საქართველოს მთავრობის ორგანიზებით, ქვეყანაში, ქალთა მიმართ ძალადობის წინააღმდეგ მიმართული 16 დღიანი კამპანია დაიწყო. ხარაგაულში კამპანიის ფარგლებში გენდერული თანასწორობის საბჭოს ინიციატივით, პირველი შეხვედრა გაიმართა, სადაც ქუთაისის დემოკრატიული ჩართულობის ცენტრის წარმომადგენლებმა ქალთა უფლებების გაძლიერების ხელშეწყობაზე, საზოგადოებისთვის გენდერული ძალადობის მიმართ ინფორმაციის მიწოდებასა და ამ მიმართულებით არსებული სახელმწიფო სერვისების პოპულარიზაციაზე ისაუბრეს. მოგახსენებთ, რომ ქალთა მიმართ ძალადობის წინააღმდეგ 16 დღიანი კამპანია მსოფლიოში 1991 წლიდან იმართება და მიზნად ისახავს საზოგადოებრივი ცნობიერების ამაღლებას და ქალთა მიმართ ძალადობის წინააღმდეგ ბრძოლის სფეროში არსებული გამოწვევების აქტუალიზაციას. 2019 წელს, საქართველოში, ქალთა მიმართ ძალადობის წინააღმდეგ კამპანიის მთავარ თემად სექსუალური შევიწროება განისაზღვრა. 16 დღიანი კამპანიის ფარგლებში, ხარაგაულში, მერის თანაშემწის გენდერული თანასწორობის საკითხებში, ინგა ბერაძის ინიციატივითა და გენდერული თანასწორობის საბჭოს ჩართულობით შემდეგი ღონისძიებებია დაგეგმილი: 2 დეკემბერი - ვიდეო რგოლის „სექსუალური შევიწროება საჯარო სივრცეში“  -  ჩვენება საჯარო მოხელეებისთვის; 3 დეკემბერი - ბავშვთა მიმართ ძალადობის შემცირებისკენ მიმართული კამპანია; წარმოდგენილი იქნება თეატრალური პერფორმანსი და ფორუმ-თეატრი. ღონისძიების მხარდამჭერია „კოალიცია ბავშვებისა და ახალგაზრდებისთვის“. 5 დეკემბერი - სამუშაო  შეხვედრა  სკოლის მოსწავლეებთან, პედაგოგებთან,  სოციალური მომსახურების სააგენტოსა  და პოლიციის წარმომადგენლებთან. წარმოდგენილი იქნება ნაწყვეტი ხარაგაულის სახალხო თეატრის სპექტაკლიდან „ორნი“, რომელიც ოჯახში ძალადობის თემას ეხება. 6 დეკემბერი - ბავშვების თვალით დანახული ძალადობა - ბავშვები ხატავენ ძალადობის თემაზე. 10 დეკემბერი - მსვლელობა ქუჩაში -  „აიხილე თვალები“. გაცნობებთ, რომ კამპანიას ხელმძღვანელობს საქართველოს მთავრობა და მასში მონაწილეობას იღებენ გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორისი კომისიის წევრი სახელმწიფო უწყებები.  

