აქვთ ამის საჭიროება.“ თათბირზე მერის პირველმა მოადგილემ , ვარლამ ჭიპაშვილმა განაცხადა, რომ სოციალურ საკითხთა დაცვის კომისია აქტიურად მუშაობს და მაქსიმალურად ცდილობს შემოსულ განცხადებებზე დროული რეაგირება ჰქონდეს. ,,ჩვენ ყველაფერს ვაკეთებთ იმისთვის, რომ სოციალურ სერვისებზე ხელმისაწვდომობა თითოეული სოფლის მაცხოვრებელმა თანაბრად მიიღოს.“- აღნიშნა ვარლამ ჭიპაშვილმა.

  25 მაისს, ხარაგაულის ინოვაციების ცენტრში, „საპილოტე რეგიონების  ინტეგრირებული განვითარების პროგრამის“ ფარგლებში საინფორმაციო  შეხვედრა გაიმართება. დაინტერესებულ პირები შეხვედრაზე  იმ შესაძლებლობებს გაეცნობიან, რომელიც  აღნიშნული პროგრამის ფარგლებში იმერეთის რეგიონისთვის მოქმედებს.  ასევე  მიიღებენ ინფორმაციას- GITA საქართველოს ინოვაციებისა და ტექნოლოგიების სააგენტოს მიერ, ამჟამად გამოცხადებული გრანტების შესახებ. პროგრამის მიზანია, ახალი საწარმოების შექმნა, ასევე არსებული საწარმოების გაფართოება.  შეხვედრას „აწარმოვე საქართველოში“ და RDA სოფლის განვითარების სააგენტოს წარმომადგენლები გამართავენ. შეხვედრა 11:00 საათზე დაიწყება.

 ხარაგაულის საბავშო ბაღებში მამებმა პატარებს ზღაპრები  წაუკითხეს. ინიციატივა, რომელიც ბავშვთა აღზრდის პროცესში მამების ჩართულობას გულისხმობს ხარაგაულის  ბაღების გაერთიანებას და გენდერული თანასწორობის საბჭოს ეკუთვნის. N1 საბავშვო ბაღის 3-4 წლიანთა ჯგუფის აღსაზრდელებს ზღაპარი “სამი გოჭის ამბავი“,   გიორგი მაქაძემ წაუკითხა.4-5 წლიანთა ჯგუფის აღსაზრდელებს  კი- დავით გველესიანმა ზღაპრის „მგელი და ბეკეკების“ შესახებ მოუთხრო.  5-6 წლიანთა ჯგუფში „მეჩონგურის“ გასაოცარ ამბავზე ზღაპარი  -კახაბერ ცხოვრებაძემ წაიკითხა. მამუკა ჭიპაშვილი: „პროექტი „მამა მიკითხავს ზღაპარს“ 2019 წლიდან, პანდემიის გამო აღარ ჩატარებულა. ნებისმიერ პატარას, განურჩევლად ასაკისა, ძალიან უყვარს ზღაპრების მოსმენა. როგორც წესი, მათი პირველი  წიგნი სწორედ ზღაპრების წიგნია. საერთოდ, მამების ჩართულობა სასწავლო-სააღმზრდელო პროცესში ძალიან მნიშვნელოვანია და მათი  მონაწილეობით მომავალშიც არა ერთი ღონისძიება ჩატარდება.“ მამებს, საკრებულოს გენდერული თანასწორობის საბჭოს თავმჯდომარემ, დავით კიკნაძემ და სკოლამდელ დაწესებულებათა ბაღების გაერთიანების დირექტორმა,  მამუკა ჭიპაშვილმა სპეციალური სიგელები გადასცეს. დავით კიკნაძემ აღნიშნა, რომ მამების ჩართულობა სასწავლო-სააღმზრდელო პროცესში ძალიან მნიშვნელოვანია.          

