ახალი ამბები
http://new.admin.kharagauli.ge/images/_DSC1378_1.JPG
13/12/2019 22:24

თქვენთვის შეტყობინებაა - ხარაგაული ბავშვთა მიმართ ძალადობის შემცირებისკენ მიმართულ კამპანიას გამოეხმაურა

„კოალიცია ბავშვებისა და ახალგაზრდებისთვის“ მხარდაჭერით ხარაგაული ბავშვთა მიმართ ძალადობის შემცირებისკენ მიმართულ კამპანიას გამოეხმაურა. „თქვენთვის შეტყობინებაა" - ასეთი იყო კამპანიის სახელწოდება, რომლის მიზანიც ბავშვთა მიმართ ძალადობის ფორმებზე მოქალაქეების ინფორმირება გახლდათ. შეხვედრა, 16 დღიანი კამპანიის ფარგლებში,  მერის თანაშემწის გენდერული თანასწორობის საკითხებში, ინგა ბერაძის ინიციატივითა და ხარაგაულის მუნიციპალიტეტის მერიის მხარდაჭერით გაიმართა. შეხვედრა ხარაგაულის კინოთეატრში ჩატარდა და მასში  მონაწილეობა, ხარაგაულის საჯარო სკოლების მოსწავლეებმა, პედაგოგებმა, მშობლებმა, სკოლამდელი აღზრდის დაწესებულებათა წარმომადგენლებმა და სხვა დაინტერესებულმა პირებმა მიიღეს. კამპანიის ფარგლებში მოეწყო თეატრალიზებული მონოლოგები და დისკუსიები, რომელმაც თვალსაჩინო გახადა ის უარყოფითი შედეგები, რასაც ბავშვები საბავშვო ბაღში, სკოლაში, თუ ოჯახში განცდილი ძალადობის შედეგად იღებენ. ასევე, გაიმართა თემატური პერფორმანსი და გამოფენა. თეატრალიზებული მონოლოგებისას საზოგადოების წარმომადგენლებმა  მოუსმინეს სხვადასხვა პერსონაჟების (მასწავლებელი, ბაღის მეთოდისტი, მშობელი, ბავშვები) რეალურ ისტორიებს, რომლის შემდგომაც გაიმართა დისკუსია. შეხვედრის მოდერატორები გახლდნენ ბავშვთა ძალადობის შემცირებისაკენ მიძღვნილი კამპანიის ,,თქვენთვის შეტყობინებაა“ კოორდინატორი ქუთაისში, ბავშვთა დაცვის სერვისების  სუპერვაიზერი თინათინ ჭელიშვილი და ბექა ძოწენიძე საქართველოს ეროვნული უნივერსიტეტის წარმომადგენელი, განათლების სამართლის მკვლევარი, სამართალმცოდნე.    შეხვედრაზე მრავალჯერ აღინიშნა ის ფაქტი, რომ ხარაგაული პირველი მუნიციპალიტეტია, რომელიც ბავშვთა მიმართ ძალადობის შემცირებისკენ მიმართულ კამპანიას გამოეხმაურა და მზადაა ამ თემაზე ღიად ისაუბროს.  ,,ძალიან კარგია , როდესაც მუნიციპალიტეტი და საჯარო სივრცე ღიაა სიახლეებისადმი, მზადაა საუბრისთვის, დისკუსიითვის, ამ ფონზე გამოწვევები, რომლებიც ნამდვილად არსებობს დაძლევადია ამბობს თინათინ ჭელიშვილი - ბავშვთა მიმართ ძალადობის შემცირებისაკენ მიმართული კამპანიის ,,თქვენთვის შეტყობინებაა“ კოორდინატორი ქუთაისში, ბავშვთა დაცვის სერვისების  სუპერვაიზერი.  განსაკუთრებით აღასანიშნავია ის რომ შეხვედრაში მონაწილეობდა სხვადასხვა სკოლის მოსწავლეები, მასწავლებლები,  ბაგა ბაღის პედაგოგები, მეთოდისტები და დირექტორები. ძალიან ჯანსაღი დისკუსია მიმდინარეობდა, იყო ძალიან ბევრი განსხვავებული აზრი. ბავშვებმა წამოწიეს საკითხები ბულინგთან, ძალადობასთან და ასევე, თანასწორობასთან დაკავშირებით. ძალიან მნიშვნელოვანია, რომ პედაგოგები მოსწავლეებს  აღიქვამდნენ თანასწორებად  და მათი ურთიერთობა პატივისცემაზე იყო დაფუძნებული. ბავშვების მხრიდან  წამოვიდა საჭიროება, რომ გამახვილდეს