ხარაგაულის მუნიციპალიტეტის სოფელ ლაშეში, შიდა სახელმწიფოებრივი მნიშვნელობის გზის მშენებლობის პროცესში, მსხვილმარცვლოვან გლაუკონიტიან ქვიშაქვებში ქვედა ცარცული პერიოდის (დაახლოებით 100-113 მილიონი წლის წინანდელი) ნამარხი თავფეხიანი მოლუსკები - ამონიტები (Ammonite) აღმოაჩინეს. მშენებლები ხარაგაულის მუნიციპალიტეტის მერს, ნიკოლოზ თოფურიძეს დაუკავშირდნენ, რის შემდეგაც ისტორიული მუზეუმის მოწვევით  სოფელ ლაშეში პალეოანთროპოლოგიისა და პალეობიოლოგიის კვლევითი ინსტიტუტის ხელმძღვანელი თენგიზ მეშველიანი, გეოლოგია-პალეონტოლოგიის ფონდის მთავარი კურატორი რუსუდან ჩაგელიშვილი და ფონდის მეცნიერთანამშრომელი, გეოლოგი, პალეონტოლოგი, ნიკა ვანიშვილი ჩამოვიდნენ. არქეოლოგიურმა ექსპედიციამ ადგილზე დაათვალიერა აღმოჩენილი მოლუსკები, აიღეს ქანები და დაადგინეს, რომ ისინი ქვედა ცარცული პერიოდისაა. ცარცული პერიოდი 135-137 მლნ. წლის წინათ დაიწყო და დაახლოებით 70 მლნ. წელი გრძელდებოდა. გვიანდელ ცარცულ ეპოქაში დედამიწის ისტორიაში ერთ-ერთი უდიდესი ტრანსგრესიის შედეგად ზღვამ მოიცვა აღმოსავლეთ ევროპის, ჩრდილოეთ ამერიკის, აფრიკის და ავსტრალის ბაქნების ვრცელი ფართობები. გვიანდელ ცარცულ ეპოქაში დედამიწის მრავალ ადგილას აღინიშნება მძლავრი ვულკანიზმი. ადრინდელი ცარცული ეპოქის ხმელეთის ფლორაში ჭარბობდა გვიმრანაირები და შიშველთესლიანები. ზღვიურ უხერხემლოთა ფაუნაში ჭარბობდნენ მოლუსკები, განსაკუთრებით ამონიტები და ბელემნიტები. სწორედ ასეთი ამონიტები აღმოჩნდა სოფელ ლაშეში, სადაც როგორც მეცნიერ-თანამშრომლები ამბობენ, კერძო საკუთრებაა და სავარაუდოდ ნგრევას ვეღარ გააგრძელებენ. აღმოჩენილი ამონიტები ხარაგაულის ისტორიულ მუზეუმში განთავსდება.

ხარაგაულის მუნიციპალიტეტის სოფელ ლაშეში მდინარე ჩხერიმელაზე, დროებითი ხიდის მონტაჟი მიმდინარეობს. შიდა სახელმწიფოებრივი მნიშვნელობის გზასთან სამი სოფლის დამაკავშირებელი ხიდი მწყობრიდან მიმდინარე წლის ივნისში მოსული ძლიერი წვიების შედეგად გამოვიდა. ახალი ხიდის მშენებლობისთვის ხარაგაულის მერიამ თანხა საქართველოს მთავრობის 2019 წლის 31 ოქტომბრის განკარგულებით მიიღო. პროექტი გარდამავალია და ხიდის მშენებლობა ნახევარ მილიონ ლარზე მეტი დაჯდება. მერია ხიდის მშენებლობისთვის ტენდერს უახლოეს დღეებში გამოაცხადებს.  დროებითი ხიდის მოწყობის სამუშაოებს ჩინური კომპანია ასრულებს, რომელიც ხარაგაულის ტერიტორიაზე რკინიგზის მოდერნიზაციის პროქტის ფარგლებში გვირაბების მშენებლობას ახორციელებს.

დაბა ხარაგაულში, სპორტდარბაზის მიმდებარე ტერიტორიაზე, საზოგადოებრივი ცენტრის მშენებლობა მიმდინარეობს. ადგილობრივი მოსახლეობა ადგილიდან გაუსვლელად შეძლებს კომფორტულ გარემოში სახელმწიფო და კერძო სექტორის 200-ზე მეტი მომსახურების სწრაფად მიღებას. ცენტრში ხელმისაწვდომი იქნება „მაგთისა“ და „ლიბერთი ბანკის“ მომსახურება. ადგილობრივ მოსახლეობასთან ერთად, სტუმრებიც ისარგებლებენ ხელმისაწვდომი საბანკო მომსახურებით, მობილური ოპერატორის საშუალებით სამყაროსთან 24-საათიანი კავშირით, უკაბელო ინტერნეტითა და უფასო სკაიპის ოთახით.  საზოგადოებრივ ცენტრში უახლესი ტექნიკით აღჭურვილი ბიბლიოთეკა განთავსდება, სადაც ელექტრონულ წიგნებთან ერთად ბეჭდური გამოცემებიც იქნება დაცული. ცენტრი აღიჭურვება საკონფერენციო დარბაზით, სადაც მოსახლეობა შეხვედრების გამართვას შეძლებს. საზოგადოებრივ ცენტრში განთავსდება მუნიციპალიტეტის მერის წარმომადგენლის მისაღები ოთახიც.  პროექტის ღირებულება 682 100 ლარია, სამუშოებს სს „სამშენებლო საწარმო გაერთიანება იმერეთი ასრულებს“. საზოგადოებრივი ცენტრის მშენებლობა ხარაგაულში 2020 წლის ივნისში დასრულდება. აღნიშნული ცენტრი ხარაგაულში რიგით მეოთხე საზოგადოებრივი ცენტრია. მუნიციპალიტეტის მასშტაბით ე.წ. „სოფლის სახლები“ უკვე ფუნქციონირებს სოფელ ხევში, ღორეშაში და კიცხში.