„ჩვენი სამოსი ჩვენი ისტორიაა!“-  ამ სახელწოდებით მოეწყო მსვლელობა ხარაგაულის ქუჩებში, რომელსაც   ეროვნულ  კოსტიუმებსა და აქსესუარებში გამოწყობილი მერიის, საკრებულოს და ა(ა)იპ - ების თანამშრომლები და სკოლის მოსწავლეები შეუერთდნენ. კოსტიუმირებული მსვლელობა ხარაგაულის ისტორიული მუზეუმის ეზოდან დაიწყო.  ქართული ეროვნული სამოსის გაცოცხლებულ ისტორიაში, ყველაზე პატარა პერსონაჟებიც მონაწილეობდნენ.  მსვლელობას პერფორმანსით შეუერთდა ქორეოგრაფიული ანსამბლ ,,მთიები“-ს მოცეკვავეები. ხარაგაულის ისტორიული მუზეუმის დირექტორი, ნინო დიდიძე: ,, უკვე წლებია ხარაგაული 18 მაისს განსაკუთრებულად ხვდება. ეროვნული სამოსის დღე ეს არის გაცოცხლებული ისტორია. ამ დღით იწყება მუზეუმების საერთაშორისო კვირეული, რომელშიდაც ძალიან ბევრი ადამიანია  ჩართული. ვულოცავ ყველას ამ დღეს , განსაკუთრებით მუზეუმის თანამშრომლებს.“ კულტურისა და ხელოვნების ცენტრის დირექტორი, ნიკოლოზ მაჭავარიანი: ,,ერთ-ერთი ულამაზესი დღეა და ეტყობა კიდეც ეს განწყობა ხარაგაულის ქუჩებს, დიდი თუ პატარა კოსტიუმებშია, თითქოს ჩვენ თვალწინ ისტორიული ფრაგმენტები ცოცხლდება. ეს მართლაც  გამორჩეული დღეა.“ კულტურის სამსახურის უფროსი, ირინე ჩხეიძე: ,,ძალიან მიხარია ყოველთვის 18 მაისი, როდესაც მაქვს შესაძლებლობა შევიმოსო ეროვნული სამოსით და ვიგრძნო ეს სიმდიდრე , იდენტობა. ვფიქრობ, უფრო მეტი ადამიანი უნდა შემოგვიერთდეს. ამ დღეს ხარაგაულში ყოველთვის დიდი სიხარული და ამაღლებული განწყობა ახლავს.“  ხარაგაულის ისტორიული მუზეუმის ინიციატივით და მერიის მხარდაჭერით მუზეუმების საერთაშორისო დღეს რამდენიმე ღონისძიება მიეძღვნა.  საგანმანათლებლო პროექტი „მოხალისე გიდების“  ფარგლებში,  მუზეუმის დარბაზებში, დამთვალიერებელს გიდობა გაუწიეს ხარაგაულის სასულიერო გიმნაზიის და საღანძილის საჯარო სკოლის მოსწავლეებმა. ისტორიული მუზეუმის ეზოში სპეციალურად ამ დღესთან დაკავშირებით მოეწყო ეთნოგრაფიული კუთხე, სადაც სურვილის შემთხვევაში  შესაძლებელი იყო სამახსოვრო ფოტოების გადაღება .  ეროვნული სამოსის დღე საქართველოში წელს მეოთხედ აღინიშნება და მასში ქვეყნის მასშტაბით თითქმის ყველა ქალაქია ჩართული.          

  ხარაგაულის მერიის ზედამხედველობისა და არქიტექტურის სამსახურის უფროსად ზურაბ ბანცაძე დაინიშნა. ზურაბ ბანცაძეს აღნიშნულ სამსახურში მუშაობის მრავალი წლის გამოცდილება აქვს. იგი ბოლო პერიოდში ზედამხედველობისა და არქიტექტურის სამსახურის უფროსის მოვალეობის შემსრულებლის პოზიციას იკავებდა. ზურაბ ბანცაძემ სამსახურის უფროსის პოსტი საჯარო მოხელის კარიერული განვითარების ზრდის საფუძველზე დაიკავა.