ყურადღება არაფორმალური განათლების მეთოდებზე. მნიშვნელოვანია სკოლებში გაკეთდეს კლუბები, ბავშვებმა თავად მოახდინონ  იმ პრობლემების იდენტიფიცირება და რისკების შემცირება, რაც ბულინგს და ძალადობას უკავშირდება. თვითონ დაიწყონ ინფორმაციის მოძიება და ცნობიერების ამაღლება, როგორც ბავშვებში ისე მოზრდილებში თემის დონეზე, რაც ხელს შეუწყობს ბულინგის და  ძალადობის პრევენციას. ასევე ძალიან მნიშვნელოვანია შეიქმნას მშობელთა კლუბები, რომლებიც პოზიტიური აღზრდის მეთოდებზე იქნება მიმართული.“ ბექა ძოწენიძე -  საქართველოს ეროვნული უნივერსიტეტის წარმომადგენელი, განათლების სამართლის მკვლევარი, სამართალმცოდნე. „შეხვედრის მიზანი იყო, რომ  მოსწავლესა და პედაგოგს და მშობელსა და პედაგოგს შორის სუბორდინაცია პოზიტიური გაგებით მოგვეშალა და მათ ღიად ესაუბრათ საკუთარი  ინტერესების შესაბამისად, რაც ნამდვილად გამოგვივიდა  ვინაიდან თითოეული ადამიანის როლი და თითოეული ინდივიდის სიტყვა იყო დაფასებული, მათ სრულიად ღიად  შეეძლოთ დაეფიქსირებინათ ნებისმიერი პოზიცია განათლების საკითხებთნ დაკავშირებით, რაც გააკეთეს კიდეც, დისკუსიაში ჩართული იყვნენ,  როგორც საჯარო სკოლის ისე კერძო სკოლის მოსწავლეები. პედაგოგები აფიქსირებდნენ იმ პრობლემატიკას, რაც სკოლაში მათი მხრიდან ჩანს და აღიქმება. დირექტორები, ადგილობრივი თვითმართველობის წარმომადგენლები პრობლემების გადაჭრის გზებს გვათავაზობდნენ. ასეთი ტიპის შეხვედრის მიზანია რეალურ რეზულტატზე გავიდეთ და სკოლებში, თუ სხვა სივრცეში  აღმოიფხვარს, როგორც ბულინგი და ისე სხვა სახის ჩაგვრა.“ ინგა ბერაძე ( მერის თანაშემწე გენდერული თანასწორობის საკითხებში) შეხვედრაზე დაისვა შეკითხვა, თუ რამდენად იცნობენ საჯარო სკოლები, ბავშვთა დაცვის მიმართვიანობის (რეფერირების) დოკუმენტს, როგორც რეფერირების პროცედურებში ჩართული სუბიექტები.  აღინიშნა, რომ რეფერირებაში ჩართულ ყველა დაწესებულებასა და ორგანოს, რომელსაც შეხება აქვს ბავშვებთან, ან მათ ოჯახებთან, ან იმ გარემოსთან სადაც ბავშვი იმყოფება  ევალება ძალადობის შემთხვევის გამოვლენა. სწორედ ამიტომ, ჩვენ შეხვედრაზე მოვიწვიეთ სოციალური მუშაკი. მნიშვნელოვანია საზოგადოებას ინფორმაცია ჰქონდეს იმ სერვისებზე, რომელსაც მას სახელმწიფო სთავაზობს და  თვითონაც ჩართული იყოს მის განხორციელებაში. ციური ჩუბინი ძე ( ხარაგაულის სოციალური მომსახურების სააგენტოს სოციალური მუშაკი) :  - ოჯახური ძალადობის შემთხვევაში, სახელმწიფო სთავაზობს ბავშვს  სახელმწიფო მზრუნველობაში გადაყვანას, ალტერნატიული ზრუნვის ფორმებს, რაც შეიძლება იყოს მინდობითი აღზრდა, მცირე საოჯახო ტიპის სახლი. ხარაგაულში ჩვენ ასეთი საჭიროება არ გვქონია. ძირითად შემთხვევაში შემაკავებელი ორდერი იქნა გამოტანილი სამართალდამცავი სტრუქტურების მიერ და, ოჯახში ძალადობის ყველა შემთხვევაში,  ხარაგაულში ბავშვები დარჩნენ ბიოლოგიურ ოჯახებში, რა თქმა უნდა გაძლიერებული მონიტორინგის პირობებში.
სრულად
http://new.admin.kharagauli.ge/images/violence-against-women.jpg
29/11/2019 22:26