ხარაგაულის მუნიციპალიტეტში ივნისის სტიქიით დაზიანებული სოფელ ლეღვნის ცენტრალური გზის ერთი მონაკვეთი აღდგენილია. დასრულდა ნაპირსამაგრი გაბიონის მშენებლობა და გზის სავალ ნაწილზე მოეწყო ბეტონის საფარი. სამუშაოები 137 000 ლარით დაფინანსდა.  ინტენსიურად მიმდინარეობს გზის მეორე მონაკვეთის აღდგენის სამუშაოები. ამჟამად ეწყობა მდინარე ლეღვნულას სანაპიროზე საყრდენი კედელი, რომლის დასრულების შემდეგაც დაზიანებულ მონაკვეთზე დაიგება ბეტონის საფარი. სამუშაოები ნოემბრის ბოლოს დასრულდება და სოფელ ლეღვნის ცენტრალური გზა სრულად აღდგება. გზის მეორე მონაკვეთის მშენებლობა სტიქიის ფონდიდან 398 000 ლარით დაფინანსდა.   

ხარაგაულის მთავარი საფინანსო დოკუმენტი 2020 წლის ბიუჯეტის პროექტი და ამასთანავე, 2020-2023 წლების პრიორიტეტების დოკუმენტი მზადაა დღეს ხარაგაულის მუნიციპაიტეტის მერმა, ნიკოლოზ თოფურიძემ, მერიის საფინანსო სამსახურის უფროსთან, ვლადიმერ გელაშვილთან და სამსახურის თანამშრომლებთან ერთად, ბიუჯეტის პროექტი და პრიორიტეტების დოკუმენტი საჯარო განხილვის ფორმატში ადგილობრივ მოსახლეობას გააცნო. შეხვედრას მერის მრჩეველთა საბჭოსა და გენდერული თანასწორობის საბჭოს წევრები დაესწრნენ. ხარაგაულის მუნიციპალიტეტის 2020 წლის ბიუჯეტი, 2019 წლის დამტკიცებულ ბიუჯეტთან შედარებით 452 200 ლარით გაიზარდა და 8 178 000 ლარით განისაზღვრა. (2019 წლის დამტკიცებული ბიუჯეტი 7 725 800 ლარს შეადგენდა). შეხედრა კითხვა-პასუხის რეჟიმში მიმდინარეობდა. საზოგადოებამ დაასახელა რამდენიმე პრიორიტეტული საკითხი. იმსჯელეს დაბის იერსახის მოწესრიგებაზე, წყალანირების სისტემის მოწყობაზე, სტიქიური ნაგავსაყრელების ლიკვიდაციაზე, მრავალბინიანი სახლების ფასადების და სადარბაზოების მოწესრიგებაზე და სხვა მნიშვნელოვან საკითხებზე, რომელთა ასახვაც ეტაპობრივად მოხდება ადგილობრივ ბიუჯეტში. მერიის საფინანსო-საბიუჯეტო სამსახურის უფროსმა, ვლადიმერ გელაშვილმა დეტალურად ისაუბრა ბიუჯეტის შემოსავლებსა და ხარჯვით ნაწილზე. ხარაგაულის მერმა, ნიკოლოზ თოფურიძემ გასცა ინფორმაცია მერის სარეზერვო ფონდიდან დაფინანსებულ პროექტებზე, ასევე, განმარტა, რომ დაბა ხარაგაულის კეთილმოწყობა დაიწყება მას შემდეგ, რაც შიდა სახელმწიფოებრივი მნიშვნელობის გზის მშენებლობა დასრულდება. საუბარი შეეხო დაბაში მიმდინარე ინფრსტრუქტურულ პროექტებს, რომლებიც რიგი მიზეზების გამო შეჩერებულია. მერის ინფორმაციით, მიმდინარე წელს 15 არაკეთილსინდისიერ მეწარმეს შეუწყდა ხელშეკრულება, რაც იმის გარანტიაა, რომ ეს კომპანიები ტენდერებზე ვეღარ შემოვლენ. როგორც ნიკოლოზ თოფურიძემ განმარტა, დაბაში მიმდინარე პროექტები წლის ბოლომდე დასრულდება და შეფერხებისთვის მოსახლეობას ბოდიში მოუხადა. მერიის ქონების მართვისა და ეკონომიკის სამსახურის უფროსმა, ჯაბა ბერაძემ, ქონების გადასახადიდან შემოსულ გაზრდილ შემოსავლებზე ისაუბრა. მერიის სახაზინო-საბიუჯეტო დაგეგმარების განყოფილების უფროსმა, ნინო მაღლაკელიძემ შეხვედრაზე აღნიშნა, რომ წელს პირველად მოხდა პროგრამულ ბიუჯეტზე მუშაობა და ეს წინ გადადგმული ნაბიჯია. ბიუჯეტის წარდგენის და დამტკიცების ცირკულაცია: 2020 წლის ბიუჯეტის პროექტი და 2020-2023 წლების პრიორიტეტების დოკუმენტი მიმდინარე წლის 15 ნოემბრამდე წარედგინება საკრებულოს და ფინანსთა სამინისტროს. 16 ნოემბრიდან იწყება განხილვები საკრებულოს კომისიების ფორმატში, ხოლო 20 ნოემბრიდან ეწყობა საჯარო განხილვები სამოქალაქო საზოგადოებისთვის. მუნიციპალიტეტის საკრებულომ შენიშვნების არსებობის შემთხვევაში პროექტი მერიაში 25 ნოემბრამდე უნდა დააბრუნოს. მერია ბიუჯეტის შესწორებულ ან იგივე ვარიანტს, საბოლოოდ, საკრებულოში 10 დეკემბრამდე აგზავნის. ხარაგაულის მუნიციპალიტეტის მთავარი საფინანსო დოკუმენტი 2019 წლის 20-28 დეკემბრამდე უნდა დამტკიცდეს.