მერიის სამხედრო აღრიცხვისა და გაწვევის სამსახურს უფროსად გრიგოლ ჭიპაშვილი დაინიშნა. გრიგოლ ჭიპაშვილი თანამშრომლებს მერის მოადგილე,დავით დევდარიანმა წარუდგინა. დავით დევდარიანი: ,,ბატონი გიორგი  არის გამოცდილი მენეჯერი,  მას მრავალ პოზიციაზე მუშაობის გამოცდილება აქვს. ეს სტრუქტურული ერთეული, ერთ - ერთი მნიშვნელოვანი სამსახურია. ვფიქრობ, ახალ ხელმძღვანელთან ერთად გუნდი კვლავ გააგრძელებს წარმატებულ საქმიანობას.“ აღნიშნულ პოზიციაზე გრიგოლ ჭიპაშვილი ღია კონკურსის წესით დაინიშნა. ამ დრომდე იგი  ა(ა)იპ  „სპორტისა და შიდა ტურიზმის“ ცენტრის დირექტორის პოსტს იკავებდა.

„მხიარული სტარტების“ მორიგი თამაში ვერტყვიჭალის საჯარო სკოლაში გაიმართა. ერთმანეთს ბორითის, ვერტყვიჭალის, ნადაბურისა და ხევის საჯარო სკოლები შეხვდნენ. “მხიარული სტარტები“ ხარაგაულის მერიის კულტურის, განათლების, სპორტის და ახალგაზრდობის საქმეთა სამსახურის პროექტია, რომელშიც ხარაგაულის ყველა სკოლაა ჩართული. საინტერესო და მხიარულ თამაშებში ჩემპიონის ტიტული ხევის საჯარო სკოლის გუნდს ხვდა წილად. ვარლამ ჭიპაშვილი, მერის პირველი მოადგილე: “პანდემიის შედეგად გათვალისწინებული შეზღუდვების მოხსნის შემდეგ, სასიხარულოა რომ მასშტაბური ღონისძიებების ჩატარების შესაძლებლობა მოგვეცა. ჩვენი მთავარი მიზანია, რომ მოხდეს ჯანსაღი ცხოვრების წესის დანერგვა და პოპულარიზაცია. მნიშვნელოვანია, რომ მოსწავლეებს აქვთ მოწესრიგებული ინფრასტრუქტურულ გარემო და მათ სწავლა თანამედროვე, საერთაშორისო სტანდარტების შესაბამის სკოლაში უხდებათ. ვერტყვიჭალის საჯარო სკოლა გამორჩეულია თავისი აქტივობებით და წარმატებებით. ხარაგაულის ადგილობრივი თვითმმართველობა საკუთარი უფლებამოსილების ფარგლებში ყოველთვის იქნება სკოლის, პედაგოგების და მშობლების გვერდით, რათა გვყავდეს გონიერი, განათლებული ახალგაზრდობა, რომელიც არის ჩვენი ქვეყნის მომავლის წარმატებისა და სიძლიერის გარანტი.“ ლენა აბაშიძე, ვერტყვიჭალის საჯარო სკოლის დირექტორი: „მხიარული სტარტების“ ჩატარება ძალიან კარგი ინიციატივაა. ბავშვები დადებითი განწყობით და სათანადოდ მობილიზებულები შეხვდნენ ამ პროექტს. სკოლას საუკეთესო მატერიალური ბაზა აქვს, რაც მოსწავლეების სპორტული მიღწევებისთვის ერთ-ერთი ხელის შემწყობი ფაქტორია. ბავშვები მონატრებულები იყვნენ მსგავსი სახის ღონისძიებაში მონაწილეობას, რადგან ორი წელია, მძიმე პანდემიის გამო, ასეთი მასშტაბური ღონისძიებები აღარ ჩატარებულა.” დღესვე, ვერტყვიჭალის საჯარო სკოლაში თემატური კვირეულის ფარგლებში ამავე სკოლის მოსწავლის, წარმატებული სპორტსმენის , მადონა წიქარიშვილის ხსოვნისად მი მიძღვნილი სპორტული მარათონი გაიმართა. ტურნირში გამარჯვებული, ხევის საჯარო სკოლა, მადონა წიქარიშვილის სახელობის გარდამავალი თასით დაჯილდოვდა. ბავშვებს საჩუქრები მერის პირველმა მოადგილემ, ვარლამ ჭიპაშვილმა , საკრებულოს თავმჯდომარის პირველმა მოადგილემ, დავით კიკნაძემ და იურიდიული, სამანდატო, საპროცედურო საკითხთა და ეთიკის კომისიის თავმჯდომარე, ოთარ ლურსმანაშვილმა გადასცეს.