რა იგეგმება ხარაგაულში ქალთა მიმართ ძალადობის წინააღმდეგ

საქართველოს მთავრობის ორგანიზებით, ქვეყანაში, ქალთა მიმართ ძალადობის წინააღმდეგ მიმართული 16 დღიანი კამპანია დაიწყო. ხარაგაულში კამპანიის ფარგლებში გენდერული თანასწორობის საბჭოს ინიციატივით, პირველი შეხვედრა გაიმართა, სადაც ქუთაისის დემოკრატიული ჩართულობის ცენტრის წარმომადგენლებმა ქალთა უფლებების გაძლიერების ხელშეწყობაზე, საზოგადოებისთვის გენდერული ძალადობის მიმართ ინფორმაციის მიწოდებასა და ამ მიმართულებით არსებული სახელმწიფო სერვისების პოპულარიზაციაზე ისაუბრეს. მოგახსენებთ, რომ ქალთა მიმართ ძალადობის წინააღმდეგ 16 დღიანი კამპანია მსოფლიოში 1991 წლიდან იმართება და მიზნად ისახავს საზოგადოებრივი ცნობიერების ამაღლებას და ქალთა მიმართ ძალადობის წინააღმდეგ ბრძოლის სფეროში არსებული გამოწვევების აქტუალიზაციას. 2019 წელს, საქართველოში, ქალთა მიმართ ძალადობის წინააღმდეგ კამპანიის მთავარ თემად სექსუალური შევიწროება განისაზღვრა. 16 დღიანი კამპანიის ფარგლებში, ხარაგაულში, მერის თანაშემწის გენდერული თანასწორობის საკითხებში, ინგა ბერაძის ინიციატივითა და გენდერული თანასწორობის საბჭოს ჩართულობით შემდეგი ღონისძიებებია დაგეგმილი: 2 დეკემბერი - ვიდეო რგოლის „სექსუალური შევიწროება საჯარო სივრცეში“  -  ჩვენება საჯარო მოხელეებისთვის; 3 დეკემბერი - ბავშვთა მიმართ ძალადობის შემცირებისკენ მიმართული კამპანია; წარმოდგენილი იქნება თეატრალური პერფორმანსი და ფორუმ-თეატრი. ღონისძიების მხარდამჭერია „კოალიცია ბავშვებისა და ახალგაზრდებისთვის“. 5 დეკემბერი - სამუშაო  შეხვედრა  სკოლის მოსწავლეებთან, პედაგოგებთან,  სოციალური მომსახურების სააგენტოსა  და პოლიციის წარმომადგენლებთან. წარმოდგენილი იქნება ნაწყვეტი ხარაგაულის სახალხო თეატრის სპექტაკლიდან „ორნი“, რომელიც ოჯახში ძალადობის თემას ეხება. 6 დეკემბერი - ბავშვების თვალით დანახული ძალადობა - ბავშვები ხატავენ ძალადობის თემაზე. 10 დეკემბერი - მსვლელობა ქუჩაში -  „აიხილე თვალები“. გაცნობებთ, რომ კამპანიას ხელმძღვანელობს საქართველოს მთავრობა და მასში მონაწილეობას იღებენ გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორისი კომისიის წევრი სახელმწიფო უწყებები.  
სრულად
http://new.admin.kharagauli.ge/images/dfghgj.jpg
21/06/2019 22:34

ვეტერანი რაგბისტები ხარაგაულში - არა ძალადობას!

დღეს ხარაგაულის კინოთეატრში გაეროს ქალთა ორგანიზაციის, ფონდი ტასოსა და რაგბის კავშირის წარმომადგენლებმა შეხვედრა გამართეს. შეხვედრას ხარაგაულის მუნიციპალიტეტის საკრებულოს თავმჯდომარე, მანანა ბარბაქაძე, მერის მრჩეველი გენდერულ და არასამთავრობო ორგანიზაციებთან ურთიერთობის საკითხებში, ინგა ბერაძე, ფონდი ტასოს ხელმძღვანელი, მარინა თაბუკაშვილი, გაეროს ქალთა ორგანიზაციის წარმომადგენელი და ვეტერანი რაგბისტები ესწრებოდნენ. როგორც შეხვედრაზე გაეროს ქალთა ორგანიზაციის წარმომადგენელმა, ანა ფაშალიშვილმა განაცხადა, ხარაგაულში ორი მიმართულებით, სოციალური მობილიზაციისა და ქალი მეწარმეების გაძლიერების მიმართულებით მუშაობენ. ოქტომბრის ბოლოს ორგანიზაცია  საგრანტო კონკურს გამოაცხადებს, სადაც ქალ მეწარმეებს შეეძლებათ მონაწილეობის მიღება.  შეხვედრას საინტერესო აღმოჩნდა ხარაგაულელი ახლად ჩამოყალიბებული რაგბის გუნდის ახალგაზრდებისთვის, რომელთაც ვეტერანი რაგბისტები ნოდარ ანდღულაძე და ლექსო გუგავა თავიანთი წარმატების მიღწევის გზებზე ესაუბრნენ. ნოდარ ანდღულაძემ და ლექსო გუგავამ კმაყოფილება გამოთქვეს ხარაგაულში რაგბის გუნდის არსებობის გამო და ყურადღება გაამახვილეს  რაგბის ღირებულებებზე - თანასწორობაზე, გუნდურობასა და ერთმანეთის პატივისცემაზე, რომელი ღირებულებებიც მნიშვნელოვანია საზოგადოებისთვის და მიმართულია ძალადობის წინააღმდეგ. შეგახსენებთ, რომ გაეროს ქალთა ორგანიზაცია რაგბის კავშირთან ერთად, 2010 წლიდან, ქალთა მიმართ ძალადობის წინააღმდეგ ქვეყნის მასშტაბით ინოვაციურ კამპანიას ახორციელებს. კამპანიის მთავარი მიზანი მოზარდებში რაგბის მთავარი ღირებულებების: თანასწორობისა და ქალთა და გოგონათა მიმართ ძალადობის მიმართ ნულოვანი ტოლერანტობის გაზიარებაა.
სრულად
http://new.admin.kharagauli.ge/images/fghjcvbnm_1.png
20/06/2019 22:29