ხარაგაულის მუნიციპალიტეტში შიდა სახელმწიფოებრივი მნიშვნელობის მოლითი-ფონა-ჩუმათელეთის გზის 25 კილომეტრიანი მონაკვეთის სარეაბილიტაციო სამუშაოები ყოველდღიურ რეჟიმში მიმდინარეობს.  აღნიშნული მონაკვეთი ძირულა-ხარაგაული-მოლითი-ფონა-ჩუმათელეთის 50 კოლმეტრიანი გზის მეორე ლოტია. პირველ ლოტზე, რომელიც ძირულა-ხარაგაული-მოლითის ასევე, 25 კლომეტრიან მონავეთს მოიცავს, სამუშაოებს BLACK SEA GROUP-ი ახორციელებს.  მოლითი-ფონა-ჩუმათელეთის  გზაზე სარეაბილიტაციო სამუშაოები ჩუმათელეთის მხრიდან დაიწყო. ამ ეტაპზე საყრდენი კედლების, გაბიონების და მილხიდების მოწყობა ერთდროულად რამდენიმე ლოკაციაზე მიმდინარეობს. სამუშაოებს აზერბაიჯანული კომპანია „აკორდი“ ასრულებს. სახელშეკრულებო პირობებით, 25 კილომეტრიანი გზის სრული რეაბილიტაცია 2020 წელს უნდა დასრულდეს. 

ხარაგაულში 28 ოქტომბერს, გიმნაზიელებმა ნამდვილი იმერული შემოდგომის ზეიმი მოაწყვეს. გიმნაზიის ეზოში, უკვე ტრადიციად ქცეულ საშემოდგომო ღონისძიებაში, ყველა ასაკობრივი ჯგუფის კლასები, პედაგოგებთან და მშობლებთან ერთად ჩაერთვნენ. ღია სივრცეში წარმოდგენილი იყო ქართული სამზარეულო, ორიგინალურად გაფორმებული იმერული სუფრები და ოქროსფერი შემოდგომისთვის დამახასიათებელი ყველა საჭირო ინვენტარი. როცა გიმნაზიელებმა ერთდღიანი შემოდგომა მიინახეს, ეზოში ქართული ხალხური სიმღერისა და ცეკვის თავბრუდამხვევი ემოცია დატრიალდა. ღონისძიებას მარგვეთისა და უბისის ეპისკოპოსი, მეუფე მელქისედეკი (ხაჩიძე), ხარაგაულის მუნიციპალიტეტის მერი, ნიკოლოზ თოფურიძე და მოწვეული სტუმრები ესწრებოდნენ. ეპარქიის სასულიერო პირებმა ხარაგაულელები დალოცეს და ბარაქიანი, ხვავიანი და მშვიდობიანი შემოდგომა უსურვეს.