გაეროს ქალთა ორგანიზაცია ხარაგაულში შეხვედრას გამართავს

ხარაგაულის მუნიციპალიტეტის მერის თანაშემწის გენდერულ და არასამთავრობო ორგანიზაციებთან ურთიერთობის საკითხებში, ინგა ბერაძის მიერ მოწოდებული ინფორმაციით,  21 ივნისს, 14 საათზე, ხარაგაულის კინოთეატრის შენობაში გაეროს ქალთა ორგანიზაცია და რაგბის კავშირი შეხვედრას გამართავს. ღონისძიებას დაესწრებიან რაგბისტები, რომლებიც ისაუბრებენ მათი წარმატების და ქალთა და გოგონათა მიმართ ძალადობის შესახებ. გაეროს ქალთა ორგანიზაცია რაგბის კავშირთან ერთად, 2010 წლიდან, ქალთა მიმართ ძალადობის წინააღმდეგ ქვეყნის მასშტაბით ინოვაციურ კამპანიას ახორციელებს. კამპანიის მთავარი მიზანია მოზარდებში რაგბის მთავარი ღირებულებების: თანასწორობისა და ქალთა და გოგონათა მიმართ ძალადობის მიმართ ნულოვანი ტოლერანტობის გაზიარება. შეხვედრაზე დასწრება შეუძლია ნებისმიერ მსურველს. შეხვედრის ორგანიზებას ხარაგაულში მუნიციპალიტეტის მერია და საკრებულოს გენდერული თანასწორობის საბჭო უზრუნველყოფს.
სრულად
http://new.admin.kharagauli.ge/images/dfgcvhnxcv.JPG
11/06/2019 22:36

საავტომობილო გზების დეპარტამენტმა მოსწავლეებთან შეხვედრა გამართა

10 ივნისს საქართველოს საავტომობილო გზების დეპარტამენტის წარმომადგენლებმა   ხარაგაულის სკოლების მაღალი კლასის მოსწავლეებთან, ძირულა-ხარაგაული-ჩუმათელეთის დამაკავშირებელი გზის რეაბილიტაციის პროექტის ფარგლებში, შეხვედრა გამართეს. შეხვედრა ხარაგაულის მუნიციპალიტეტის მერის მოადგილე, თემურ ჩხეიძემ და საავტომობილო გზების დეპარტამენტის თავმჯდომარის მოადგილე, გიორგი ციბაძემ გახსნეს. თემურ ჩხეიძემ ზემოთ აღნიშნული მონაკვეთის მშენებლობის მნიშვნელობაზე ისაუბრა და აღნიშნა, რომ გზის მშენებლობის პროცესში და შემდეგაც მოსახლეობა ბევრ სიკეთეს მიიღებს.   ახალგაზრდებთან შეხვედრაზე გზების დაგეგმარების შესახებ პრეზენტაცია წარმოადგინა დეპარტამენტის ინფრასტრუქტურის განვითარებისა და პარტნიორებთან ურთიერთობის სამსახურის უფროსმა, პავლე გამყრელიძემ.   ხაზი გაესვა საგზაო უსაფრთხოების წესების დაცვას, რაზეც დეპარტამენტის საგზაო უსაფრთხოების სამსახურის უფროსმა, მამუკა პატაშურმა ისაუბრა. 50 კილომეტრიანი გზის მშენებლობის პროცესში რეგულაციების დაცვის საკითხს შეეხო „საქართველოს ალიანსი უსაფრთხო გზებისთვის“ წარმომადგენელი, ეკა ლალიაშვილი, რომელიც  ხარაგაულელ ახალგაზრდებთან შეხვედრას ესწრებოდა.   გენდერული თანასწორობის შესახებ საგზაო დეპარტამენტის ადამიანური რესურსების მართვის სამსახურის უფროსმა და გენდერზე პასუხისმგებელი პირმა,  ეკატერინე ფურცელაძემ და ხარაგაულის საკრებულოს  გენდერული თანასწორობის საბჭოს თავმჯდომარის მოადგილემ, დავით კიკნაძემ ისაუბრეს.    შეხვედრის დასასრულს, მოსწავლეების მთავარი კითხვა  დაბის ცენტრალურ გზაზე მდებარე სკოლებისთვის უსაფრთხო გარემოს შექმნას შეეხო. მათი აზრით, ახალი ინფრასტუქტურის მოწყობა ავტომობილების მოძრაობას დააჩქარებს, რაც, თავის მხრივ საფრთხეს შეუქმნის მოსწავლეთა თავისუფალ გადაადგილებას. საკითხთან დაკავშირებით გამომსვლელებმა აღნიშნეს, რომ ძირულა-ხარაგაული-ფონა-ჩუმათელეთის დამაკავშირებელი გზა დაბის ცენტრალურ ნაწილში გაივლის, თუმცა მოხდება საგზაო ნიშნების, ბარდიულებისა და სხვა დამცავი ინფრასტრუქტურის მოწყობა. შესაბამისად, ქვეითების უსაფრთხოება მაქსიმალურად იქნება დაცული.
სრულად
http://new.admin.kharagauli.ge/images/1555587843-IMG_6263.jpg
21/05/2019 10:53

პროფესიული ორიენტაციის შეხვედრა სოფელ კიცხში

15 აპრილს კოლეჯის ადმინისტრაციის წევრებმა სოფელ კიცხის საზოგადოებრივ ცენტრში მოსახლეობასთან პროფესიული ორიენტაციის შეხვედრა გამართეს და ხარაგაულის ადგილობრივი თვითმმართველობის წარმომადგენლებს შეხვდნენ. შეხვედრის ფარგლებში, კოლეჯის პროფორიენტაციისა და კარიერის დაგეგმვის მენეჯერმა - თეონა გაბუნიამ ვრცლად ისაუბრა კოლეჯის შესახებ და მოსახლეობას გააცნო ის ბენეფიტები, რომელსაც „კონსტრუქტ2“ აქ სწავლის მსურველებს სთავაზობს. მან ასევე ისაუბრა სწავლების პირობებზე, კოლეჯის ინფრასტრუქტურაზე, აკადემიურ პროგრამებსა და სწავლის დასრულების შემდგომ დასაქმების პერსპექტივებზე.  შეხვედრამ ინტერაქტიულ რეჟიმში ჩაიარა და მოსახლეობის მხრიდან წამოსულ კითხვებს, რომელიც ძირითადად სასწავლო გრაფიკს, საწარმოო პრაქტიკასა და დასაქმების შემთხვევაში ფინანსურ საკითხებს ეხებოდა ამომწურავი პასუხები გაეცა. შეხვედრის დასრულების შემდგომ დარიგდა კოლეჯის საინფორმაციო ბუკლეტები და ბროშურები. შეხვედრის მეორე ნაწილი დაეთმო კოლეჯისა და ხარაგაულის ადგილობრივი თვითმმართველობის ორგანოების სამომავლო თანამშრომლობის კონკრეტული ასპექტების განხილვას და მასში მონაწილეობას ღებულობდნენ; ქალბატონი მანანა ბარბაქაძე - ხარაგაულის მუნიციპალიტეტის საკრებულოს თავმჯდომარე, ბატონი დავით კიკნაძე - ხარაგაულის მუნიციპალიტეტის განათლების, კულტურის და სპორტის კომიტეტის თავმჯდომარე, ქალბატონი ინგა ბერაძე - ხარაგაულის მუნიციპალიტეტის მერის თანაშემწე გენდერულ საკითხებში, გენდერული თანასწორობის საბჭოს მდივანი და ბატონი გია ჩხიკვაძე - მერის რწმუნებული კიცხის თემში. საუბარი შეეხო კოლეჯის ტერიტორიაზე გაცნობითი ხასიათის ექსკურსიების მოწყობასა და მუნიციპალიტეტის სოფლებში მოსახლეობასთან, გასვლითი ვიზიტების დაგეგმვას. როგორც თვითმმართველობის წარმომადგენლებმა აღნიშნეს, მერია და საკრებულო რეგიონში პროფესიული განათლების პოპულარიზაციისათვის ყველაფერს გააკეთებს და ხარაგაულის გენდერული თანასწორობის საბჭო, როგორც აღნიშნული შეხვედრების მხარდამჭერი, მაქსიმალურად იქნება ჩართული მსგავსი შეხვედრების ორგანიზების საკითხებში. „გვსურს მადლობა გადავუხადოთ ხარაგაულის ადგილობრივ თვითმმართველობას გაწეული დახმარებისათვის. ზოგადად, მივესალმებით თვითმმართველობის მხრიდან მსგავს აქტიურობას, რადგან მიგვაჩნია, რომ თვითმმართველობის როლი უდავოდ მნიშვნელოვანია მოსახლების ინფორმირების კუთხით. შევთანხმდით, რომ მომავალშიც გავაგრძელებთ თანამშრომლობას“ განაცხადა კოლეჯის პროფორიენტაციისა და კარიერის დაგეგმვის მენეჯერმა - თეონა გაბუნიამ
სრულად
http://new.admin.kharagauli.ge/images/fghjfgchn.JPG
30/04/2019 11:08