29 ოქტომბერს ხარაგაულში ინტელექტ-ჩემპიონატი „ეტალონი“ ჩატარდა, რომელსაც პროექტის ავტორი გოჩა ტყეშელაშვილი უძღვებოდა. კონკურსი სამ ეტაპად მიმდინარეობს. პირველი ეტაპი ხარაგაულის მუნიციპალიტეტის 75-მა მოსწავლემ გადალახა. ჩემპიონატის მეორე ეტაპი დაბის მე-3 საჯარო სკოლაში გაიმართა, სადაც ხარაგაულის ეტალონი მოსწავლე გამოვლინდა, მესამე ეტაპი კი, 2020 წელს გრანდიოზული ფინალით დასრულდება, რომელიც 2019-2020 სასწავლო წლის საქართველოს ეტალონელს გამოავლენს. 2019-2020 სასწავლო წლის „ხარაგაულის ეტალონი“ მოსწავლე მარელისის საჯარო სკოლის მეთერთმეტე კლასელი, ნინო ყიფიანი გახდა. მეორე ადგილზე ხიდრის საჯარო სკოლის მოსწავლე, ლუკა გაგოშიძე გავიდა, ხოლო მესამე ადგილი ნადაბურის საჯარო სკოლის მოსწავლე, მარიამ გელაშვილმა დაიკავა. აღსანიშნავია, რომ მუნიციპალიტეტის მერის, ნიკოლოზ თოფურიძის, ინიციატივით, პირველ სამ ადგილზე გასულ მოსწავლეებს ფულადი ჯილდო გადაეცემათ. დღევანდელი კონკურსით საუკეთესო ათეულში მოხვდნენ ასევე, გიგა ბერაძე, მარიამ ყურაშვილი, მარიამ რიკაძე, თამთა პავლაძე, ნიკა მაჩიტაძე და ელენე ჩიჩილიძე. პროექტის ავტორმა და წამყვანმა გოჩა ტყეშელაშვილმა 2018-2019 სასწავლო წლის „საქართველოს ეტალონ მოსწავლეს“ (ხარაგაულის გიმნაზია) საბა ებანოიძეს გამარჯვება კიდევ ერთხელ მიულოცა და სკოლის ღირსეული წარმოჩენისთვის „ოქროს ფონდის“ წევრობის დამადასტურებელი დიპლომი გადასცა. ინტელექტ- ჩემპიონატ “ეტალონის“ ღონისძიებას ხარაგაულის საკრებულოს დეპუტატები, მერიის კულტურის, განათლების, სპორტისა და ახალგაზრდობის საქმეთა სამსახურის უფროსი, ირინე ჩხეიძე, საგანმანათლებლო რესურსცენტრის უფროსი, მარინა ვეფხვაძე, დეპუტატის ბიუროს ხელმძღვანელი ჟანა ნემსაძე, სკოლის დირექტორები და პედაგოგები დაესწრნენ.

ხარაგაულის მუნიციპალიტეტის სარგვეშის ადმინისტრაციული ერთეულის საკრებულოს მაჟორიტარი დეპუტატი რუსუდან გიორგაძე გაწეული მუშაობის შესახებ თემის მოსახლეობას ანგარიშის წარუდგენს.  „საქართველოს ორგანული კანონის „ადგილობრივი თვითმმართველობის კოდექსის“88 - მუხლისა და ხარაგაულის მუნიციპალიტეტის საკრებულოს 2015 წლის, 02 ოქტომბრის, N39 დადგენილების შესაბამისად, ხარაგაულის მუნიციპალიტეტის საკრებულოს აპარატი გაცნობებთ, რომ სარგვეშის ადმინისტრაციული ერთეულის საკრებულოს მაჟორიტარი წევრის რუსუდან გიორგაძის მიერ გაწეული მუშაობის შესახებ ანგარიში ამომრჩეველთა წინაშე წარდგენილ იქნება მიმდინარე წლის 08 ნოემბერს, სოფელ სარგვეშში, ადმინისტრაციული შენობის მიმდებარედ“.