თეთრაწყაროს თვითდახმარების ჯგუფი მუნიციპალიტეტის მერს შეხვდა

ხარაგაულის მუნიციპალიტეტის მერთან, ნიკოლოზ თოფურიძესთან  „ფონდ ტასო“-ს (ქალთა ფონდი და მეხსიერების კვლევის ცენტრი) გენერალური დირექტორის მოადგილემ, ცისანა გოდერძიშვილმა და სოფელ თეთრაწყაროს ქალთა თვითდახმარების ჯგუფმა შეხვედრა გამართა. შეხვედრას ხარაგაულის მუნიციპალიტეტის მერის თანაშემწე გენდერულ და არასამთავრობო ორგანიზაციებთან ურთიერთობის საკითხებში, ინგა ბერაძე, მერის თანაშემწე, ლაშა გელაშვილი, ინფრასტრუქტურის სამსახურის უფროსი, თემური თაბუკაშვილი და საფინასო-საბიუჯეტო სამსახურის წარმომადგენელი, ნინო მაღლაკელიძე ესწრებოდნენ. როგორც შეხვედრაზე ცისანა გოდერძიშვილმა განმარტა, ფონდის მიზანი სოფლად მცხოვრები ქალბატონების გაძლიერებაა. თეთრაწყაროს ქალთა თვითდახმარების ჯგუფი ,,ფონდ ტასო“ -ს დახმარებით ჩამოყალიბდა, რომელიც სოფელში არსებულ საჭიროებებსა და პრობლემებს იკვლევს. „უნდა აღინიშნოს, რომ ძალიან აქტიური ჯგუფი შეიკრიბა, მათ უკვე დაიწყეს სოფლისთვის მნიშვნელოვანი პრობლემის გადაჭრაზე ზრუნვა, ისინი გრძნობენ თავიანთ წილ პასუხისმგებლობას და სოფლისთვის  მნიშვნელოვანი პრობლემების გადაჭრისთვის, პირველ რიგში, მზად არიან ადგილობრივ თვითმმართველობასთან სათანამშრომლოდ და ურთიერთობისთვის. ამ შემთხვევაში სოფლის უმთავრესი პრობლემა წყალია. სწორედ ამ პრობლემის მოგვარების გზებზე სასაუბროდ შედგა შეხვედრა მუნიციპალიტეტის მერთან“- აღნიშნა ცისანა გოდერძიშვილმა.  მუნიციპალიტეტის მერის, ნიკოლოზ თოფურიძის განმარტებით, სოფელ თეთრაწყაროს მოსახლეობის პრობლემას კარგად იცნობს. სოფლის მხარდაჭერის პროგრამის ფარგლებში, წყლის სათავე ნაგებობის მოსაწყობად გამოყოფილია 12 000 ლარი. ამას გარდა, სოფლებში წყლის პრობლემების მოსაგვარებლად, მუნიციპალიტეტის ბიუჯეტში გათვალისწინებულია თანხა. მას შემდეგ რაც პროექტი დასრულდება, მიზნობრივი თანხა დაიხარჯება და გაირკვევა თუ რა ეტაპზე იქნება პრობლემა მოგვარებული, ამის შემდეგ, მოგვმართეთ მოხსენებითი ბარათით და მუნიციპალიტეტის მერია შესაძლებლობების ფარგლებში გაგიწევთ დახმარებას“ - განაცხადა ნიკოლოზ თოფურიძემ. გაცნობითი ხასიათის შეხვედრაზე, სოფელ თეთრაწყაროში მცხოვრებმა ქალბატონებმა მუნიციპალიტეტის მერთან  მათთვის მნიშვნელოვან და მთავარ პრობლემაზე ისაუბრეს. სოფელს 35 წელია არ აქვს წყალი, და ის თითოეული ოჯახის პრობლემაა.  როგორც თვითდახმარების ჯგუფის ლიდერი, ნინო გველესიანი  აცხადებს, ჯგუფის წევრებს უკვე შეკრებილი აქვთ ხელმოწერები, ასევე, შედგენილია ცხრილები და პრობლემის მოსაგვარებლად მოსახლეობა ფიზიკური დახმარებით მზადაა. ინგა ბერაძე, მერის თანაშემწე გენდერულ საკითხებში: ,,ძალიან მნიშვნელოვანია, თითოეული ადამიანი გრძნობდეს თავის წილ პასუხისმგებლობას სოფლისთვის მნიშვნელოვანი პრობლემის გადაჭრის დროს. თეთრაწყაროს ქალთა თვითდახმარების ჯგუფი, რომელიც სულ ახლახან შეიქმნა არის კარგი მაგალითი იმის, თუ როგორ შეიძლება მოქალაქეების ჩართულობამ, პრობლემების გადაჭრის ეფექტური გზები გააჩინოს. ეს გაცნობითი ხასიათის შეხვედრა იყო, სოფელ თეთრაწყაროში მცხოვრებმა ქალებმა მუნიციპალიტეტის მერთან მათთვის მნიშვნელოვან და მთავარ პრობლემაზე ისაუბრეს. სოფელს 35 წელია არ აქვს წყალი, და ის თითოეული ოჯახის პრობლემაა.“
სრულად
http://new.admin.kharagauli.ge/images/fghjghncv.JPG
24/04/2019 11:09

ჩხერიმელას ხეობაში სამეწარმეო საქმიანობით დაინტერესებულ პირებს ტრენინგები ჩაუტარდებათ

აზიის განვითარების ბანკისა და საავტომობილო გზების დეპარტამენტის ინიციატივით, ხარაგაულში, ჩხერიმელას ხეობაში სამეწარმეო საქმიანობით დაინტერესებულ პირებს ტრენინგები ჩაუტარდებათ. პროექტი შიდა სახელმწიფოებრივი მნიშვნელობის ძირულა-ხარაგაული-ჩუმათელეთის გზის მშენებლობის ფარგლებში განხორციელდება. მისი მიზანია, კვალიფიციურმა სპეციალისტებმა სამეწარმეო საქმიანობისთვის გადაამზადონ გენდერულად დაბალანსებული  აუდიტორია და განახორციელონ სწავლება ისეთი  ტექნიკური მოდულებით, რომლის გავლის შემდეგაც გზის მშენებლობის არეალში მცხოვრები ბენეფიციარები მარტივად შეძლებენ აწარმოონ საკუთარი მცირე ბიზნესი, შექმნან მეურნეობები და გააკეთონ საწარმოები. 23 აპრილს, ხარაგაულის მერიაში პროექტის განხორციელებისთვის პირველი სამუშაო შეხვედრა გაიმართა, რომელსაც საავტომობილო გზების დეპარტამენტის, აზიის განვითარების ბანკის, black sea group-ის და ძირულა-ხარაგაული-ჩუმათელეთის გზის მშენებლობის ზედამხედველი კორეული კომპანიის წარმომადგენლები, ასევე, ხარაგაულის მერის პირველი მოადგილე, არჩილ მაღრაძე და მერის თანაშემწე გენდერულ საკითხებში, ინგა ბერაძე დაესწრნენ. გამომდინარე იქედან, რომ სწავლებები სოციალურ და გენდერულ საკითხებსაც მოიცავს, რაც ბენეფიციართა რაოდენობაში (სულ ცოტა 50% მაინც) ქალების ჩართულობას გულისხმობს, შეხვედრას, ზემოთ ჩამოთვლილი კომპანიების გენდერზე პასუხისმგებელი პირებიც ესწრებოდნენ.  მნიშვნელოვანია, რომ პროექტი ხარაგაულის მერიის ჩართულობით და მხარდაჭერით განხორციელდება. არჩილ მაღრაძის ინფორმაციით, ძალიან სასიხარულოა რომ მოსახლეობა გზის მშენებლობასთან ერთად ასეთ სიკეთეს მიიღებს. „მათ მიეცემათ სწორი მიმართულება როგორ განავითარონ საკუთარი მეურნეობები, შექმნან საწარმოები, აწარმოონ მცირე ბიზნესი და მიიღონ შემოსავალი. ყოველივე ამაში კი, ხარაგაულის ეკონომიკური განვითარება და გაძლიერება იგულისხმება, რაც განსაკუთრებულად მნიშვნელოვანს ხდის პროექტის განხორციელებას“- აღნიშნა ხარაგაულის მერის მოადგილემ.   მერის თანაშემწემ გენდერულ საკითხებში ინგა ბერაძემ შეხვედრაზე აღნიშნა, რომ პირველ რიგში აუცილებელია მოსახლეობას ზუსტად მიეწოდოს მესიჯები რას სთავაზობს ეს პროექტი მათ და რა მოლოდინები შეიძლება ჰქონდეთ. სწავლების პოპულარიზაციისთვის და მოსახლეობის დაინტერესებისთვის, აზიის განვითარების ბანკი პირველ ეტაპზე საინფორმაციო კამპანიას ჩაატარებს, რათა გამოიკვეთოს თუ რა საჭიროებები დგას ადგილობრივი მეწარმე სუბიექტების, თუ ბიზნესის დაწყებით დაინტერესებული პირების წინაშე და რა ტექნიკური თუ  თეორიული ცოდნის მიღებაა მნიშვნელოვანი მათთვის თავიანთი იდეების განვითარებისთვის. სასწავლო მოდული მოსახლეობის გამოკითხვების შედეგად შემუშავდება. ტრენინგები 4 ეტაპად ჩატარდება და თოთოეულ ჯგუფში 25 კაცი იქნება. საერთო ჯამში პროექტის ფარგლებში 100 დაინტერესებული პირი გადამზადდება.“  შეხვედრაზე გადაწყდა შეიქმნას სამუშაო ჯგუფი, რომელიც პროექტის დაწყებამდე შეიმუშავებს ყველა საჭირო დეტალს, განიხილავს რისკებს, რომელიც შეიძლება წარმოიშვას პროექტის განხორციელების პროცესში და უკვე მომზადებულები დაიწყებენ  ტრენინგების ჩატარებას. პროექტის პირველი ეტაპი გამოკითხვის ჩატარებაა, რომელშიც ჩართვის შესაძლებლობა ხარაგაულის მოსახლეობას უახლოეს მომავალში მიეცემა.
სრულად
http://new.admin.kharagauli.ge/images/56749245_278075519768584_5659651909733056512_n.jpg
12/04/2019 12:34

“ფონდი ტასო“ ხარაგაულის გენდერული თანასწორობის საბჭოსთან თანამშრომლობას იწყებს

,,ფონდი ტასოს“ (ქალთა ფონდი და მეხსიერების კვლევის ცენტრი) გენერალური დირექტორის მოადგილემ ცისანა გოდერძიშვილმა ხარაგაულის გენდერული თანასწორობის საბჭოს წევრებთან საინფორმაციო-საპრეზენტაციო ხასიათის  შეხვედრა გამართა. სამუშაო შეხვედრის ფორმატში ქალბატონმა ცისანამ გენდერული თანასწორობის საბჭოს წევრებს ის პროექტი წარუდგინა, რომლის ფარგლებშიც გენდერული თანასწორობის საბჭო გენდერულ ბიუჯეტირებაზე სათანადო განათლების მიღებას და პრაქტიკაში მის დანერგვას დაიწყებს. ცისანა გოდერძიშვილი: ,,ეს არის სრულიად ახალი კომპონენტი საბჭოს მუშაობაში, რომელიც მიზნად ისახავს დავინახოთ, თუ რა როლი შეუძლია გენდერულმა საბჭოს ითამაშოს გენდერულ ბიუჯეტირებაში და რა ნაბიჯები შეიძლება იყოს გადადგმული ამ მხრივ. პროექტი გენდერული თანასწორობის საბჭოს გაძლიერებას და ხელშეწყობას ემსახურება და მისი შესაძლებლობების ზრდას ბიუჯეტირებაში ჩართულობის თვალსაზრისით.” შეხვედრის ფარგლებში დაიგეგმა ტრენინგების ციკლი, რომელსაც ფონდი ,,ტასო“-ს წარმომადგენლები გენდერული თანასწორობის საბჭოს წევრებისთვის,  მერიის საფინანსო - საბიუჯეტო სამსახურის და საკრებულოს საფინანსო - საბიუჯეტო კომისიის წევრებისთვის უახლოეს მომავალში ჩაატარებს.
სრულად
http://new.admin.kharagauli.ge/images/_DSC0110.JPG
06/03/2019 12:43

ერთი დღით - მამაკაცები აღმზრდელებად

6 მარტს ხარაგაულის საბავშვო ბაღებში მისულ პატარებს აღმზრდელებად მამაკაცები დახვდნენ.  მათ საბავშვო ბაღის აღმზრდელის ფუნქცია შეითავსეს და დღის განმავლობაში, აღმზრდელის თანაშემწეებთან ერთად, წარმართეს აქტივობები.  აქცია - „ერთი დღით მამაკაცები აღმზრდელებად“ ხარაგაულის მუნიციპალიტეტის გენდერული თანასწორობის საბჭოსა და სკოლამდელ დაწესებულებათა გაერთიანების ორგანიზებით, ხარაგაულის მუნიციპალიტეტის ყველა საბავშო ბაღში განხორციელდა.  სკოლამდელ დაწესებულებათა გაერთიანების დირექტორის მამუკა ჭიპაშვილის განცხადებით აქცია - „ერთი დღით მამაკაცები აღმზრდელებად“ ერთგვარად იმ სტერეოტიპის მსხვრევის მცდელობაა, რომ საბავშვო ბაღის აღმზრდელებად მხოლოდ ქალები არ უნდა მუშაობდნენ. აქციაში მერიის და საკრებულოს თანამდებობის პირები და თანამშრომლები ჩაერთვნენ, N1 საბავშვო ბაღში  მამაკაცი აღმზრდელთა ფუნქციები შეითავსეს: თეიმურაზ ჩხეიძემ, დავით კიკნაძემ,  ალექსანდრე ტაბატაძემ, ზურაბ იჩქიტიძემ, ნიკოლოზ მაჭავარიანმა, ალექსანდრე ტაბატაძემ, დავით ჩადუნელმა ხოლო ხარაგაულის N2 საბავშვო ბაღში-ვალერი ჭიპაშვილმა და ოთარ ლურსმანაშვილმა. ,,მამაკაცმა აღმზრდელებმა“ აღნიშნეს, რომ, მათთვის ძალიან განსაკუთრებული და დასამახსოვრებელი დღე იყო. ზურაბ იჩქიტიძე: ,,აღმზრდელის პროფესია საკმაოდ რთული და საპასუხისმგებლოა, ამავე დროს ძალიან სასიამოვნოც, რადგან პატარებთან გაქვს შეხება, ვფიქრობ კარგად უნდა იცნობდე თითოეულ ბავშვს, უნდა შეგეძლოს მათი აზრის გათვალისწინება, მათი მოსმენა , რა ჭირდებათ და რა უნდათ.  4-5 წლიანთა ჯგუფი შემხვდა,  მათ გაზაფხულზე და ბუნებაზე ვესაუბრე,  დიდი გულისყურით მისმენდნენ, კარგად გაერთნენ და მეც დადებითი ემოციებით ავივსე. დრო ძალიან ჩქარა გავიდა. ასეთ პროექტში დიდი სიამოვნებით მივიღებ კიდევ მონაწილეობას.“ ინგა ბერაძე - მერის თანაშემწე გენდერულ საკითხებში, გენდერული თანასწორობის საბჭოს მდივანი ,,ძალიან საინტერესო სანახავი იყო მამაკაცები აღმზრდელებად, ზოგი ძალიან თავისუფლად მოერგო ამ საპასუხისმგებლო მისიას, ზოგს გაუჭირდა, მათ სულ სხვა თვალით შეაფასეს და გადააფასეს აღმზრდელის შრომა და სრულად გაითავისეს ის დიდი პასუხისმგებლობა, რაც აღმზრდელობით საქმიანობას ახლავს თან . ამ აქტივობის მთავარი მისიაც სწორედ ეს იყო. ჩვენი მიზანია, საზოგადოებაში საუბრობდნენ გენდერზე, გენდერულ თანასწორობაზე, მის მნიშვნელობასა და როლზე. ამ თემების გაცნობიერება პირველ რიგში სწორედ ბაღიდან და სკოლიდან უნდა დაიწყოს. ჩვენი გვსურს, შევახსენოთ საზოგადოებას, რომ გენდერული თანასწორობა უმნიშვნელოვანეს საკითხს წარმოადგენს არა მხოლოდ ქალებისთვის, არამედ მამაკაცებისთვის და ზოგადად, საზოგადოებისთვის. ძალიან მნიშვნელოვანია, ბავშვის აღზრდა -განვითარების საქმეში ქალისა და მამაკაცის თანაბარი მონაწილეობა. მადლობა მინდა ვუთხრა ბაღების გაერთიანების დირექტორს მამუკა ჭიპაშვილს დღევანდელი საინტერესო აქტივობისთვის, რომელიც პირდაპირ პასუხობს ხარაგაულის მუნიციპალიტეტის გენდერული თანასწორობის საბჭოს სამოქმედო გეგმით გაწერილ ამოცანებს. უახლოეს მომავალში, ჩვენ კვლავ გვექნება აქტივობები, რომელთა მთავარი მიზანი გენდერული თანასწორობის თემაზე საზოგადოების ცნობიერების ამაღლება იქნება. საბჭოს წევრები აქტიურად მუშაობენ იდეებზე, რომლებსაც გენდერული თანასწორობის საბჭოსთან ერთად განახორციელებენ.“ აღნიშნული ღონისძიება „ერთი დღე მამაკაცები აღმზრდელებად“, ხარაგაულის საბავშვო ბაღებში, სარვამარტო კვირეულის ფარგლებში ჩატარდა.  
სრულად